ມື້ນີ້ຂໍສະເໜີກ່ຽວກັບຄວາມຈຳເປັນ ທີ່ຕ້ອງມີວິທີກຳຈັດຂີ້ເຫຍື້ອ ບໍ່ໃຫ້ລົ້ນໂລກ ຕາມຄວາມຮຽກຮ້ອງຂອງອົງການ ສປຊ ແລະ ບົດຮຽນຂອງຫວຽດນາມ.
ອົງການ ສປຊ: ໃນຕົ້ນເດືອນກຸມພາ 2019 ອົງການສະຫະປະຊາຊາດ (ສປຊ) ໄດ້ແຈ້ງເຕືອນໄພກ່ຽວກັບບັນຫາຂີ້ເຫຍື້ອເອເລັກໂຕຣນິກ ທີ່ພວມເປັນໄພຂົ່ມຂູ່ຕໍ່ສຸຂະພາບຂອງມວນມະນຸດ ເພາະຂີ້ເຫຍື້ອປະເພດນີ້ ມີສານພິດທີ່ເປັນອັນຕະລາຍຮ້າຍແຮງກວ່າຂີ້ເຫຍື້ອທົ່ວໄປ ພ້ອມໆກັບຄຳຮຽກຮ້ອງໃຫ້ທຸກປະເທດ ເອົາມາດຕະການທີ່ຈຳເປັນເພື່ອແກ້ໄຂບັນຫາຂີ້ເຫຍື້ອປະເພດນີ້ ອົງການ ສປຊ ກໍໄດ້ຊີ້ໃຫ້ເຫັນວ່າໃນປີ 2018 ທົ່ວໂລກ ໄດ້ຜະລິດຂີ້ເຫຍື້ອເອເລັກໂຕຣນິກຈຳນວນ 48,5 ລ້ານໂຕນ ແຕ່ສາມາດແປຮູບເພື່ອນຳມາໃຊ້ຄືນໃໝ່ໄດ້ພຽງ 20% ເທົ່ານັ້ນ ສ່ວນເຫຼືອນັ້ນໄດ້ຖືກຖິ້ມຊະຊາຍ ອົງການ ສປຊ ຍັງຄາດຄະເນໄວ້ວ່າ ພາຍໃນປີ 2050 ຈຳນວນຂີ້ເຫຍື້ອເອເລັກໂຕຣນິກຈະເພີ່ມຂຶ້ນເຖິງ 120 ລ້ານໂຕນ ຂີ້ເຫຍື້ອເອເລັກໂຕຣນິກນັ້ນ ລວມມີອຸປະກອນເອເລັກໂຕຣນິກທີ່ໝົດຄຸນ ເຊັ່ນ: ໂທລະສັບມືຖື ເຄື່ອງຄອມພິມເຕີ ໂທລະພາບ ຕູ້ເຢັນ ຈັກຊັກເຄື່ອງ ແອເຢັນ ແລະ ອື່ນໆ ຄາດກັນວ່າຈຳນວນໂທລະສັບມືຖື ຄອມພິວເຕີ ກໍຄື ອຸປະກອນເອເລັກໂຕຣນິກ ທີ່ໃຊ້ໃນຄົວເຮືອນທີ່ໄດ້ກາຍເປັນຂີ້ເຫຍື້ອໃນທົ່ວໂລກນັ້ນ ມີມູນຄ່າເທົ່າໆກັບຈີດີພີຂອງປະເທດ ກົດສະຕາຣິກາ ໂຄຼເອຊີ ຫຼື ຕັງຊານີ ລວມເຂົ້າກັນ ດັ່ງນັ້ນ ສປຊ ຈຶ່ງຖືວ່າຂີ້ເຫຍື້ອເອເລັກໂຕຣນິກ ເປັນບັນຫາທ້າທາຍຂອງມວນມະນຸດ ທີ່ຕ້ອງໄດ້ຮ່ວມກັນແກ້ໄຂຢ່າງຈິງຈັງ.
