ກອງປະຊຸມໃຫຍ່ຄັ້ງທີ VIII ຜູ້ແທນແມ່ຍິງນະຄອນຫຼວງວຽງຈັນ (ນວ) ໄດ້ໄຂຂຶ້ນໃນວັນທີ 19 ສິງຫາ 2020 ທີ່ຫ້ອງວ່າການປົກຄອງນະຄອນຫຼວງວຽງຈັນ ເປັນປະທານຂອງສະຫາຍນາງ ບົວລອນ ວົງດາລາແສນ ຄະນະພັກ ປະທານສະຫະພັນແມ່ຍິງນະຄອນຫຼວງວຽງຈັນ ເປັນກຽດເຂົ້າຮ່ວມຂອງສະຫາຍນາງ ດຣ ນາງ ອິນລາວັນ ແກ້ວບຸນພັນ ກຳມະການສູນກາງພັກ ປະທານຄະນະບໍລິຫານງານສູນກາງສະຫະພັນແມ່ຍິງລາວ ສະຫາຍ ລາດຊະນີວົງ ອະມາຣາທິທາດາ ກຳມະການປະຈຳພັກ ປະທານຄະນະກວດກາພັກ ຫົວໜ້າພະແນກກວດກາລັດ ພ້ອມດ້ວຍຜູ້ແທນສົມບູນ ແລະ ແຂກທີ່ຖືກເຊີນເຂົ້າຮ່ວມ.
ສະຫາຍ ນາງ ບົວລອນ ວົງດາລາແສນ ໄດ້ກ່າວໄຂກອງປະຊຸມດັ່ງກ່າວວ່າ: ກອງປະຊຸມໃຫຍ່ໃນຄັ້ງນີ້ ສຸດທີ່ມີຄວາມໝາຍສຳຄັນຢ່າງໃຫຍ່ຫຼວງ ເຊິ່ງພວກເຮົາຈະໄດ້ສຸມໃສ່ຕີລາຄາການນຳພາຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VII ຜ່ານມາ ພ້ອມທັງສະຫຼຸບຖອດຖອນບົດຮຽນພຶດຕິກຳຕົວຈິງ ເພື່ອກຳນົດຈຸດໝາຍສູ້ຊົນ ທິດທາງໜ້າທີ່ໃນຕໍ່ໜ້າ ຜູ້ແທນສົມບູນຈະໄດ້ໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະບໍລິຫານງານສະຫະພັນແມ່ຍິງ ຄັ້ງທີ VIII ພິເສດ ກອງປະຊຸມໃຫຍ່ຍັງຈະໄດ້ເປັນກຽດຢ່າງສູງຮັບຟັງການໂອ້ລົມຂອງສະຫາຍ ລາດຊະນີວົງ ອະມາຣາທິທາດາ ແລະ ສະຫາຍ ດຣ ນາງ ອິນລາວັນ ແກ້ວບຸນພັນ ເຊິ່ງຈະກາຍເປັນແສງສະຫວ່າງຊີ້ທິດເຍືອງທາງໃຫ້ຄະນະບໍລິຫານງານຊຸດໃໝ່ ສະມາຊິກສະຫະພັນແມ່ຍິງ ເອື້ອຍນ້ອງແມ່ຍິງບັນດາເຜົ່າ ບືນຕົວກ້າວຂຶ້ນສືບຕໍ່ປົກປັກຮັກສາ ພັດທະນານະຄອນຫຼວງວຽງຈັນ ໃຫ້ຈະເລີນກ້າວໜ້າຢ່າງບໍ່ຢຸດຢັ້ງ.
