ພິທີປະກາດສ້າງຕັ້ງສະຫະພັນຊາວໜຸ່ມລາວ ຈັດຂຶ້ນວັນທີ 25 ສິງຫາ 2020 ທີ່ຫໍວັດທະນະທຳແຫ່ງຊາດ ນະຄອນຫຼວງວຽງຈັນ ມີທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ ທ່ານ ອາລຸນໄຊ ສູນນະລາດ ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນປະຕິວັດລາວ (ປປລ) ພ້ອມດ້ວຍຜູ້ຕາງໜ້າຈາກກະຊວງ ອົງການ ນະຄອນຫຼວງ ຄະນະບໍລິຫານງານຊາວໜຸ່ມ ປປລ ພະນັກງານຫຼັກແຫຼ່ງທີ່ເຮັດວຽກງານຊາວໜຸ່ມ-ເຍົາວະຊົນ ສະມາຊິກຊາວໜຸ່ມ ສະມາຄົມ ແລະ ມູນນິທິເຂົ້າຮ່ວມ.
ທ່ານ ອາລຸນໄຊ ສູນນະລາດ ກ່າວວ່າ: ຄະນະຊາວໜຸ່ມ ປປລ ໄດ້ມີແນວຄວາມຄິດລິເລີ່ມສ້າງຕັ້ງສະຫະພັນຊາວໜຸ່ມລາວ ມາຕັ້ງແຕ່ກອງປະຊຸມໃຫຍ່ ຄັ້ງທີ I ຜູ້ແທນຊາວໜຸ່ມທົ່ວປະເທດ ປີ 1983 ຈົນເຖິງກອງປະຊຸມໃຫຍ່ ຄັ້ງທີ VII ຜູ້ແທນຊາວໜຸ່ມທົ່ວປະເທດ ໄດ້ມີຄວາມພະຍາຍາມຕັ້ງບັນຫາສຶກສາຄົ້ນຄວ້າ ເກັບກຳຂໍ້ມູນ ສຳມະນາວິທະຍາສາດ ໄປຖອດຖອນແລກປ່ຽນບົດຮຽນກັບບັນດາປະເທດເພື່ອນມິດຍຸດທະສາດ ແລະ ສາກົນມາໂດຍຕະຫຼອດ ພ້ອມທັງເລັງເຫັນສະພາບເສດຖະກິດ-ສັງຄົມມີການຂະຫຍາຍຕົວ ສັງຄົມການແບ່ງງານນັບມື້ນັບລະອຽດອ່ອນ ຄວາມຮຽກຮ້ອງຕ້ອງການຂອງຊາວໜຸ່ມນັບມື້ນັບສູງ ການຈັດຕັ້ງຊາວໜຸ່ມຕາມສາຂາອາຊີບກໍເກີດຂຶ້ນຢ່າງຫຼວງຫຼາຍ ແລະ ມີລັກສະນະວ່ອງໄວ້ ມີເປົ້າໝາຍທີ່ແຕກຕ່າງກັນ ແລະ ເຄື່ອນໄຫວຢ່າງກວ້າງຂວາງ ທັງຢູ່ພາຍໃນ ແລະ ຕ່າງປະເທດ ການຈັດຕັ້ງທາງສັງຄົມ ມີທັງການເຄື່ອນໄຫວສອດຄ່ອງກັບແນວທາງນະໂຍບາຍຂອງພັກ ແລະ ມີການເຄື່ອນໄຫວເພື່ອຫວັງຜົນປະໂຫຍດທາງດ້ານການເມືອງ ແລະ ເສດຖະກິດ.
ປັດຈຸບັນ ທົ່ວປະເທດມີສະມາຄົມ ແລະ ມູນນິທິທັງໝົດ 189 ຫົວໜ່ວຍ ໃນນີ້ໄດ້ຂື້ນທະບຽນມີ 43 ຫົວໜ່ວຍ ມີພະນັກງານທັງໝົດ 3.743 ຄົນ ແລະ 9 ມູນນິທິ ມີພະນັກງານທັງໝົດ 59 ຄົນ ຕາມສະຖິຕິການລົງເກັບກຳຂອງພະແນກຄຸ້ມຄອງການຈັດຕັ້ງຊາວໜຸ່ມທາງສັງຄົມ ວັນທີ19 ກັນຍາ 2018 ສຳລັບສະມາຄົມ ແລະ ສະໂມສອນທີ່ຂຶ້ນກັບການຄຸ້ມຄອງຂອງຄະນະຊາວໜຸ່ມ ປປລ ມີສະມາຄົມນັກທຸລະກິດໜຸ່ມ ມີສະມາຊິກ 309 ຄົນ ສະໂມສອນຊາວໜຸ່ມເດີນທະເລມີ 525 ຄົນ ສະໂມສອນໂຄງການມິດຕະພາບລາວ-ຍີ່ປຸ່ນ ມີສະມາຊິກ 468 ຄົນ ກອງອາສາສະໝັກຊາວໜຸ່ມມີ 122 ກອງ ມີສະມາຊິກ 12.810 ຄົນ ສະໂມສອນປາກກາໃໝ່ມີ 30 ຄົນ ນອກນັ້ນຍັງມີສະມາຄົມ ແລະ ການຈັດຕັ້ງຂອງຊາວໜຸ່ມທີ່ຮ່ວມມືກັບສູນກາງຊາວໜຸ່ມ ມີສະມາຄົມເພື່ອສຸຂະພາບຊາວໜຸ່ມຈຳປາຄລາສິກ ແລະ ສະມາຄົມພັດທະນາບົດບາດຍິງ-ຊາຍ.
