ທ້າວ ພັນທະລັງ ອຸໄທທານີ (ເຈມບອນ) ນັກກີລາດອກປີກໄກ່ຈາກນະຄອນຫຼວງວຽງຈັນ ແລະ ນາງ ເພັດມະນີ ແກ້ວເພຍຈັນ (ແອນນ່າ) ສາວນັກກີລາຕີດອກຈາກແຂວງຄຳມ່ວນ ຈາກທະນາຄານ ລາວ-ຫວຽດນາມ ສາມາດປ້ອງກັນແຊັມປະເພດທີມຄູ່ປະສົມຮຸ່ນທົ່ວໄປ ສະໄໝທີ 2 ຕິດຕໍ່ກັນ ໃນການແຂ່ງຂັນດອກປີກໄກ່ທົ່ວປະເທດ ຄັ້ງທີ 20 ຊີງຂັນປະທານສະພາແຫ່ງຊາດ ປະຈຳປີ 2020 ຫຼື ລາຍການເບຍລາວໂອເພັນ 2020 ຫຼັງຈາກສຳເລັດການແຂ່ງຂັນ ໃຫ້ສຳພາດວ່າ: ພວກນ້ອງມີຄວາມຮູ້ສຶກພາກພູມໃຈ ແລະ ເປັນກຽດຢ່າງສູງ ທີ່ສາມາດປ້ອງກັນແຊັມ ສ້າງສະຖິຕິໃຫ້ແກ່ຕົນເອງ ກໍຄື ສ້າງຜົນງານໃຫ້ຕົ້ນສັງກັດທະນາຄານ ລາວ-ຫວຽດນາມ ມີກຽດ ແລະ ຊື່ສຽງໃນວົງການກີລາດອກປີກໄກ່ ທີ່ໃຫຍ່ທີ່ສຸດໃນລາວ ເພື່ອສ້າງຂະບວນການສະເຫຼີມສະຫຼອງວັນລັດຖະທຳມະນູນແຫ່ງຊາດ ຄົບຮອບ 29 ປີ ຈັດຂຶ້ນວັນທີ 20-23 ສິງຫາ 2020 ທີ່ສະໂມສອນເສດຖາ (ບຶງຂະຫຍອງ).
ເຈມບອນ ກ່າວຕື່ມອີກວ່າ: ຕົນເອງຈະສືບຕໍ່ເຝິກຊ້ອມຢ່າງຕໍ່ເນື່ອງ ແລະ ຈະນຳເອົາປະສົບການຕ່າງໆທີ່ເຄີຍຜ່ານມາຢ່າງຫຼວງຫຼາຍ ທັງເຄີຍຫຼິ້ນໃຫ້ຕົ້ນສັງກັດໃນໄລຍະໄປສຶກສາຮຽນຕໍ່ທີ່ມະຫາວິທະຍາໄລ Zhe Jiang Li Gong Da Xue ສປ ຈີນ ເຂົ້າຮ່ວມລາຍການລະດັບອາຊີບ ກໍຈະນຳເອົາບົດຮຽນເຫຼົ່ານັ້ນ ມາເຝິກຝົນຫຼໍ່ຫຼອມມາພັດທະນາໃຫ້ມີທ່າກ້າວທີ່ພົ້ນເດັ່ນຂຶ້ນກວ່າເກົ່າ ເພື່ອກຽມຄວາມພ້ອມທຸກສະຖານະການ ເຂົ້າຮ່ວມແຂ່ງຂັນລາຍການໃຫຍ່ໆລະດັບຊາດ ຈະຈັດຂຶ້ນທ້າຍປີນີ້ ໂດຍສະເພາະ ງານມະຫະກຳກີລາແຫ່ງຊາດທີ່ແຂວງຊຽງຂວາງເປັນເຈົ້າພາບ.
ແອນນ່າ ກ່າວອີກວ່າ: ກ່ອນຈະເຂົ້າຮ່ວມລາຍການ ເບຍລາວ ໂອເພັນ 2020 ນ້ອງບໍ່ມີເວລາໄດ້ເຝິກຊ້ອມຢ່າງເຕັມທີ່ ຍ້ອນບັນຫາໂຄວິດ-19 ທີ່ແຜ່ລະບາດຢ່າງໜັກ ແຕ່ກໍຍ້ອນປະສົບການທີ່ເຄີຍໄປເຝິກຊ້ອມກັບສະໂມສອນ ແກນດູລ້າ ຈາກນະຄອນຫຼວງບາງກອກ ສະໂມສອນລະດັບແຖວໜ້າຂອງປະເທດໄທ ໃນ 1 ເດືອນ ກ່ອນຈະເຂົ້າຮ່ວມຊຽງຂວາງເກມ ເດືອນກຸມພາ 2020 ບວກກັບຜົນງານທີ່ສາມາດຍາດໄດ້ໃນງານມະຫະກຳກີລາແຫ່ງຊາດ ຫຼື ຈຳປາສັກເກມປີ 2008 ໄດ້ຫຼຽນທອງປະເພດທີມຍິງ ຫຼວງພະບາງເກມ ປີ 2011 ຍາດໄດ້ 1 ຫຼຽນເງິນດ່ຽວຍິງ ແລະ 1 ຫຼຽນທອງຄູ່ປະສົມ ອຸດົມໄຊ ເກມ ປີ 2014 ກໍສາມາດຍາດໄດ້ຫຼຽນເງິນດ່ຽວຍິງ ແລະ ປະສົບການທີ່ໄດ້ເຄື່ອນໄຫວຮ່ວມກັບ ເຈມບອນ ທີ່ ສປ ຈີນ ຈຶ່ງເຮັດໃຫ້ຕົນເອງປະສົບຜົນສຳເລັດໃນລາຍການເບຍລາວ ໂອເພັນ 2020 ແນວໃດກໍດີ ເພື່ອເປັນການຮັບປະກັນໃນການສ້າງຜົນງານໃຫ້ບ້ານເກີດແຂວງຄຳມ່ວນ ໃນຊຽງຂວາງເກມ ແລະ ລາຍການລະດັບຊາດໃນຕໍ່ໜ້າ ຈະສືບຕໍ່ເຝິກຊ້ອມໃຫ້ຕໍ່ເນື່ອງ ເພື່ອສ້າງຄວາມແຂງແກ່ນຢ່າງສະໝ່ຳສະເໝີ.
ສຳລັບຜົນງານຂອງທັງສອງຄົນໃນການເຂົ້າຮ່ວມແຂ່ງຂັນດອກປີກໄກ່ ເບຍລາວ ໂອເພັນ 2020 ຈັດຂຶ້ນວັນທີ 20-23 ສິງຫານີ້ ໂດຍແມ່ນບໍລິສັດ ເບຍລາວ ໃຫ້ການອຸປະຖຳຫຼັກ 162 ລ້ານກີບ ສະເພາະ ເຈມບອນ ລົງແຂ່ງຂັນ 2 ລາຍການ ປະເພດຄູ່ຊາຍ ແລະ ຄູ່ປະສົມທົ່ວໄປ ໃນນັ້ນ ສ້າງຜົນງານຍາດໄດ້ພຽງຫຼຽນຄຳ ປະເພດຄູ່ປະສົມ ສ່ວນ ນາງ ແອນນ່າ ລົງແຂ່ງຂັນ 2 ລາຍການເຊັ່ນກັນ ແລະ ສາມາດໄດ້ 1 ຫຼຽນຄຳ ຄູ່ປະສົມ ແລະ 1 ຫຼຽນເງິນ ປະເພດທີມຄູ່ຍິງ.