ຄົນເຮົາຫາກມີເລື່ອງແຕ່ຫາກແກ້ໄປຕາມຫຼັກການທີ່ມີ ທີ່ກົດໝາຍກຳນົດ ທີ່ໄດ້ຕົກລົງກັນໄວ້ຄິດວ່າເລື່ອງຂອງເລື່ອງຈະບໍ່ພາໃຫ້ເກີດການຮ້ອງ ການຟ້ອງ ເກີດກຽດ ເກີດຊັງກັນດອກ ຍ້ອນເບື້ອງຕົ້ນຕ່າງຝ່າຍກໍວ່າບໍ່ເປັນຫຍັງ ແຕ່ບາດທີຫຼັງບໍ່ຈັກຫຍັງເປັນຫຍັງ ບໍ່ຈັກໄຫວ້ ບໍ່ຈັກຂໍ ບໍ່ຈັກຊິຮ້ອງຊິໄຫ້ ບໍ່ຈັກຂາບ ບໍ່ຈັກນົບ ສຸດທ້າຍກໍກາຍເປັນເຂົາງົວປ່າ ຂີ້ແມວເລີຍເຕັມກະດົ້ງເພາະໃຜໆກໍແນມເຫັນຜົນປະໂຫຍດທີ່ຕົນຈະໄດ້ ກໍເລີຍກັບຫຼົບລີ້ນປີ້ນຄວາມ ເລື່ອງງ່າຍກໍກາຍເລີຍເປັນເລື່ອງຍາກໆຈົນໄກ່ເກ່ຍກັນບໍ່ຕົກບໍ່ແຕກກັນ ອັນເນື່ອງຈາກຕ່າງຄົນຕ່າງກໍຖືຜົນປະໂຫຍດສ່ວນຕົວເປັນໃຫຍ່ ເວົ້າເລື່ອງແບບນີ້ ເກີດຈາກຫຼາຍສາເຫດ ແຕ່ໃນນີ້ຈະເວົ້າແຕ່ເລື່ອງມູນມໍລະ ດົກ ໂດຍສະເພາະ ເຮືອນຊານລານແປ້ນ ເງິນຄຳກຳແກ້ວ ໄຮ່ນາຮົ້ວສວນ ລົດລາງພາຫະນະ ແລະ ດິນດອນຕອນຫຍ້າເຫຼົ່ານີ້ເປັນຕົ້ນ.
ຫຼັກການສືບທອດມູນມໍລະດົກ ການແບ່ງ ປັນມູນມໍຣະດົກລະຫວ່າງຜູ້ສືບທອດມູນມໍລະດົກ ແບ່ງອອກເປັນ 2 ປະເພດຄື: ການສືບທອດຕາມກົດໝາຍ ແລະ ການສືບທອດຕາມພິໄນກຳ ຊຶ່ງໃຜກໍພໍຈະຮູ້ ສຳລັບຜູ້ສືບທອດຕາມກົດໝາຍປະກອບມີບຸກຄົນເຫຼົ່ານີ້:
1. ລູກ (ລູກຄີງ ລູກລ້ຽງ ລູກນ້າ) ຂອງຜູ້ເສຍຊີວິດ.
2. ຜົວ ຫຼື ເມຍຂອງເຈົ້າມູນມໍຣະດົກທີ່ຍັງມີຊີວິດຢູ່.
3. ຍາດສາຍຕັ້ງມີ: ພໍ່ ແມ່ ປູ່ ຍ່າ ພໍ່ເຖົ້າ ແມ່ເຖົ້າທວດຂອງຜູ້ເສຍຊີວິດ.
4. ຍາດສາຍຂວາງມີ: ອ້າຍ ເອື້ອຍ ນ້ອງ ລຸງ ປ້າ ອາວ ອາ ນ້າບ່າວ ນ້າສາວຫຼານ ເຫຼັນ ຫຼ້ອນ ຂອງຜູ້ເສຍຊີວິດ.
5. ລັດ ຫຼື ນິຕິບຸກຄົນ ຫຼື ບຸກຄົນອື່ນ ທີ່ໄດ້ກຳນົດໄວ້ໃນປະມວນກົດໝາຍແພ່ງ (ກ່ຽວກັບການສືບທອດມູນມໍລະດົກ).
