ທ່ານ ຄຳແສນ ສີສະວົງ ປະທານກຸ່ມການສຶກສາແສງສະຫວັນ ທັງເປັນຫົວໜ້າສະຖາບັນທຸລະກິດ ແສງສະຫວັນ ກ່າວໃນພິທີໄຂການນຳໃຊ້ສະຖາບັນທຸລະກິດແສງສະຫວັນແຫ່ງໃໝ່ ແລະ ເປັນແຫ່ງທຳອິດໃນ ສປປ ລາວ ເພື່ອສ້າງຂະບວນການສະເຫຼີມສະຫຼອງການສ້າງຕັ້ງກຸ່ມການສຶກສາ ແສງສະຫວັນ ຄົບຮອບ 22 ປີ ໄດ້ມີຂຶ້ນໃນວັນທີ 18 ສິງຫາ 2020 ຢູ່ວິທະຍາເຂດ (ຫຼັກ 21) ເມືອງໄຊທານີ ນະຄອນຫວງວຽງຈັນ (ນວ) ວ່າ: ກຸ່ມການສຶກສາ ແສງສະຫວັນໄດ້ສ້າງຕັ້ງຂຶ້ນໃນວັນທີ 18 ສິງຫາ 1998 ໂດຍໄດ້ຮັບອະນຸຍາດຈາກກະຊວງ ສສກ ໃຫ້ສ້າງຕັ້ງເປັນສູນພາສາຕ່າງປະເທດ ຮອດປີ 2000 ກໍໄດ້ພັດທະນາຍົກຖານະເປັນວິທະຍາໄລບໍລິຫານທຸລະກິດ ແສງສະຫວັນ ໄດ້ສິດສອນລະດັບຊັ້ນສູງ ປະລິນຍາຕີ ປະລິນຍາໂທ ສອນຫຼັກສູດບໍລິຫານທຸລະກິດ ແລະ ຫຼັກສູດພາສາອັງກິດ ໃນປີ 2003 ກໍໄດ້ສ້າງຕັ້ງໂຮງຮຽນສາມັນສຶກສາ ຕັ້ງແຕ່ຊັ້ນອະນຸບານ ຈົນເຖິງມັດທະຍົມຕອນປາຍອີກ ລວມມີ 5 ແຫ່ງຄື: ປະຖົມ-ມັດທະຍົມສົມບູນສອງພາສາ ແສງສະຫວັນ 1-4 ແລະ ໂຮງຮຽນນາໆຊາດອົດສະຕຣາລີ ທີ່ຕັ້ງຢູ່ 5 ຕົວເມືອງໃນ ນວ ເຊິ່ງແຕ່ລະແຫ່ງກໍໄດ້ມີການເຕີບໃຫຍ່ຂະຫຍາຍຕົວທັງປະລິມານ ແລະ ຄຸນນະພາບ ມັນສະແດງອອກເຖິງຈຳນວນນັກຮຽນມີການເພີ່ມຂຶ້ນແຕ່ລະປີ ລວມທັງນັກຮຽນ-ນັກສຶກສາທີ່ຮຽນຢູ່ໃນກຸ່ມຂອງແສງສະຫວັນມີ 4.250 ຄົນ ມີຄູ-ອາຈານ ພະນັກງານທັງໝົດ 207 ຄົນ ລະດັບປະລິນຍາເອກ 9 ທ່ານ ປະລິນຍາໂທ 60 ທ່ານ ປະລິນຍາຕີ 100 ທ່ານ ຊັ້ນສູງວິຊາຊີບ 35 ທ່ານ ເຊິ່ງໃນໄລຍະຜ່ານມາ ກໍໄດ້ຮ່ວມມືທາງດ້ານວິຊາການ ການຮຽນ-ການສອນ ການຄົ້ນຄວ້າວິໄຈ ການບໍລິຫານຄຸ້ມຄອງ ລວມໄປເຖິງການແລກປ່ຽນນັກຮຽນ-ນັກສຶກສາ ແລະ ສົ່ງນັກຮຽນໄປຮຽນເຝິກງານ ຮຽນງານ ໄປຮຽນຕໍ່ລະດັບປະລິນຍາໂທ ປະລິນຍາເອກ ກັບບັນດາມະຫາວິທະຍາໄລຢູ່ປະເທດພາກພື້ນ ແລະ ສາກົນ.
ຕະຫຼອດໄລຍະ 22 ປີຜ່ານມາ ກຸ່ມການສຶກສາແສງສະຫວັນ ເວົ້າລວມ ເວົ້າສະເພາະກໍແມ່ນວິທະຍາໄລບໍລິຫານທຸລະກິດ ແສງສະຫວັນ ໃນເມື່ອກ່ອນ ປັດຈຸບັນແມ່ນສະຖາບັນທຸລະກິດແສງສະຫວັນ ກໍໄດ້ມີຜົນສຳເລັດຫຼາຍດ້ານທີ່ສຳຄັນເຊັ່ນ: ໄດ້ສ້າງນັກຮຽນ-ນັກສຶກສາຈົບແຕ່ລະລະດັບ ແຕ່ລະປີ ໄດ້ຢ່າງຫຼວງຫຼາຍ ແລະ ແຕ່ລະຄົນທີ່ຈົບ ກໍໄດ້ມີວຽກເຮັດງານທຳ ມີໜ້າທີ່ຕຳແໜ່ງທີ່ສູງຢູ່ໃນອົງການພັກ-ລັດ ເອກະຊົນ ແລະ ຫຼາຍທ່ານໄດ້ສືບຕໍ່ສຶກສາຮ່ຳຮຽນໃນລະດັບປະລິນຍາຕີ ໂທ ເອກ ກັບມະຫາວິທະຍາໄລຕ່າງປະເທດ. ນອກຈາກນັ້ນ ສະຖາບັນທຸລະກິດແສງສະຫວັນ ກໍຍັງໄດ້ສຸມໃສ່ພັດທະນາໂຄງການຫຼັກສູດ ສົ່ງເສີມການຄົ້ນຄວ້າວິໄຈຫຼາຍຫົວຂໍ້ ທີ່ສາມາດເອົາໄປນຳໃຊ້ເຂົ້າໃນວຽກງານການພັດທະນາເສດຖະ ກິດ-ສັງຄົມ ຈົນມາຮອດມື້ນີ້ ສະຖາບັນພວກເຮົາຈຶ່ງໄດ້ຂະຫຍາຍວິທະຍາເຂດແຫ່ງໃໝ່ຂອງຕົນຂຶ້ນຢູ່ທີ່ ຫຼັກ 21 ນີ້ ແລະ ກໍມີຄວາມພ້ອມທີ່ຈະສິດສອນລະດັບປະລິນຍາຕີໃນ 5 ສາຂາວິຊາຄື: ປະລິນຍາຕີ ສາຂາບໍລິຫານທຸລະກິດ ປະລິນຍາຕີ ສາຂາຜູ້ປະກອບການ ປະລິນຍາຕີ ສາຂາພາສາອັງກິດ ປະລິນຍາຕີ ສາຂາ ວິສະວະກຳຊອບແວ ແລະ ປະລິນຍາຕີ ສາຂາການຄ້າເອເລັກໂຕຣນິກ (ຄອມພິວເຕີທຸລະກິດ).
