ການແຂ່ງຂັນນັດຊີງຊະນະເລີດ ບານເຕະຊີງຂັນທ່ານເຈົ້າແຂວງຈຳປາສັກ ປະຈຳປີ 2020 ຄູ່ທີ 1 ເປັນການພົບກັນລະຫວ່າງ ປກສ ແຂວງ ພົບກັບວິທະຍາໄລເຕັກນິກວິຊາຊີບຈຳປາສັກ (ຮຸ່ນທົ່ວໄປ) ແລະ ບໍລິສັດ ຕູ່ຂົນສົ່ງ ພົບກັບເມືອງປາກຊ່ອງ (ຢູ-19) ຄັ້ງນີ້ ຈັດຂຶ້ນວັນທີ 23 ສິງຫາ 2020 ຢູ່ສະໜາມກີລາແຂວງຈຳປາສັກ ນະຄອນປາກເຊ (ຫຼັກ2) ມີທ່ານ ພົນໂທ ວິໄລ ຫຼ້າຄຳຟອງ ລັດຖະມົນຕີກະຊວງປ້ອງກັນຄວາມສະຫງົບ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ບັນດາຫົວໜ້າ ຮອງຫົວໜ້າພະແນກ ຫ້ອງການ ຄະນະບໍລິຫານງານສະຫະພັນບານເຕະແຂວງ ພ້ອມດ້ວຍພະນັກງານ ທະຫານ ຕຳຫຼວດ ປະຊາຊົນແຂວງຈຳປາສັກ ກໍຄື ຊາວນະຄອນປາກເຊເຂົ້າຮ່ວມຊົມ ແລະ ເຊຍຫຼາຍພັນຄົນ.
ຜ່ານການແຂ່ງຂັນຜົນປາກົດວ່າ: ຮຸ່ນທົ່ວໄປເປັນໄປຕາມຄາດທີມນັກກີລາບານເຕະ ປກສ ແຂວງ ສາມາດເອົາຊະນະ ທີມວິທະຍາໄລເຕັກນິກວິຊາຊີບ ແຂວງຈຳປາສັກ 2-0 ປະຕູ ຄວ້າແຊັມໄປຄອງ ແລະ ເປັນສະໄໝທີ 2 ສ່ວນວິທະຍາໄລເຕັກນິກຈຳປາສັກ ອັນດັບທີ 3 ທີມກາຍານັງເອພີເອັຟຊີ ແລະ ອັນດັບທີ 4 ທີມສະມາຄົມຫວຽດນາມ ຂະນະທີ່ລາງວັນນັກເຕະດີເດັ່ນຕົກເປັນຂອງ ອຸດົມສິດ ສິງລາດສົມບູນ ອະດີດນັກກີລາບານເຕະທີມຊາດລາວ ຈາກ ປກສ ແຂວງ ສ່ວນຮຸ່ນອາຍຸບໍ່ເກີນ 19 ປີ ຫຼື ຢູ-19 ອັນດັບທີ 1 ບໍລິສັດ ຕູ່ຂົນສົ່ງ ອັນດັບທີ 2 ເມືອງປາກຊ່ອງ ອັນດັບທີ 3 ບໍລິສັດ ນ້ຳດື່ມ ພູຟ້າ ແລະ ອັນດັບທີ 4 ໄອດີຊີ ຈຳປາສັກ.
ການແຂ່ງຂັນລາຍການນີ້ ເພື່ອເປັນການສືບຕໍ່ຈັດຕັ້ງປະຕິບັດແຜນຍຸດທະສາດ ການພັດທະນາຂອງສະຫະພັນບານແຂວງ ແນໃສ່ສົ່ງເສີມການພັດທະນາວົງການກີລາບານເຕະແຂວງໃຫ້ມີທ່າກ້າວທີ່ພົ້ນເດັ່ນ ພ້ອມທັງຊຸກຍູ້ເສີມຂະຫຍາຍການພັດທະນານັກກີລາລູກຫຼານພາກໃຕ້ ດິນແດນວັດພູຈຳປາສັກ ໄດ້ມີການເຄື່ອນໄຫວຢ່າງຕໍ່ເນື່ອງ ສາມາດກ້າວຂຶ້ນໄປຕິດທີມແຂວງ ແລະ ທີມຊາດໃນອະນາຄົດ ເຊິ່ງການແຂ່ງຂັນຄັ້ງນີ້ມີ 16 ພາກສ່ວນເຂົ້າຮ່ວມນັ້ນ ຢູ-19 ມີ 8 ທີມ ແລະ ຮຸ່ນທົ່ວໄປມີ 8 ທີມ.