ທີ່ຫວຽດນາມ: ມີຂ່າວໃນທ້າຍເດືອນພຶດສະພາ 2019 ວ່າ ປະຊາຊົນຫວຽດນາມ ໄດ້ໃຫ້ການຮ່ວມມືກັບທາງການໃນການກຳຈັດຂີ້ເຫຍື້ອເປັນຢ່າງດີ ຄື: ບໍ່ຖິ້ມຂີ້ເຫຍື້ອຊະຊາຍ ແຕ່ຖິ້ມລົງຖັງທີ່ຈັດວາງໄວ້ ແຍກປະເພດຂີ້ເຫຍື້ອເພື່ອສາມາດນຳມາໃຊ້ໃໝ່ (ຣີໄຊເກິນ) ທັງເພື່ອງ່າຍໃນການກຳຈັດ ປະຊາຊົນຫວຽດນາມ ມີສະຕິບໍ່ຖິ້ມຂີ້ເຫຍື້ອລົງທະເລ ກໍຄື ແຫຼ່ງນ້ຳ ແນວໃດກໍດີ ຖ້າເບິ່ງຕາມພາບລວມແລ້ວ ຫວຽດນາມ ຍັງຕ້ອງໄດ້ເຮັດເສິກໃຫຍ່ເພື່ອກຳຈັດຂີ້ເຫຍື້ອທີ່ມີຈຳນວນຫຼວງຫຼາຍ ຍົກຕົວຢ່າງ ຢູ່ເມືອງຍາຈາງ ແຫຼ່ງທ່ອງທ່ຽວຮີມທະເລທີ່ລືຊື່ແຫ່ງໜຶ່ງຂອງປະເທດ ຊຶ່ງມີນັກທ່ອງທ່ຽວທັງພາຍໃນ ແລະ ຕ່າງປະເທດຕອມຢູ່ບໍ່ຂາດສາຍນັ້ນ ກໍຍັງມີບັນຫາໜັກໃຈເລື່ອງຂີ້ເຫຍື້ອ ຂ່າວບອກວ່າ ເມືອງແຫ່ງນີ້ໄດ້ສ້າງຂີ້ເຫຍື້ອປະເພດຢາງ ບໍ່ຕ່ຳກວ່າ 1 ໂຕນຕໍ່ວັນ ຂີ້ເຫຍື້ອທີ່ວ່ານີ້ມາຈາກຄົວເຮືອນ ຈາກກິດຈະການການປະມົງ ແລະ ອຸດສາຫະກຳທ່ອງທ່ຽວ ແຕ່ລະວັນພະນັກງານຕ້ອງໄດ້ເກັບກວາດຂີ້ເຫຍື້ອທີ່ຢັ່ງຢາຍຕາມແຄມຝັ່ງ ແລະ ລອຍຢູ່ຕາມໜ້ານ້ຳທະເລ.
ຢູ່ລາວພວກເຮົາ ໂດຍສະເພາະແມ່ນໃນກະໂຕນະຄອນຫຼວງວຽງຈັນນີ້ ຈຳນວນຂີ້ເຫຍື້ອທີ່ສະສົມແຕ່ລະວັນນັ້ນມີລະຫວ່າງ 500-600 ໂຕນ ແຕ່ສາມາດເກັບມ້ຽນໄດ້ປະມານເຄິ່ງໜຶ່ງເທົ່ານັ້ນ ສ່ວນຈຳນວນຄົວເຮືອນທີ່ໃຊ້ການບໍລິການເກັບມ້ຽນຂີ້ເຫຍື້ອກໍມີພຽງ 27% ສ່ວນອີກ 73% ນັ້ນບໍ່ນຳໃຊ້ ໝາຍຄວາມວ່າກຳຈັດຂີ້ເຫຍື້ອເອົາເອງ ດ້ວຍວິທີທີ່ບໍ່ຮັບປະກັນ.