ລັດວິສາຫະກິດນ້ຳປະປາ ນະຄອນຫຼວງວຽງຈັນ ຮ່ວມກັບໂຄງການ MaWaSU II ຈັດກິດຈະກຳຫ້ອງຮຽນນ້ຳປະປາ ເພື່ອຊຸມຊົນ ຂຶ້ນວັນທີ 13 ສິງຫາ ຜ່ານມາ ຢູ່ວັດສີສະຫວາດ ບ້ານເວີນຄຳ ເມືອງໄຊທານີ ນະຄອນຫຼວງວຽງຈັນ ໂດຍມີທ່ານ ເທບພະໄທ ລາດຊະວົງ ຫົວໜ້າສາຂານ້ຳປະປາເມືອງໄຊທານີ ພ້ອມດ້ວຍພະນັກງານວິຊາການລັດວິສາຫະກິດນ້ຳປະປາ ເລຂາພັກບ້ານ ນາຍບ້ານ ແລະ ປະຊາຊົນ ເຂົ້າຮ່ວມ.
ເພື່ອລະດົມໃຫ້ປະຊາຊົນບ້ານເວີນຄຳ ຫັນມານຳໃຊ້ນ້ຳປະປາຫຼາຍຂຶ້ນ ແລະ ມີຄວາມຮັບຮູ້-ເຂົ້າໃຈກ່ຽວກັບຄວາມ ໝາຍ-ຄວາມສຳຄັນຂອງວຽກງານນ້ຳປະປາ ນ້ຳຕາມທຳມະຊາດມີຢ່າງຫຼວງຫຼາຍ ນ້ຳຄືຊີວິດມັນມີຄວາມໝາຍສຳຄັນ ບໍ່ພຽງແຕ່ໃຫ້ຄຸນປະໂຫຍດຕໍ່ການບໍລິໂພກ ແລະ ອຸປະໂພກຂອງຄົນເທົ່ານັ້ນ ນ້ຳເປັນສິ່ງຈຳເປັນໃນຊີວິດປະຈຳວັນ ເປັນຕົ້ນ ນຳໃຊ້ເພື່ອດື່ມ ແຕ່ງກິນ ຊັກລ້າງ ນໍາໃຊ້ສຳລັບການປູກຝັງ-ລ້ຽງສັດ ຫຼື ເຮັດເປັນສິນຄ້າກ່ຽວກັບນ້ຳ ເຊິ່ງລ້ວນແຕ່ເປັນປະໂຫຍດອັນມະຫາສານແກ່ພວກເຮົາ.
ເມື່ອກ່ອນຍັງບໍລິສຸດເປັນສ່ວນໃຫຍ່ ເຊື້ອພະຍາດຈາກທຳມະຊາດ ແລະ ສານພິດອື່ນໆເຈືອປົນໃນແຫຼ່ງນ້ຳຍັງບໍ່ຫຼາຍ ການດື່ມ ແລະ ໃຊ້ແຫຼ່ງນ້ຳເຫຼົ່ານີ້ໂດຍກົງອາດຈະບໍ່ກໍ່ເກີດເປັນອັນຕະລາຍທັນທີທັນໃດ ແຕ່ປັດຈຸບັນປະເທດຊາດໄດ້ຮັບການພັດທະນາ ຕົວເມືອງ ແລະ ຊົນນະບົດ ການປູກຝັງ ເພື່ອການຄ້າຢາກໃຫ້ໄດ້ຜົນຜະລິດຫຼາຍຂຶ້ນ ກໍຕ້ອງໄດ້ນຳໃຊ້ຢາຂ້າແມງໄມ້ ປຸຍເຄມີ ແລະ ອື່ນໆ ສານເຫຼົ່ານີ້ລ້ວນແຕ່ເປັນພິດຕົກຄ້າງຕາມດິນ ຕາມຜັກ ຕາມຫຍ້າ ພ້ອມທັງຖືກນ້ຳຝົນເຮັດໃຫ້ຊຶມລົງໃຕ້ດິນຫານ້ຳສ້າງ ນ້ຳບາດານ ຊະລ້າງລົງຫ້ວຍຮ່ອງຄອງບຶງ ລົງແມ່ນ້ຳນ້ອຍ-ໃຫຍ່ ເຖິງແມ່ນວ່າຈະໃຊ້ນ້ຳທຳມະຊາດມາລ້າງກໍຕາມກໍຍັງມີເຊື້ອພະຍາດ ແລະ ສານເຄມີເຈືອປົນຕິດຢູ່ ໂດຍທີ່ຄົນເຮົາບໍ່ສາມາດເບິ່ງດ້ວຍຕາເປົ່າໄດ້ ສະນັ້ນ ທຸກຄົນຄວນຈະຫັນມານຳໃຊ້ນ້ຳປະປາເພື່ອສຸຂະພາບທີ່ດີ ເພາະນ້ຳປະປາແມ່ນນ້ຳທີ່ສະອາດ ປອດໄພ ແລະ ຜ່ານການຜະລິດທີ່ໃຊ້ເຄື່ອງມືອັນທັນສະໄໝ ມາທຳລາຍເຊື້ອພະຍາດ ແລະ ສານພິດເຫຼົ່ານີ້ລົງໄດ້.
ໂອກາດນີ້ ຍັງໄດ້ມອບອຸປະກອນເຄື່ອງກີລາ ແລະ ນ້ຳດື່ມ ໃຫ້ອຳນາດການປົກຄອງບ້ານດັ່ງກ່າວ ຕື່ມອີກ.