ຜູ້ຂຽນມີເລື່ອງອ່າວເກົ່າ ແຕ່ຍັງເຜັດມັນກ່ຽວກັບການຖ່າຍເຊວຟີ ທີ່ພາໃຫ້ເກີດມີບັນຫາຕາມມາ ການຖ່າຍເຊວຟີ ແມ່ນການຖ່າຍຮູບຕົນເອງດ້ວຍຕົນເອງ ໂດຍໃຊ້ໂທລະສັບມືຖື ປະເພດ “ສະມາດ-Smart” ຊຶ່ງນິຍົມກັນແບບສຸດໆໃນປັດຈຸບັນ ແຕ່ພ້ອມດຽວກັນ ການຖ່າຍເຊວຟີ ກໍເຄີຍສ້າງບັນຫາໃຫ້ຄົນນ້ຳຕາຕົກໃນຍ້ອນຄວາມປະໝາດ ເພາະການໃຊ້ໂທລະສັບມືຖືຖ່າຍໃຫ້ເຫັນພາບຕົນເອງຄົນດຽວ ຫຼື ຮ່ວມກັບໝູ່ຫຼາຍຄົນນັ້ນມັນຕ້ອງໄດ້ເອົາທ່າທາງ ເຊັ່ນ: ຖອຍຫຼັງ ງ່ຽງຊ້າຍ ງ່ຽງຂວາ ໃຫ້ໄດ້ມູມໄດ້ພາບສວຍງາມ ໃນເວລານັ້ນ ຈິດໃຈ ແລະ ສະມາທິຂອງຜູ້ຖ່າຍເຊວຟີຈະຈັບຢູ່ໜ້າຈໍ ນີ້ລະຄືຈຸດທີ່ຈະຕ້ອງໄດ້ລະວັງ ເພາະອາດຖອຍໄປຕົກເຫວ ຕຳຕໍ ຫຼື ເປັນເປົ້າໃຫ້ລົດຕຳ ຊຶ່ງກໍມີຕົວຢ່າງມາແລ້ວ ເຊັ່ນຢູ່:
ອິນໂດເນເຊຍ: ມີຂ່າວຮ້າຍທີ່ເກີດຂຶ້ນປະມານ 4 ປີຜ່ານມາ ຢູ່ແຄມຝັ່ງທະເລທີ່ເກາະຈາວາ ຕາເວັນອອກຂອງອິນໂດເນເຊຍ ເມື່ອຊາຍອາຍຸ 25 ປີ ເທົ່າກັນ 2 ຄົນ ຊື່ທ້າວ ອາຣິສ ແລະ ອີມາມ (Aris Imam) ຖືກຟອງນ້ຳທະເລໃຫຍ່ໆອູ້ມເອົາທັງສອງຫາຍຕົວໄປ ໃນຂະນະທີ່ເມົານຳການຖ່າຍ-ເຊວຟີ ຈົນລືມສັງເກດຟອງນ້ຳທີ່ພວມຍວກຍູ້ຂຶ້ນມາ ດີແຕ່ວ່າໜ່ວຍກູ້ໄພສຸກເສີນຮູ້ທັນຈຶ່ງໄດ້ສົ່ງຜູ້ກູ້ໄພຈຳນວນ 30 ຄົນ ຕິດຕາມຊອກຄົ້ນຫາ ຂ່າວບອກວ່າ ທ້າວ ໂຈໂກ ແລະ ວາຮູດີ ທີ່ຖືກຟອງນ້ຳພັດໄປພ້ອມກັນນັ້ນ ສາມາດລອຍເຂົ້າຝັ່ງໄດ້ ຍັງເຫຼືອແຕ່ 2 ຄົນທີ່ເຄາະຮ້າຍ ການຊອກຄົ້ນດຳເນີນໄປຮອດຄ່ຳມືດ ຈຶ່ງພົບທ້າວ ອາຣິສ ແລະ ອີມາມ ທີ່ຖືກພັດໄປຄ້າງຢູ່ຮີມຝັ່ງ ໃນອາການອ່ອນແອດແລດ ທັງສອງຖືກນຳສົ່ງໂຮງໝໍຢ່າງຮີບດ່ວນ.
