ເພື່ອເປັນການຕິດຕາມສະພາບການດຳເນີນທຸລະກິດ ແລະ ສົ່ງເສີມຜູ້ປະກອບການ ທີ່ໄດ້ຮັບສິນເຊື່ອບ້ວງເງິນສົ່ງເສີມທຸລະກິດຂະໜາດນ້ອຍ ແລະ ກາງ (SME) ຜ່ານທະນາຄານພັດທະນາລາວ ວັນທີ 14 ສິງຫາ 2020 ທ່ານ ນາງ ລັດທະນາ ດວງບຸບຜາ ຮອງຫົວໜ້າກົມສົ່ງເສີມ SME ຜູ້ອຳນວຍການກອງທຶນສົ່ງເສີມ SME ແລະ ທີມງານ ໄດ້ລົງຕິດຕາມບໍລິສັດ ບີເຄເອັນ ຈຳກັດ ຢູ່ບ້ານສະພັງຄະນົງ ເມືອງໄຊທານີ ນະຄອນຫຼວງວຽງຈັນ.
ບໍລິສັດດັ່ງກ່າວ ເປັນບໍລິສັດຜະລິດຖ່ານຂາວສົ່ງອອກປະເທດຍີ່ປຸ່ນ ໂດຍນຳໃຊ້ໄມ້ຕິ້ວທີ່ສົ່ງເສີມປະຊາຊົນປູກເປັນວັດຖຸດິບໃນການຜະລິດ ບໍລິສັດໄດ້ເຊັນສັນຍານຳປະຊາຊົນໃນຮູບແບບ 2 ບວກ 3 ເພື່ອສະໜອງໃຫ້ບໍລິສັດ ເຊິ່ງປະຊາຊົນປະກອບສ່ວນເນື້ອທີ່ດິນ ແລະ ແຮງງານ ບໍລິສັດເປັນຜູ້ສະໜອງເບ້ຍໄມ້ ແນະນຳດ້ານເຕັກນິກວິຊາການ ແລະ ເກັບຊື້ຈາກປະຊາຊົນ ມາຮອດປັດຈຸບັນ ບໍລິສັດມີເນື້ອທີ່ການປູກໄມ້ຕິ້ວຕາມສັນຍາທັງໝົດ 1.559 ເຮັກຕາ ແລະ ມີເຕົາເຜົາຖ່ານຫຼາຍກວ່າ 50 ເຕົາ ມີພະນັກງານສະເລ່ຍແຕ່ລະປີ 90 ຄົນ ບໍລິສັດ ບີເຄເອັນ ຈຳກັດ ໄດ້ຮັບສິນເຊື່ອຈາກທະນາຄານພັດທະນາລາວມູນຄ່າ 1,6 ຕື້ກີບ ເພື່ອນຳໃຊ້ເປັນທຶນຄົງທີ່ໃນການກໍ່ສ້າງສາງເກັບສິນຄ້າ 2 ຫຼັງ ຫໍພັກກຳມະກອນ 1 ຫຼັງ ແລະ ນຳໃຊ້ເປັນທຶນໝູນວຽນໃນການຊື້ເບ້ຍໄມ້ໃຫ້ປະຊາຊົນປູກຈຳນວນໜຶ່ງ ນອກນີ້ ກໍມີແຜນການຂະຫຍາຍເຕົາເຜົາຖ່ານຕື່ມອີກ 10 ເຕົາ ຢູ່ເມືອງທ່າພະບາດ ແຂວງບໍລິຄຳໄຊ.
ໃນການລົງຕິດຕາມຄັ້ງນີ້ ທ່ານ ນາງ ລັດທະນາ ດວງບຸບຜາ ກ່າວວ່າ: ການລົງຕິດຕາມຫົວໜ່ວຍທຸລະກິດຄັ້ງນີ້ ເພື່ອຕິດຕາມ ແລະ ຮັບປະກັນວ່າຜູ້ປະກອບການທີ່ໄດ້ຮັບສິນເຊື່ອຈາກ ທສວ ໄດ້ນຳໃຊ້ເງິນກູ້ຖືກຕ້ອງຕາມເປົ້າໝາຍ ເຮັດແທ້ທຳຈິງ ບໍ່ແມ່ນເພື່ອເປັນຮູບການເທົ່ານັ້ນ ທັງເປັນການລົງເກັບກຳຂໍ້ມູນກ່ຽວກັບຂໍ້ສະດວກ ແລະ ຂໍ້ຫຍຸ້ງຍາກທີ່ຜູ້ປະກອບການໄດ້ປະສົບພົບພໍ້ ເພື່ອຈະນຳໄປຄົ້ນຄວ້າຫາແນວທາງຊ່ວຍເຫຼືອຜູ້ປະກອບການ ພ້ອມນີ້ ເປັນການສົ່ງເສີມຄວາມເຂົ້າໃຈຂອງຜູ້ປະກອບການ ຕໍ່ກັບພາລະບົດບາດຂອງ ທສວ ແລະ ບັນດາໂຄງການ ແຜນງານຕ່າງໆຂອງ ທສວ ເພື້ອຊ່ວຍສົ່ງເສີມ SME ເປັນຕົ້ນ ນອກຈາກການສະໜອງສິນເຊື່ອເພື່ອສົ່ງເສີມ ແລະ ຂະຫຍາຍທຸລະກິດແລ້ວ ທສວ ຍັງມີເງິນທຶນສົ່ງເສີມດ້ານວິຊາການຈຳນວນໜຶ່ງເພື່ອສ້າງຄວາມເຂັ້ງແຂງໃຫ້ SME.