ສະຫາຍ ຄຳແກ່ງ ດວງພະຈັນ ຮອງເລຂາພັກເມືອງ ຮອງເຈົ້າເມືອງຫາດຊາຍຟອງ ໄດ້ລາຍງານແຜນພັດທະນາເສດຖະກິດ-ສັງຄົມ 5 ປີ ຕໍ່ກອງປະຊຸມໃຫຍ່ຂອງອົງຄະນະພັກເມືອງຫາດຊາຍຟອງ ຄັ້ງທີ VII ວ່າ: 5 ປີຜ່ານມາ ຄະນະພັກ ຄະນະນຳການປົກຄອງເມືອງຫາດຊາຍຟອງ ໄດ້ສຸມໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຢ່າງຕັ້ງໜ້າ ເຮັດໃຫ້ຈັງຫວະການຂະຫຍາຍຕົວດ້ານເສດຖະກິດມີລັກສະນະຕໍ່ເນື່ອງ ລວມຍອດຜະລິດຕະພັນພາຍໃນບັນລຸໄດ້ 4.243 ຕື້ກີບ ທຽບໃສ່ແຜນການ (3.537 ຕື້ກີບ) ລື່ນແຜນ 19.96% ເພີ່ມຂຶ້ນສະເລ່ຍແຕ່ລະປີບັນລຸໄດ້ 538 ຕື້ກີບຕໍ່ປີ ດ້ວຍອັດຕາການຂະຫຍາຍຕົວເພີ່ມຂື້ນສະເລ່ຍ 7,04% ຕໍ່ປີ ລວມຍອດຜະລິດຕະພັນພາຍໃນຕໍ່ຫົວຄົນບັນລຸໄດ້ 41 ລ້ານກີບຕໍ່ຄົນຕໍ່ປີ ເທົ່າກັບ 4.682 ໂດລາຕໍ່ຄົນຕໍ່ປີ.
ດ້ານໂຄງປະກອບເສດຖະກິດ ມີການປ່ຽນແປງໄປໃນທິດທາງທີ່ວ່ອງໄວ ໂຄງປະກອບເສດຖະກິດຕາມຂະແໜງການ ແລະ ການສ້າງມູນຄ່າເພີ່ມ ຂອງບັນດາຂະແໜງການໄດ້ມີການເໜັງຕິງໃນລະດັບດີ ແລະ ໄປຕາມທິດທີ່ກຳນົດໄວ້ເຊັ່ນ: ກະສິກຳ ປ່າໄມ້ ແລະ ການປະມົງປະຕິບັດໄດ້ 27,23% ຂອງ GDP ທຽບໃສ່ແຜນການ (34%) ຫຼຸດລົງ 6,77% ອຸດສາຫະກຳ ປະຕິບັດໄດ້34,50% ຂອງ GDP ທຽບໃສ່ແຜນການ (33%) ເພີ່ມຂຶ້ນ1,5% ການບໍລິການປະຕິບັດໄດ້ 38,27% ຂອງGDP (33%) ເພີ່ມຂຶ້ນ 5,27%.
ການຈັດຕັ້ງປະຕິບັດວຽກງານພັດທະນາຊົນນະບົດລົບລ້າງຄວາມທຸກຍາກພັດທະນາເຂດຈຸດສຸມ ສາມາດປະກາດບ້ານພັດທະນາໄດ້ 33 ບ້ານ ສຳເລັດການສຳຫຼວດບ້ານພັດທະນາ ແລະພົ້ນທຸກຂອງເມືອງ ທັງໝົດ 60 ບ້ານແລະປ້ອນຂໍ້ມູນເຂົ້າໂປຣແກຣມມາດຖານພົ້ນທຸກ ແລະ ມາດຖານພັດທະນາ 58 ບ້ານ ຍັງເຫຼືອ 2 ບ້ານທີ່ບໍ່ທັນສຳເລັດຄື ບ້ານຫົວຫ້າ ແລະ ບ້ານໂພສີ.
