ສະຫາຍ ພົງສະຫວັນ ສິລິພັນ ໄດ້ຜ່ານຮ່າງລົດລາຍງານການເມືອງທັງສອງ ພາກຕໍ່ກອງປະຊຸມໃຫຍ່ ຄັ້ງທີ V ຂອງອົງຄະນະພັກເມືອງສັງທອງ ນະຄອນຫຼວງວຽງຈັນ (ນວ) ທີ່ໄຂຂຶ້ນຢ່າງເປັນທາງການ ວັນທີ 25 ສິງຫາ 2020 ທີ່ສະໂມສອນເມືອງດັ່ງກ່າວວ່າ: ໄລຍະ 5 ປີຜ່ານມາ (2014-2019) ໄດ້ນຳພາພັດທະນາເສດຖະກິດເປັນໃຈກາງ ມີຜົນສຳເລັດໃໝ່ຫຼາຍດ້ານ ອັນໄດ້ເຮັດເສດຖະກິດໄດ້ສືບຕໍ່ຂະຫຍາຍຕົວຢ່າງຕໍ່ເນື່ອງ ສະເລ່ຍ 7,4% ຕໍ່ປີ ລວມຍອດຜະລິດຕະພັນພາຍໃນ ບັນລຸ 1.114,87 ຕື້ກີບ ລື່ນຄາດໝາຍ 96,42% ສະເລ່ຍລາຍຮັບຕໍ່ຄົນຕໍ່ປີໄດ້ 34 ລ້ານກີບ ເທົ່າກັບ 3.885 ໂດລາສະຫະລັດ (ລື່ນແຜນ 1.812 ໂດລາ ເທົ່າກັບ 87,4%) ໃນນັ້ນ: ກະສິກຳ-ປ່າໄມ້ ເພີ່ມຂຶ້ນ 3,69% ກວມ 34% ຂອງ GDP ອຸດສາຫະກຳ-ຫັດຖະກຳ ເພີ່ມຂຶ້ນ 9,65% ກວມ 35,2% ຂອງ GDP ການບໍລິການ ເພີ່ມຂຶ້ນ 8,82% ກວມ 30,8% ຂອງ GDP.
ສຳລັບການລົງທຶນຂອງລັດທັງໝົດ 20 ໂຄງການ ໂຄງການສືບຕໍ່ 35 ໂຄງການ ລວມມູນຄ່າ 116,97 ຕື້ກີບ ທຽບໃສ່ແຜນປະຕິບັດໄດ້ 17,69 % ຫຼາຍໂຄງການໄດ້ປະກອບສ່ວນພັດທະນາເມືອງສັງທອງໃຫ້ມີໂສມໜ້າໃໝ່ ກາຍເປັນເຂດທ່ອງທ່ຽວຕາມທິດຍືນຍົງ ໄດ້ຄຸ້ມຄອງລາຍຮັບ-ລາຍຈ່າຍ ຖືກຕ້ອງຕາມກົດໝາຍ ແລະ ລະບຽບການຕ່າງໆ ພົ້ນເດັ່ນ ໄດ້ນຳໃຊ້ເຄື່ອງມືທັນສະໄໝເຂົ້າໃນການຄຸ້ມຄອງລາຍຮັບ-ລາຍຈ່າຍ ສາມາດຈັດເກັບລາຍຮັບເຂົ້າງົບປະມານໄດ້ 28,69 ຕື້ກີບ ເທົ່າກັບ 136% ຂອງແຜນການ ສ່ວນດ້ານລາຍຈ່າຍງົບປະມານປະຕິບັດໄດ້ 88,73 ຕື້ກີບ ເທົ່າກັບ 100% ພ້ອມນັ້ນ ໄດ້ສຸມໃສ່ການຜະລິດກະສິກຳ ເຊິ່ງທົ່ວເມືອງມີເນື້ອທີ່ນາທັງໝົດ 8.500 ເຮັກຕາ ທຽບໃສ່ປີ 2014 ເພີ່ມຂື້ນ 100 ເຮັກຕາ ເທົ່າກັບ 1,19% ສະມັດຕະພາບສະເລ່ຍ 4,4 ໂຕນຕໍ່ເຮັກຕາ ສະເລ່ຍໃສ່ຫົວຄົນໄດ້ 1.224 ກິໂລຕໍ່ຄົນຕໍ່ປີ ການຜະລິດເປັນສິນຄ້າຂອງປະຊາຊົນມີທ່ວງທ່າຂະຫຍາຍຕົວ ໄດ້ເອົາໃຈໃສ່ຊຸກຍູ້ສົ່ງເສີມທຸກພາກສ່ວນເສດຖະກິດ ລົງທຶນເຂົ້າໃສ່ການພັດທະນາຂະແໜງອຸດສາຫະກຳ ການຄ້າ ແລະ ການບໍລິການທີ່ໄດ້ຮັບຮອງກາໝາຍສິນຄ້າ 1 ເມືອງ 1 ຜະລິດຕະພັນແຫ່ງຊາດ 3 ຜະລິດຕະພັນ ເກີດໃໝ່ 2 ຜະລິດຕະພັນ ມີຫົວໜ່ວຍທຸລະກິດທັງໝົດ 928 ຫົວໜ່ວຍ.