ນັບແຕ່ປີ 2015 ເປັນຕົ້ນມາ ກະຊວງສຶກສາທິການ ແລະ ກີລາ ໄດ້ຮັບການສະໜັບສະໜູນຈາກລັດຖະບານອົດສະຕຣາລີ ແລະ ສະຫະພາບເອີຣົບ ໂດຍຜ່ານແຜນງານການປັບປຸງຄຸນນະພາບ ແລະ ຂະຫຍາຍໂອກາດເຂົ້າຮຽນສຳລັບການສຶກສາຂັ້ນພື້ນຖານໃນ ສປປ ລາວ (ບີຄວາ) ໄດ້ເລີ່ມທົບທວນຄືນ ແລະ ພັດທະນາຫຼັກສູດສ້າງຄູປະຖົມ ເພື່ອນຳໄປເຝິກອົບຮົມໃຫ້ແກ່ນັກສຶກສາຄູຜູ້ທີ່ຈະເປັນຄູສອນຊັ້ນປະຖົມສຶກສາໃນອານາຄົດ ໃຫ້ຮູ້ກ່ຽວກັບວິທີການສອນໃນຫ້ອງຮຽນ ໂດຍນຳໃຊ້ຫຼັກສູດຊັ້ນປະຖົມສຶກສາສະບັບປັບປຸງໃໝ່.
ຫຼັກສູດສ້າງຄູປະຖົມ ແລະ ຫຼັກສູດຊັ້ນປະຖົມສຶກສາ ແມ່ນໄດ້ຮັບການທົບທວນພັດທະນາໄປພ້ອມໆກັນ ໂດຍເນັ້ນໃສ່ວິທີການສອນແບບມີສ່ວນຮ່ວມໃນຫ້ອງຮຽນ ແລະ ການສອນໂດຍເອົານັກຮຽນເປັນໃຈກາງ ເຊິ່ງການຈັດຕັ້ງປະຕິບັດການຮຽນ-ການສອນໄດ້ເລີ່ມມາຕັ້ງແຕ່ ເດືອນກັນຍາ 2019 ສຳລັບນັກສຶກສາຄູ ປີທີ 1 ໃນ 8 ວິທະຍາໄລຄູໃນທົ່ວປະເທດ ແລະ ຫຼັກສູດຊັ້ນປະຖົມສຶກສາ ສະບັບປັບປຸງໃໝ່ ສຳລັບຂັ້ນ ປ1 ແມ່ນໄດ້ດຳເນີນການຮຽນ-ການສອນໃນໂຮງຮຽນປະຖົມສຶກສາທຸກແຫ່ງໃນທົ່ວປະເທດເຊັ່ນກັນ ພ້ອມດຽວກັນນີ້ ທີມຊ່ຽວຊານຂຽນຫຼັກສູດ ໄດ້ເລີ່ມກະກຽມການຂຽນຫຼັກສູດສຳລັບປີຕໍ່ໄປອີກດ້ວຍ.
ໃນເດືອນກໍລະກົດ 2020 ຜ່ານມາ ນັກຂຽນຫຼັກສູດວິຊາພາສາອັງກິດຈຳນວນ 6 ທ່ານ ແລະ ນັກຂຽນຫຼັກສູດວິຊາພາສາລາວຈຳນວນ 9 ທ່ານ ໄດ້ເຂົ້າຮ່ວມກອງປະຊຸມ 5 ວັນ ເພື່ອອົບຮົມດ້ານວິຊາການຈາກຊ່ຽວຊານຈາກຕ່າງປະເທດ ແລະ ສູນພັດທະນາຄູ ໂດຍການເຝິກແບບຕົວຕໍ່ຕົວຜ່ານທາງອອນລາຍ ຈຸດປະສົງເພື່ອພັດທະນາ ສ້າງຄວາມເປັນເອກະພາບທາງດ້ານເນື້ອໃນຫຼັກສູດສ້າງຄູປະຖົມສຳລັບປີທີ 2 ໃນວິຊາພາສາລາວ ແລະ ວິຊາພາສາອັງກິດ ທັງສອງວິຊານີ້ ມີຄວາມທ້າທາຍເປັນພິເສດ ເນື່ອງຈາກມີຈຳນວນບົດຮຽນຫຼາຍ ນັກຂຽນຫຼັກສູດຕ້ອງພັດທະນາຮວບຮວມເນື້ອໃນທີ່ຫຼາກຫຼາຍ ແລະ ເຕັກນິກວິທີການສອນທີ່ແຕກຕ່າງກັນ ການປະຊຸມວິຊາການໃນຄັ້ງນີ້ ແມ່ນໄດ້ໃຫ້ການຊ່ວຍເຫຼືອໃນດ້ານຕ່າງໆທີ່ຈຳເປັນ ໃຫ້ແກ່ທີມນັກຂຽນຫຼັກສູດທັງສອງວິຊານີ້ ເພື່ອໃຫ້ພວກເຂົາເຈົ້າສາມາດນຳເອົາໄປພັດທະນາຫຼັກສູດໄດ້ຢ່າງມີຜົນສຳເລັດ.
