ຄໍລຳປະຈຳວັນນີ້ ຂໍສະເໜີຂ່າວກ່ຽວກັບການລົງໂທດຜູ້ລະເມີດກົດຈະລາຈອນຢູ່ສິງກະໂປ ແລະ ການປາບປາມກຸ່ມແກ້ງຂີ່ລົດກວນເມືອງຢູ່ມາເລເຊຍ.
ທີ່ສິງກະໂປ: ການລະເມີດກົດຈະລາຈອນຂອງຜູ້ຂັບຂີ່ໃນປະເທດສິງກະໂປນັ້ນ ມີໂທດໜັກໜ່ວງທີ່ສຸດທຽບກັບຫຼາຍປະເທດ ດັ່ງມີລາຍລະອຽດໃນຂ່າວຕ່າງປະເທດ ໃນຕົ້ນເດືອນກໍລະກົດ ປີ 2019 ທີ່ບອກວ່າ: ໃນວັນທີ 8 ເດືອນກໍລະກົດ 2019 ສະພາແຫ່ງຊາດ ສິງກະໂປ ໄດ້ຮັບຮອງເອົາກົດໝາຍວ່າດ້ວຍການຄົມມະນາຄົມສະບັບປັບປຸງ ໂດຍໄດ້ປັບຂຶ້ນໂທດຈຳຄຸກ ແລະ ໂທດປັບໃໝຜູ້ລະເມີດກົດຈະລາຈອນໃຫ້ສູງກວ່າເກົ່າ ເມື່ອທຽບກັບກົດໝາຍສະບັບເກົ່າ ກົດໝາຍສະບັບປັບປຸງໄດ້ກຳນົດວ່າ ຜູ້ຂັບຂີ່ຜິດກົດຈະລາຈອນທີ່ເຮັດໃຫ້ມີຜູ້ເສຍຊີວິດຄັ້ງທຳອິດຈະຖືກຈຳຄຸກສູງສຸດ 8 ປີ ທຽບກັບ 3 ປີໃນກົດໝາຍອາຍາສະບັບເກົ່າ ນອກນັ້ນ ຜູ້ກະທຳຜິດຍັງຈະຖືກຢຶດໃບຂັບຂີ່ເປັນເວລາ 10 ປີ ໃນກໍລະນີຜູ້ກ່ຽວເຮັດຜິດເປັນຄັ້ງທີ 2 ໂທດຈຳຄຸກສູງສຸດກໍຈະຖີບຂຶ້ນເປັນ 15 ປີ ສ່ວນກົດໝາຍສະບັບເກົ່ານັ້ນ ແມ່ນ 5 ປີ.
ນອກຈາກການປັບປຸງກົດໝາຍວ່າດ້ວຍການຄົມມະນາຄົມແລ້ວ ກ່ອນໜ້ານັ້ນຄືໃນວັນທີ 9 ເດືອນກັນຍາ ປີ 2014 ທາງການສິງກະໂປ ຍັງໄດ້ປັບປຸງກົດໝາຍວ່າດ້ວຍການຈະລາຈອນທາງບົກ ຊຶ່ງໄດ້ວາງລະບຽບເຄັ່ງຄັດກ່ຽວກັບການໃຊ້ໂທລະສັບມືຖື ລະຫວ່າງຂັບລົດ ລວມທັງການຫຼິ້ນເກມອິນເຕີເນັດ ແລະ ການເປີດເບິ່ງອີເມວ ໃນໜ້າຈໍເຄື່ອງມືເອເລັກໂຕຣນິກແບບຕິດຕົວ ກົດໝາຍໄດ້ກຳນົດໃຫ້ການກະທຳດັ່ງກ່າວເປັນສິ່ງຜິດກົດໝາຍ ຖ້າຈັບໄດ້ວ່າຜູ້ຂັບລົດໃຊ້ມືເບື້ອງດຽວບັນຊາລົດ ສ່ວນມືອີກເບື້ອງໜຶ່ງຈັບໂທລະສັບ ຫຼື ເຄື່ອງມືສື່ສານເອເລັກໂຕຣນິກ ນອກຈາກນັ້ນ ທາງການສິງກະໂປ ໄດ້ທົບທວນຄືນການນຳໃຊ້ໃບອະນຸຍາດຂັບຂີ່ຕ່າງປະເທດ ໂດຍເລີ່ມແຕ່ປີ 2016 ເປັນຕົ້ນມາ ຜູ້ມີໃບອະນຸຍາດຂັບຂີ່ຕ່າງປະເທດ ສາມາດນຳໃຊ້ໃບຂັບຂີ່ດັ່ງກ່າວເປັນເວລາ 6 ເດືອນ ນັບແຕ່ໄດ້ຮັບອະນຸຍາດໃຫ້ເຮັດວຽກຢູ່ສິງກະໂປ (ໄລຍະເວລາອະນຸຍາດໃນເມື່ອກ່ອນນັ້ນແມ່ນ 12 ເດືອນ) ສ່ວນຜູ້ທີ່ຕ້ອງການປ່ຽນໃບອະນຸຍາດຂັບຂີ່ຕ່າງປະເທດ ມາເປັນໃບຂັບຂີ່ປະເພດ 3 ຂອງສິງກະໂປ (ສຳລັບໃບອະນຸຍາດຂັບຂີ່ລົດຕູ້ ຫຼື ລົດໂດຍສານ) ນັ້ນ ຕ້ອງໄດ້ຜ່ານການທົດສອບຄວາມສາມາດໃນການຂັບຂີ່ຕົວຈິງ ແນໃສ່ຮັບປະກັນການປະຕິບັດກົດຈະລາຈອນຂອງສິງກະໂປຢ່າງເຄັ່ງຄັດ.
