ສະຫະພັນບານເຕະແຫ່ງຊາດລາວ (ສຕລ) ຈັດກອງປະຊຸມພັດທະນາກີລາບານເຕະທົ່ວປະເທດ ປະຈຳປີ 2020 ຂຶ້ນວັນທີ 22 ສິງຫາ 2020 ຢູ່ໂຮງແຮມລາວພລາຊາ ນະຄອນຫຼວງວຽງຈັນ ເປັນປະທານຂອງທ່ານ ວີເພັດ ສີຫາຈັກຣ ປະທານສະຫະພັນບານເຕະແຫ່ງຊາດລາວ ມີທ່ານ ສົມພູ ພົງສາ ຜູ້ຊ່ວຍລັດຖະມົນຕີກະຊວງສຶກສາທິການ ແລະ ກີລາ ຮອງປະທານ ແລະ ເລຂາທິການ ຄະນະກຳມະການໂອແລມປິກແຫ່ງຊາດລາວ ທີ່ປຶກສາ ສຕລ ພ້ອມດ້ວຍຄະນະບໍລິຫານງານ ສຕລ ຜູ້ສະຫະພັນບານເຕະນະຄອນຫຼວງວຽງຈັນ ແລະ ບັນດາແຂວງເຂົ້າຮ່ວມ
ກອງປະຊຸມຄັ້ງນີ້ແນໃສ່ການເສີມຂະຫຍາຍສາຍພົວພັນລະຫວ່າງ ສຕລ ແລະ ສະຫະພັນບານເຕະແຂວງ ໂດຍເນັ້ນໃຫ້ບັນດາສະຫະພັນບານເຕະແຂວງ ມີຫ້ອງການປະຈຳຂອງຕົນ ເພີ່ມຈຳນວນພົນກີລາບານເຕະໃຫ້ຫຼາຍຂຶ້ນ ໃນທົ່ວປະເທດ ການສ້າງອາຊີບ ແລະ ພັດທະນາບຸຄະລາກອນກີລາບານເຕະ ເສີມຂະຫຍາຍກີລາບານເຕະຂັ້ນພື້ນຖານໃນເຂດຊຸມຊົນ ແລະ ທ້ອງຖິ່ນ ການສ້າງກີລາບານເຕະໃຫ້ເປັນກິດຈະກຳຍອດນິຍົມໃນລາວ ນອກນີ້ ກອງປະຊຸມໄດ້ປະກອບຄຳຄິດເຫັນໃນການແບ່ງກຸ່ມສົນທະນາ 5 ຫົວຂໍ້ ຄື: ການຈັດຕັ້ງສະຫະພັນບານເຕະແຂວງ ທິດທາງໃນການເພີ່ມຈຳນວນພົນກີລາບານເຕະໃນທົ່ວປະເທດ ການເຝິກອົບຮົມຄູເຝິກ ກຳມະການຕັດສິນ ບຸຄະລາກອນເຕັກນິກ ແລະ ອື່ນໆ ການສົ່ງເສີມນັກກີລາບານເຕະພາຍໃນທ້ອງຖິ່ນ ໃຫ້ເປັນຕົວແທນແຂວງ ແລະ ການສະກັດກັ້ນການລົ້ມບານໃນທຸກຮູບແບບ.
ທ່ານ ວີເພັດ ສີຫາຈັກຣ ກ່າວວ່າ: ສຕລ ຈະໃຫ້ການຊ່ວຍເຫຼືອດ້ານງົບປະມານບໍລິຫານຫ້ອງການສະຫະພັນບານເຕະແຂວງ (ສຕຂ) ຖ້າ ສຕຂ ມີເງື່ອນໄຂຄົບຖ້ວນ ກໍຄື ຕ້ອງມີຄະນະບໍລິຫານງານ ສຕຂ ຄະນະປະທານ ສຕຂ ເລຂາທິການ ສຕຂ ຫ້ອງການ ສຕຂ ແລະ ເປີດບັນຊີທະນາຄານທີ່ເປັນຂອງ ສຕຂ ໂອກາດນີ້ ປະທານ ສຕລ ໄດ້ເຊີນບັນດາສະຫະພັນບານເຕະແຂວງ ແລະ ນະຄອນຫຼວງ ເຂົ້າຮ່ວມການແຂ່ງຂັນບານເຕະທົ່ວປະເທດຍິງ-ຊາຍ ເພື່ອຄຳນັບຮັບຕ້ອນວັນຊາດ ທີ 2 ທັນວາ ຄົບຮອບ 45 ປີ ຈະຈັດຂຶ້ນເດືອນພະຈິກ 2020 ຢູ່ນະຄອນຫຼວງວຽງຈັນ ອີກດ້ວຍ.