ກອງປະຊຸມນີ້ ທີມນັກຂຽນຫຼັກສູດວິຊາພາສາລາວ ໄດ້ເຮັດວຽກໃນໂມດູນກ່ຽວກັບການຂຽນ ໂດຍສຸມໃສ່ຊອກຫາວິທີການສອນນັກຮຽນ ຊັ້ນປະຖົມສຶກສາທີ່ຈະຮຽນຮູ້ການຂຽນໄດ້ ແລະ ວິທີການສອນພວກເຂົາເຈົ້າໃນການຂຽນ ການຈັດເຝິກອົບຮົມຄັ້ງຕໍ່ໄປ ທີມນັກຂຽນຫຼັກສູດຈະໄດ້ຮັບຄຳແນະນຳກ່ຽວກັບວິທີການສອນວິຊາພາສາລາວໃຫ້ແກ່ເດັກຊົນເຜົ່າ ເປັນໂມດູນສຸດທ້າຍທີ່ທີມນັກຂຽນຈະຕ້ອງໄດ້ພັດທະນາ ພວກເຂົາເຈົ້າຈະໄດ້ຄິດວິເຄາະກ່ຽວກັບຍຸດທະວິທີສຳລັບຄູ-ນັກຮຽນໃນການຮຽນຮູ້ເອົາວິທີທີ່ດີສຸດ ສຳລັບການສອນວິຊາພາສາລາວ ໃຫ້ແກ່ນັກຮຽນຊັ້ນປະຖົມສຶກສາທີ່ມີພື້ນຖານທາງດ້ານພາສາແຕກຕ່າງກັນ.
ສຳລັບທີມນັກຂຽນ ວິຊາພາສາອັງກິດ ໄດ້ເຮັດວຽກເນັ້ນໜັກໃສ່ການອອກສຽງໂດຍໄດ້ນຳເອົາວິທີການສອນຕ່າງໆເຊື່ອມສານເຂົ້າໃນຫຼັກສູດຂອງເຂົາເຈົ້າ ໃນຫຼັກສູດພາສາອັງກິດສະບັບປັບປຸງໃໝ່ນີ້ ຈະມີການສອນອອກສຽງໃຫ້ນັກຮຽນຊັ້ນປະຖົມສຶກສາ ຂັ້ນ ປ3 – ປ5 ເພື່ອຊ່ວຍໃຫ້ເຂົາເຈົ້າພັດທະນາທັກສະການຮູ້ໜັງສືໃນພາສາອັງກິດ ການສອນວິທີການອອກສຽງພາສາອັງກິດ ເປັນວິທີການສອນແບບໃໝ່ສຳລັບຄູສອນວິຊານີ້ໃນ ສປປ ລາວດ້ວຍເຫດນີ້ ມັນຈຶ່ງຈຳເປັນທີ່ຈະຕ້ອງໄດ້ບັນຈຸຫຼັກສູດພາສາອັງກິດເຂົ້າໃນຫຼັກສູດສ້າງຄູປະຖົມດ້ວຍ.
ເພື່ອເປັນການປ້ອງກັນຕໍ່ກັບສະຖານະການການແຜ່ລະບາດຂອງພະຍາດ CovID19 ກະຊວງສຶກສາທິການ ແລະ ກີລາ ແລະ ແຜນງານບີຄວາ ໄດ້ນຳໃຊ້ວິທີການໃໝ່ໃນການຈັດກອງປະຊຸມໃນຄັ້ງນີ້ ໂດຍການນຳເອົາຮູບແບບການປະຊຸມອອນລາຍ ເຂົ້າມານຳໃຊ້ ຊ່ວຍໃຫ້ທີມງານທີ່ຢູ່ທາງໄກ ຫຼື ສະຖານທີ່ອື່ນໆສາມາດເຮັດວຽກຮ່ວມກັບຊ່ຽວຊານໄດ້ເປັນຢ່າງດີ ການເຝິກອົບຮົມຫຼັກສູດວິຊາພາສາລາວແມ່ນດຳເນີນການໂດຍຊ່ຽວ ຊານຕ່າງປະເທດດ້ານຫຼັກສູດສ້າງຄູທີ່ໂທທາງໄກຈາກປະເທດດູໄບໂດຍໃຊ້ການຊຸມ (zoom) ເຂົ້າຫາທີມນັກຂຽນ ໃນແຕ່ລະວັນ ແລະ ໃຫ້ການສະໜັບສະໜູນທີມນັກຂຽນເປັນກຸ່ມໃຫຍ່ໝົດຫ້ອງປະຊຸມ ຕາມດ້ວຍການປະຊຸມເປັນລາຍບຸກຄົນ ເພື່ອໃຫ້ຄຳແນະນຳທາງດ້ານເຕັກນິກກ່ຽວກັບການສອນ-ການຂຽນ ລວມທັງວິທີການສອນ ແລະ ແນວຄວາມຄິດບາງຢ່າງທີ່ສາມາດນຳເອົາມາໝູນໃຊ້ໃນບົດສອນໄດ້ອີກ.
ທີມນັກຂຽນຫຼັກສູດແມ່ນມີ 2 ໜ້າທີ່ຫຼັກ ໃນລະຫວ່າງກອງປະຊຸມເຝິກອົບຮົມນີ້ ອັນທີ່ໜຶ່ງແມ່ນຮຽນຮູ້ກ່ຽວກັບວິທີການສອນແບບໃໝ່ ແລະ ໃນຂະນະດຽວກັນກໍຕ້ອງພັດທະນາວິທີການສອນເຫຼົ່ານັ້ນເຂົ້າໃນຫຼັກສູດສ້າງຄູປະຖົມ ສິ່ງນີ້ເປັນສິ່ງທີ່ທ້າທາຍຫຼາຍ ແຕ່ວ່າທີມນັກຂຽນຫຼັກສູດທຸກໆຄົນ ແມ່ນມີແຮງຈູງໃຈເຮັດວຽກຢ່າງຕັ້ງໜ້າ ໃນການພັດທະນາຫຼັກສູດ ເພື່ອຮັບປະກັນວ່າ ການສຶກສາໃນລະດັບຊັ້ນປະຖົມສຶກສາ ມີຄຸນນະພາບທີ່ດີຂຶ້ນ.
ນຳສະເໜີໂດຍ: ແວ່ນຂາວ