ທ່ານນາງ ດາລາວອນ ມະນີຈັນ ອະດີດນັກກີລາປິ່ງປ່ອງທີມຊາດລາວ ທັງເປັນປະທານສະໂມ ສອນປິ່ງປ່ອງ ດາລາວອນ ແຈ້ງໃຫ້ຊາບວ່າ: ເພື່ອເປັນການຈັດຕັ້ງປະຕິບັດຕາມແຈ້ງການລັດຖະບານ ກໍຄື ກະຊວງສຶກສາທິການ ແລະ ກີລາ ໄດ້ແຈ້ງໃຫ້ບັນດາໂຮງຮຽນ ທຸກພາກສ່ວນໃນຂະແໜງສຶກສາ ແລະ ບັນດາສະໂມສອນຕ່າງໆ ໃຫ້ຢຸດເປັນການຊົ່ວຄາວນັບແຕ່ນີ້ ເປັນຕົ້ນໄປ ທາງສະໂມສອນ ຈຶ່ງໄດ້ປະກາດໃຫ້ນັກກີລາພາຍໃນສະໂມສອນໄດ້ຮັບຊາບຢ່າງທົ່ວເຖິງ ເພື່ອຢຸດການເຝິກຊ້ອມໃຫ້ແກ່ນັກກີລາເຍົາວະຊົນ ແລະ ໄວໜຸ່ມ ຊົ່ວຄາວ ເພື່ອເປັນການປ້ອງກັນບໍ່ໃຫ້ນັກກີລາຕິດເຊື້ອຈຸລະໂລກສາຍພັນໃໝ່ ໂຄວິດ-19 ທີ່ກຳລັງແຜ່ລະບາດຢ່າງໜັກໃນທົ່ວໂລກ ຫຼັງຈາກພະຍາດດັ່ງກ່າວ ຢຸດການແຜ່ລະບາດເປັນທີ່ຮຽບຮ້ອຍ ທາງສະໂມສອນ ດາລາວອນ ຈຶ່ງຈະກັບມາເປີດສອນເຝິກຊ້ອມຢ່າງເປັນທາງປົກກະຕິ.
ທ່ານ ນາງ ດາລາວອນ ມະນີຈັນ ບອກຕື່ມອີກວ່າ: ສຸດເສຍດາຍທີ່ສຸດ ສູນຂອງພວກເຮົາກຳລັງໄດ້ຮັບຄວາມສົນໃຈ ນິຍົມຊົມຊອບຈາກມວນຊົນເປັນຢ່າງຫຼວງຫຼາຍ ແລະ ມີທ່າອ່ຽງດີຂຶ້ນເລື້ອຍໆ ໂດຍໄດ້ມີການວາງແຜນກະກຽມຈະຈັດການແຂ່ງຂັນ ແລະ ຈັດກິດຈະກຳຫຼາຍຢ່າງ ໃນລະຫວ່າງເດືອນມີນາ ຫາ ເດືອນທັນວາ 2020 ແຕ່ມາພົບກັບບັນຫາພະຍາດໂຄວິດ-19 ແຜ່ລະບາດ ເຊິ່ງເຮັດໃຫ້ພວກເຮົາຕ້ອງມີຄວາມຈຳເປັນຢຸດກິດຈະກຳທຸກຢ່າງແບບບໍ່ມີກຳນົດ ໄດ້ສ້າງຜົນເສຍຫາຍຫຼາຍພໍສົມຄວນ ສະເລ່ຍໃນຕອນນີ້ປະມານ 40-50% ແຕ່ຖ້າແກ່ຍາວໄປຮອດເດືອນພຶດສະພາ ຫຼື ເດືອນມິຖຸນາ ຍັງບໍ່ສາມາດເປີດບໍລິການເຝິກຊ້ອມຢ່າງເປັນປົກກະຕິ ຈະສ້າງຜົນເສຍຫາຍເພີ່ມຂຶ້ນຫຼາຍຢ່າງແນ່ນອນ ແຕ່ເຖິງຢ່າງໃດກໍຕາມ ສິ່ງທີ່ເຮັດໄດ້ ກໍພະຍາຍາມບອກສອນ ແລະ ແນະນຳສະມາຊິກຂອງສະໂມສອນ ຈຳນວນ 30-40 ຄົນ ເຖິງວ່າຈະບໍ່ໄດ້ເຝິກຊ້ອມກັບສະໂມສອນພວກເຮົາ ຢູ່ທາງບ້ານກໍຕ້ອງເຝິກທັກສະ ແລະ ເທັກນິກຕ່າງໆ ເພື່ອເສີມສ້າງ ແລະ ຮັກສາສະມັດຖະພາບຂອງຮ່າງກາຍໄວ້ຄົງເດີມຄືເກົ່າ ແລະ ບັນຫາໃດທີ່ຍັງບໍ່ເຂົ້າໃຈກໍສາມາດໂທມາສອບຖາມພົວພັນໄດ້.
ປັດຈຸບັນສະໂມສອນ ປິ່ງປ່ອງ ດາລາວອນ ເປີດສອນຢູ່ທີ່ສູນການຄ້າ ລາວ-ໄອເຕັກ (ຊັ້ນ 4) ເມືອງໄຊເຊດຖາ ນະຄອນຫຼວງວຽງຈັນ ມີຄູເຝິກສອນ 4 ທ່ານ ແລະ ນັກກີລາປະມານ 30-40 ຄົນ ຊ້ອມທຸກໆວັນ ເລີ່ມແຕ່ເວລາ 10:00-20:00 ໂມງ ເປັນຕົ້ນໄປ.