ຖືເປັນຄວາມພູມໃຈຂອງສື່ມວນຊົນລາວພວກເຮົາ ທີ່ທ່ານນາຍົກລັດຖະມົນຕີ ທອງລຸນ ສີສຸລິດ ຂະໜານນາມໃຫ້ສື່ມວນຊົນໃນໂອກາດທີ່ທ່ານເຂົ້າຮ່ວມ ແລະ ໂອ້ລົມໃນພິທີສະຫຼອງ 70 ປີ ວັນສ້າງຕັ້ງສື່ມວນຊົນ ແລະ ການພິມຈຳໜ່າຍ ໃນວັນທີ 14 ສິງຫາ 2020 ທີ່ຫໍວັດທະນະທຳແຫ່ງຊາດ ນະຄອນຫຼວງວຽງຈັນ ວ່າ: ຢາກຂໍຂະໜານນາມສື່ມວນຊົນໃຫ້ເປັນຜູ້ທີ່ປາກອອກແສງ ຮູ້ແທງເຖິງໃຈ ຜູ້ສະດຸ້ງໄວ ເມື່ອໄດ້ອ່ານ ຜູ້ກ້າຜ່ານອຸປະສັກ ຜູ້ທີ່ຮັກຄວາມຈິງ ຜູ້ທີ່ຍິງຖືກເປົ້າ…
ຜູ້ຂຽນຂໍອະນຸຍາດສັງລວມຄຳໂອ້ລົມເພິ່ນເອົາເອງດັ່ງນີ້:
ເພິ່ນສະເໜີຫຼາຍບັນຫາຕໍ່ສື່ມວນຊົນ ໃນບາງຕອນເພິ່ນກ່າວວ່າ ສື່ມວນຊົນປຽບເໝືອນຜູ້ໃຊ້ອາຫານດ້ານຂໍ້ມູນຂ່າວສານໃຫ້ແກ່ຜູ້ບໍລິໂພກ ສະນັ້ນ ການຫາຂ່າວຕ້ອງທັນການ ເນື່ອງຈາກປັດຈຸບັນ ມີສື່ອອນລາຍເຂົ້າມາເປັນສ່ວນໜຶ່ງໃນການສະໜອງຂໍ້ມູນຂ່າວສານ ສະນັ້ນ ຜູ້ທີ່ເປັນສື່ຕ້ອງບືນຕົວສະໜອງຂໍ້ມູນໃຫ້ຜູ້ບໍລິໂພກຂ່າວຖືກຄວາມຈິງ ໜ້າເຊື່ອຖື ບໍ່ແມ່ນຂ່າວປອມ ຂ່າວລວງ… ສື່ພວກເຮົາພວມປະເຊີນໜ້າກັບບັນຫາຕ່າງໆທີ່ເກີດຂຶ້ນໃນສັງຄົມເຊັ່ນ: ສັງຄົມດຽວນີ້ມີຫຼາຍໂຄງປະກອບ ສັງຄົມເປີດກວ້າງມີການສະແດງອອກຄຳເຫັນຕາມກົດໝາຍ ສັງຄົມເຮົາແມ່ນຍັງຕົກຢູ່ໃນສົງຄາມຫັນປ່ຽນໂດຍສັນຕິ ການປະຕິບັດສື່ສັງຄົມເປີດອອກ ສ້າງມູມມອງຂອງຄົນໄປໃນທາງແຕ່ຊິຄິດ ການເສບຜົນຜະລິດຂອງສື່ບໍ່ໄດ້ມີການກັ່ນຕອງ ນັ້ນແມ່ນໜ້າທີ່ໜັກໜ່ວງ ຖ້າເຮົາສູ້ໄດ້ສັງຄົມເຮົາຈະມີກຳລັງແຮງຕ້ານທານສິ່ງຫຍໍ້ທໍ້ ສື່ປະຕິວັດຕ້ອງປັບປຸງໂຕເອງຢູ່ເລື້ອຍໆ ເກືອບວ່າປັບທຸກມື້ ເຫັນກະແສຕ້ອງປັບວຽກນີ້ຕ້ອງຫັນປ່ຽນໃໝ່ ສ້າງມາດຕະຖານໃໝ່ ບໍ່ປະໃຫ້ເປັນໄປຕາມມີຕາມເກີດ ແຕ່ລະສຳນັກຕ້ອງໄດ້ສຳຫຼວດເບິ່ງຕົນເອງວ່າ ຄວາມນິຍົມຂອງສັງຄົມໃນການບໍລິໂພກຂ່າວເພີ່ມຂຶ້ນ ຫຼື ຫຼຸດລົງ ແລະ ສາເຫດຍ້ອນຫຍັງ…
ບໍ່ທໍ່ນັ້ນ ທ່ານຍັງກ່າວເຖິງສັງຄົມວິຖີຊີວິດໃໝ່ຫຼັງການແຜ່ລະບາດພະຍາດໂຄວິດ-19 (New Normal) ນັ້ນ ສື່ກໍຕ້ອງໄດ້ປັບຕົນເອງ ຫັນໄປສູ່ການກຸ້ມຕົນເອງ ປະຢັດຄົນ ປະຢັດເວລາ ເບິ່ງການໄກ ສື່ເປັນຜູ້ໂນ້ມນ້າວແນວຄິດຂອງຄົນໃນສັງຄົມ… ສື່ຕ້ອງປັບຕົວໃຫ້ດີຂຶ້ນ.
..ສະນັ້ນ ສື່ມວນຊົນພວກເຮົາຕ້ອງບຸກທະລຸ..
ໂດຍ: ທິດດີ