ຜູ້ສືບທອດຕາມກົດໝາຍທີ່ກ່າວມາຂ້າງເທິງນັ້ນ ຈະມີຂຶ້ນໄດ້ກໍຕໍ່ເມື່ອເຈົ້າມູນບໍ່ໄດ້ເຮັດພິໄນກຳມອບໃຫ້ບຸກຄົນ ຫຼື ການຈັດຕັ້ງໃດໜຶ່ງສືບທອດ ພິໄນກຳເປັນໂມຄະ ຫຼື ຜູ້ສືບທອດມູນມໍຣະດົກຕາມພິໄນກຳນັ້ນ ໄດ້ເສຍຊີວິດກ່ອນການເປີດພິໄນກຳ ຜູ້ສືບທອດຕາມພິໄນກຳຫາກບໍ່ຮັບເອົາການສືບທອດ.
ສຳລັບລຳດັບການສືບທອດມູນມໍລະດົກຂອງຜູ້ສືບທອດ ກ່ອນອື່ນຕ້ອງແມ່ນຍາດ ຊັ້ນຈຳຂອງເຈົ້າມູນເປັນຜູ້ໄດ້ຮັບກ່ອນ ສ່ວນຜູ້ທີ່ຢູ່ລຳດັບໃກ້ຊິດຖັດໄປນັ້ນ ຈະໄດ້ຮັບກໍຕໍ່ເມື່ອເຈົ້າມູນບໍ່ມີຍາດຊັ້ນຈຳເທົ່ານັ້ນ ຕົວຢ່າງ: ທ້າວ ເງືອດ ແລະ ນາງ ເດືອດ ໄດ້ເສຍຊີວິດຍ້ອນອຸບັດເຫດ ໃນເວລາທີ່ທັງສອງໄປທ່ຽວ ລະຫວ່າງ ທ້າວ ເງືອດ ແລະ ນາງ ເດືອດ ບໍ່ມີລູກນຳກັນ ແລະ ທັງທ້າວ ເງືອດ ແລະ ນາງ ເດືອດ ກໍບໍ່ມີອ້າຍ ຫຼື ເອື້ອຍນ້ອງຄີງຈັກຄົນ ແຕ່ວ່າ ທ້າວ ເຟືອດ ພໍ່ຂອງ ທ້າວ ເງືອດ ແລະ ນາງ ເສືອດ ຊຶ່ງເປັນແມ່ຂອງ ນາງ ເດືອດພັດຍັງມີຊີວິດຢູ່ ໃນກໍລະນີເຊັ່ນນີ້ ທີ່ດິນ ແລະ ເຮືອນຂອງເຂົາເຈົ້າ ຈະຕົກເປັນກຳມະສິດຂອງໃຜ? ສະນັ້ນ ຕາມຫຼັກການຂອງກົດໝາຍທີ່ກ່ຽວຂ້ອງແລ້ວ ເມື່ອຜົວເມຍ ທ້າວ ເງືອດ ແລະ ນາງ ເດືອດ ໄດ້ເສຍຊີວິດແລ້ວ ແລະ ບໍ່ມີລູກແຕ່ຍັງມີພໍ່ ແລະ ແມ່ຂອງທັງ 2 ຄົນຍັງມີຊີວິດຢູ່ ດັ່ງນັ້ນ ພໍ່ຂອງ ທ້າວ ເງືອດ ແລະ ນາງ ເສືອດ ແມ່ຂອງ ນາງ ເດືອດ ຈະເປັນຜູ້ມີສິດສືບທອດມູນມໍລະດົກດັ່ງກ່າວຕາມຍາດສາຍຕັ້ງ ໂດຍທີ່ເຂີຍ ແລະ ບຸກຄົນອື່ນບໍ່ມີສ່ວນໄດ້ຮັບມູນມໍລະດົກດັ່ງກ່າວນັ້ນແຕ່ຢ່າງໃດ.
ໂດຍ: ໄມ້ງັດ