ທີ່ອິນເດຍ: ໜັງສືພິມ The Nation ສະບັບວັນທີ 7 ພຶດສະພາ 2016 ໄດ້ເລົ່າເລື່ອງເຫດຮ້າຍຫຼາຍເລື່ອງທີ່ເກີດຂຶ້ນຢູ່ອິນເດຍ ຍ້ອນການຖ່າຍຮູບແບບເຊວຟີທີ່ຂາດສະຕິ ເລື່ອງທີໜຶ່ງເລົ່າວ່າ ເດັກໄວລຸ້ນອາຍຸ 15 ປີ ຄົນໜຶ່ງບໍ່ຮູ້ຄິດແນວໃດຈຶ່ງປົດເອົາປືນສັ້ນຂອງຜູ້ເປັນພໍ່ ແລ້ວມາເຍີງຖ່າຍແບບເຊວຟີເອົາຕົນເອງ ປືນລັ່ນໂປ້ງ! ຖືກຫົວຜູ້ກ່ຽວຈົນຖືກສົ່ງເຂົ້າໂຮງໝໍດ່ວນ ໃນເດືອນກຸມພາ 2016 ກໍມີຂ່າວວ່າ ເດັກໄວລຸ້ນຄົນໜຶ່ງຖືກລົດໄຟຢຽບຕາຍຢູ່ເມືອງເຈັນໄນ (Chennai) ທາງພາກໃຕ້ຂອງອິນເດຍ ໃນຂະນະຖ່າຍເຊວຟີ ເພື່ອໃຫ້ເຫັນພາບລົດໄຟທີ່ພວມແລ່ນມາທາງດ້ານຫຼັງ ຍ້ອນຢາກໃຫ້ໄດ້ຮູບຕົນກັບພາບລົດໄຟແຈ້ງໆມໍ່ໆ ໃນທີ່ສຸດກໍເລີຍຫຼົບບໍ່ທັນ ໃນເດືອນມັງກອນ ປີ 2016 ດຽວກັນນັ້ນ ຊາຍຄົນໜຶ່ງໄດ້ຈົມນ້ຳຕາຍ ໃນຂະນະລອຍໄປຊ່ວຍຊີວິດເດັກຍິງຄົນໜຶ່ງທີ່ຖືກນ້ຳທະເລພັດ ຍ້ອນເອົາທ່າເພື່ອຖ່າຍເຊວຟີ ເຫດຮ້າຍໃນຄັ້ງນັ້ນ ໄດ້ນຳໄປສູ່ມາດຕະການຄວບຄຸມໂດຍເຈົ້າໜ້າທີ່ຕຳຫຼວດ ເພື່ອສະກັດກັ້ນການຖ່າຍເຊວຟີທີ່ມີຄວາມສ່ຽງຢູ່ນະຄອນມຸມບາຍ ບ່ອນເກີດເຫດ ໃນເດືອນເມສາ 2016 ເຊັ່ນດຽວ ຊາຍຄົນໜຶ່ງໄດ້ຖືກຊ້າງຖີບຈົນບາດເຈັບສາຫັດ ຍ້ອນຖ່າຍເຊວຟີກັບຊ້າງໂຕດັ່ງກ່າວ ເຫດການທີ່ເລົ່າມານີ້ ຄວນເປັນອຸທາຫອນສອນໃຫ້ຄົນເຮົາມີສະຕິເວລາຖ່າຍເຊວຟີ ເພາະຖ້າຂາດສະຕິແລ້ວ ເຊວຟີອາດເຮັດໃຫ້ຕົນເອງກາຍເປັນຜີກໍໄດ້.