ໂອກາດນີ້ ທ່ານ ໄຊສົມພອນ ພົມວິຫານ ກ່າວວ່າ: ສະຫະພັນຊາວໜຸ່ມໄດ້ຮັບການສ້າງຕັ້ງຂຶ້ນ ໃຫ້ສືບຕໍ່ເຄື່ອນໄຫວເພື່ອໃຫ້ຖືກຕາມພາລະບົດບາດ ແລະ ຈຸດປະສົງທີ່ໄດ້ວາງໄວ້ນັ້ນ ແມ່ນສິ່ງທ້າທາຍຫຼາຍ ເພາະວ່າຄະນະຊາວໜຸ່ມເປັນການຈັດຕັ້ງທີ່ມີຂອບເຂດຄວາມຮັບຜິດຊອບກວ້າງຂວາງ ແຕ່ມາໄລຍະນີ້ຂັ້ນເທິງ ກໍຄືພັກມອບໝາຍ ສະຫະພັນຊາວໜຸ່ມທີ່ມີບົດບາດກວ້າງຂວາງ ແລະ ທ້າທາຍກວ່າເກົ່າ ສະນັ້ນ ໃຫ້ຮີບຮ້ອນກະກຽມນຳສະເໜີບຸຄະລາກອນ ທີ່ຈະປະກອບເຂົ້າໃນໂຄງປະກອບບຸກຄະລາກອນ ຂອງສະຫະພັນຊາວໜຸ່ມລາວ ເພື່ອໃຫ້ໄດ້ເຄື່ອນໄຫວຕາມພາລະບົດບາດ ເຕົ້າໂຮມ ຄຸ້ມຄອງບັນດາສະມາຄົມທີ່ເຄື່ອນໄຫວພົວພັນກ່ຽວກັບຊາວໜຸ່ມ ແລະ ບຸກຄົນທີ່ມີຄວາມມັກຮັກໃນວຽກງານຊາວໜຸ່ມ ຄະນະພັກ ແລະ ຄະນະຊາວໜຸ່ມແຕ່ລະຂັ້ນ ຕ້ອງນຳເອົາເນື້ອໃນທີ່ຕັ້ງພາລະບົດບາດຂອງສະຫະພັນຊາວໜຸ່ມລາວ ໄປເຜີຍແຜ່ໃນສະມາຊິກຊາວໜຸ່ມ ແລະ ການຈັດຕັ້ງທາງສັງຄົມໄດ້ຮັບຮູ້ເຂົ້າໃຈ ພ້ອມທັງພິຈາລະນາກະກຽມສ້າງຕັ້ງສະຫະພັນຊາວໜຸ່ມຂັ້ນແຂວງ ນະຄອນຫຼວງ ກະຊວງ ແລະ ອົງການໃຫ້ໄດ້ເຄື່ອນໄຫວຄ່ຽງຄູ່ກັບຄະນະຊາວໜຸ່ມປະຊາຊົນປະຕິວັດລາວ ສ້າງໃຫ້ພະນັກງານຊາວໜຸ່ມທີ່ມີຄວາມໜັກແໜ້ນເປັນແບບຢ່າງນຳໜ້າໃນດ້ານຕ່າງໆ ປະກອບສ່ວນໃນການພັດທະນາຕົນເອງ ການຈັດຕັ້ງ ແລະ ປະເທດຊາດ ກະກຽມແຜນການໄລຍະສັ້ນ ແລະ ໄລຍະຍາວ ລວມທັງຍຸດທະສາດ ຫຼື ແຜນພັດທະນາສະຫະພັນຊາວໜຸ່ມລາວ ໂຄສະນາສຶກສາອົບຮົມເຕົ້າໂຮມສະມາຊິກ ເພື່ອມາເຂົ້າຮ່ວມເປັນສະມາຊິກຂອງສະຫະພັນໃຫ້ໄດ້ຫຼາຍທີ່ສຸດ ສ້າງກົນໄກໃນການປົກປ້ອງສິດຜົນປະໂຫຍດອັນຊອບທຳໃຫ້ສະມາຊິກຕາມກົດໝາຍ ແລະ ລະບຽບການຂອງລັດ ເປັນເຈົ້າການປະສານສົມທົບກັບບັນດາອົງການຈັດຕັ້ງຕ່າງໆທັງພາຍໃນ ແລະ ຕ່າງປະເທດ ຍາດແຍ່ງການສະໜັບສະໜູນ ແລະ ຊ່ວຍເຫຼືອຕ່າງໆ ໃຫ້ສະຫະພັນຊາວໜຸ່ມລາວໄດ້ເຄື່ອນໄຫວ ຕາມພາລະບົດບາດຢ່າງແຂງແຮງ.