ພາຍຫຼັງເຫັນຜົນງານທີ່ຫຼາຍພາກສ່ວນ ທັງພາກລັດ ແລະ ເອກະຊົນ ບຸກຄົນທົ່ວໄປ ໄດ້ໃຊ້ບໍລິການໃຫ້ບໍລິສັດ ແກ້ວທະວີຄູນເພີ່ມພູນຊັບຂາເຂົ້າ-ຂາອອກ ຈຳກັດຜູ້ດຽວ ນຳເອົາພືດຜັກ ແລະ ໝາກໄມ້ປອດສານພິດ ເປັນສິນຄ້າທີ່ບໍລິສັດຜະລິດຢູ່ເມືອງປາກຊ່ອງ ແຂວງຈຳປາສັກ ມາຕົບແຕ່ງເວທີກອງປະຊຸມ ແລະ ງານຕ່າງໆໃນຜ່ານມານັ້ນ ຫຼ້າສຸດວັນທີ 20 ສິງຫາ 2020 ທີມງານບໍລິສັດ ນຳໂດຍທ່ານ ແກ້ວລຳພອນ ແສງສຸລິເດດ ປະທານບໍລິສັດ ແກ້ວທະວີຄູນ ເພີ່ມພູນຊັບ ຂາເຂົ້າ-ຂາອອກ ຈຳກັດຜູ້ດຽວ ໄດ້ມາບໍລິການຕົບແຕ່ງເວທີກອງປະຊຸມໃຫຍ່ ຄັ້ງທີ II ຄະນະພັກຮາກຖານກົມປູກຝັງ ກະຊວງກະສິກຳ ແລະ ປ່າໄມ້ ທີ່ຈັດຂຶ້ນວັນທີ 21 ສິງຫາ 2020 ຢູ່ສະໂມສອນກະຊວງດັ່ງກ່າວ.
ທ່ານ ນາງ ຂັນທະລີ ແສງສຸລິເດດ ຮອງປະທານບໍລິສັດແກ້ວທະວີຄູນເພີ່ມພູນຊັບ ຂາເຂົ້າ-ຂາອອກ ຈຳກັດຜູ້ດຽວ ໄດ້ກ່າວວ່າ: ບໍລິສັດພວກເຮົານອກຈາກຜະລິດ ແລະ ຂາຍສິນຄ້າພືດຜັກປອດສານພິດແລ້ວ ຍັງບໍລິການຕົບແຕ່ງເວທີຕ່າງໆດ້ວຍພືກຜັກປອດສານພິດ ແລະ ເຮັດກະຕ່າຂອງຂວັນອວຍພອນຕື່ມອີກ ທຸກຢ່າງທີ່ປະກອບເປັນສິນຄ້າພືດຜັກ ປະເພດໃບ ປະເພດໝາກ ແລະ ໝາກໄມ້ທີ່ເປັນສິນຄ້າຂອງບໍລິສັດທັງໝົດເພື່ອມາຕົບແຕ່ງທົດແທນດອກໄມ້ ເຊິ່ງການຕົບແຕ່ງດ້ວຍພືດຜັກປອດສານພິດ ນອກຈາກຕົ້ນທຶນຈະຕ່ຳແລ້ວ ເວລາສຳເລັດກອງປະຊຸມ ແລະ ງານ ພືດຜັກທີ່ມາຕົບແຕ່ງທັງໝົດນັ້ນ ເຈົ້າພາບຍັງສາມາດນຳເອົາໄປບໍລິໂພກໄດ້ຕື່ມອີກ ໂດຍລວມແລ້ວ ນັບແຕ່ເລີ່ມເຮັດມາທີ່ເປັນໄລຍະເບື້ອງຕົ້ນນີ້ ເຫັນວ່າສຳເລັດມາຫຼາຍງານແລ້ວ ແຕ່ເວທີກອງປະຊຸມມີ 2 ງານ ນອກຈາກຄັ້ງຫຼ້າສຸດນີ້ແລ້ວ ຍັງມີກອງປະຊຸມໃຫຍ່ ຄັ້ງທີ VII ຄະນະພັກຮາກຖານພະແນກກະສິກຳ ແລະ ປ່າໄມ້ນະຄອນຫຼວງວຽງຈັນ ຈັດຂຶ້ນເມື່ອເດືອນກຸມພາ 2020.
ທ່ານ ນາງ ຂັນທະລີ ແສງສຸລິເດດ ຍັງກ່າວຕື່ມວ່າ: ການຕົບແຕ່ງດ້ວຍພືດຜັກ ແລະ ໝາກໄມ້ປອດສານພິດແທນດອກໄມ້ ແມ່ນມີຄວາມລະອຽດອ່ອນ ມີຄວາມພະຍາຍາມໃນການຈັດໃຫ້ພໍດີພໍງາມ ເພາະວ່າພືດຜັກ ແລະ ໝາກໄມ້ຈະມີຫຼາຍຊະນິດຫຼາຍສີ ແຕ່ເຮົາຈະເຮັດໃຫ້ມັນກົມກືນກັບເວທີ ແລະ ຖືກໃຈເຈົ້າພາບ ດັ່ງນັ້ນ ຜູ້ທີ່ສົນໃຈຕ້ອງການໃຫ້ບໍລິສັດໄປຕົບແຕ່ງ ແລະ ເຮັດກະຕ່າຂອງຂວັນອວຍພອນ ສາມາດຕິດຕໍ່ພົວພັນບໍລິສັດ ພ້ອມນີ້ ຜູ້ທີ່ຕ້ອງການຊື້ສິນຄ້າປອດສານພິດນຳບໍລິສັດໄປບໍລິໂພກເພື່ອສຸຂະພາບ ແລະ ເປັນການຊຸກຍູ້ສົ່ງເສີມສິນຄ້າພາຍໃນທີ່ຄົນລາວຜະລິດໄດ້ນັ້ນ ກໍສາມາດໄປຊື້ໄດ້ທີ່ຕະຫຼາດກະສິກຳອິນຊີນະຄອນຫຼວງວຽງຈັນ ຂາຍທຸກຕອນເຊົ້າວັນພຸດ ແລະ ວັນເສົາ ຢູ່ທີ່ເດີ່ນສູນການຄ້າລາວ-ໄອເຕັກ ເມືອງໄຊເຊດຖາ ນະຄອນຫຼວງວຽງຈັນ.