ທີ່ມາເລເຊຍ: ເຊັ່ນດຽວກັບຫຼາຍປະເທດໃນອາຊຽນ ກໍຄືຢູ່ໃນໂລກ ມາເລເຊຍໄດ້ປະເຊີນກັບບັນຫາກຸ່ມແກ້ງນັກເລງຂີ່ລົດກວນເມືອງ ສ້າງຄວາມສັບສົນວຸ້ນວາຍແກ່ສັງຄົມ ທັງເປັນການລະເມີດກົດຈະລາຈອນ ຂ່າວໃນທ້າຍເດືອນພຶດສະພາ ປີ 2020 ນີ້ໃຫ້ຮູ້ວ່າ: ໃນເວລາທ່ຽງຄືນ ແລະ ເວລາ 6 ໂມງເຊົ້າຂອງວັນທີ 24 ເດືອນພຶດສະພາ 2020 ເຈົ້າໜ້າທີ່ຕຳຫຼວດມາເລເຊຍ ໄດ້ຈັບກຸມພວກແກ້ງຂີ່ລົດກວນເມືອງທີ່ເມືອງກຼວງ (Kluang) ມາເລເຊຍ ໄດ້ຈຳນວນທັງໝົດ 91 ຄົນ ເຈົ້າໜ້າທີ່ຕຳຫຼວດ 5 ຄົນ ບວກກັບພະນັກງານກ່ຽວຂ້ອງອີກ 26 ຄົນ ໄດ້ປິດຕັນບັນດາເສັ້ນທາງອ້ອມແອ້ມສະໜາມກີລາເມືອງກຼວງ ເວລາປະຕິບັດງານຢູ່ນັ້ນ ເຈົ້າໜ້າທີ່ໄດ້ພົບກັບກຸ່ມຄົນທີ່ຈຸ້ມກັນຊົມການແຂ່ງລົດແບບອັນຕະລາຍໂສຕາຍ ພໍມາບເຫັນເຈົ້າໜ້າທີ່ຕຳຫຼວດ ພວກແກ້ງກວນເມືອງ ແລະ ຂາເຊຍກໍແຕກສະລຸຜຸພ່າຍ ລົດຈັກຈຳນວນ 10 ກວ່າຄັນແລ່ນຕຳສິ່ງກີດຂວາງ ເຮັດໃຫ້ເຈົ້າໜ້າທີ່ຕຳຫຼວດທີ່ຢືນຍາມບາດເຈັບ 1 ຄົນ ແຕ່ໃນທີ່ສຸດເຈົ້າໜ້າທີ່ກໍສາມາດຈັບກຸມພວກກໍ່ຄວາມບໍ່ສະຫງົບໄດ້ 91 ຄົນ ໃນນັ້ນ ມີແມ່ຍິງ 1 ຄົນ ຢຶດລົດໃຫຍ່ໄດ້ 6 ຄັນ ລົດຈັກໄດ້ 74 ຄັນ ພວກກະທຳຜິດຖືກຕັດສິນດ້ວຍກົດໝາຍອາຍາ ໝວດ 353 ແລະ 269 ກົດໝາຍຂົນສົ່ງທາງບົກ ໝວດ 42 ແລະ ກົດລະບຽບຂໍ້ 7 (1) ວ່າດ້ວຍການຄວບຄຸມພະຍາດຕິດແປດ ເພາະເປັນໄລຍະພະຍາດໂຄວິດ-19 ພວມລະບາດໜັກໃນທົ່ວໂລກ.