ເມື່ອກ້າວສູ່ລະດູຝົນ ກໍຄື ເປັນລະດູການທີ່ຊຸ່ມເຢັນ ແນ່ນອນວ່າ ທຸກໆພາກ ທຸກໆທ້ອງຖິ່ນ ກໍຈະປຽກຊຸ່ມໄປພ້ອມໆກັນ ເຊິ່ງເປັນເງື່ອນໄຂອັນດີໃນການຜະລິດລະດູຝົນ ແຕ່ໃນໄລຍະນີ້ກໍຈະຫຼີກລ່ຽງບໍ່ໄດ້ບັນຫາທີ່ຈະຕາມມາ ເຊິ່ງໃນນັ້ນກໍມີການເປ່ເພຂອງຖະໜົນຢູ່ຈຸດຕ່າງໆທັງໃນ ແລະ ນອກເທສະບານ.
ສຳລັບໃນນະຄອນຫຼວງວຽງຈັນ ກໍມີຖະໜົນຫຼາຍຈຸດທີ່ເປ່ເພ ແລະ ຕົກເປັນຫາງສຽງໃນສື່ສັງຄົມອອນລາຍມາແລ້ວ ເຊັ່ນ: ສະພາບເສັ້ນທາງເປ່ເພແຕ່ ຕານມີໄຊ-ນາທົ່ມ-ວຽງແກ້ວ ຫາສີ່ແຍກໄຟອຳນາດ ບ້ານໂນນສະອາດ (ເສັ້ນທາງເລກ 10) ເມືອງໄຊທານີ ນະຄອນຫຼວງວຽງຈັນ ມີຄວາມຍາວທັງໝົດ 10,7 ກີໂລແມັດ ໃນໄລຍະລະດູຝົນ ເຫັນວ່າເສັ້ນທາງເປັນບວກ ເປັນຂຸມ ທາງມື່ນ ເຮັດໃຫ້ການສັນຈອນໄປ-ມາມີຄວາມລຳບາກ ຈາກສະພາບການທີ່ເກີດຂຶ້ນ ຫ້ອງການ ຍທຂ ເມືອງໄຊທານີ ໄດ້ມີການປະສານສົມທົບກັບຄະນະວິຊາການ ພະແນກ ຍທຂ ນວ ແລະ ກຳລັງກະກຽມສ້ອມແປງ ເພື່ອແກ້ໄຂສຸກເສີນຕໍ່ກັບຫາງສຽງຂອງສັງຄົມ ທີ່ລົງໃນສື່ອອນລາຍໃນໄລຍະລະດູຝົນ.
ໃນໂອກາດທີ່ທ່ານເຈົ້າຄອງນະຄອນຫຼວງວຽງຈັນ ສິນລະວົງ ຄຸດໄພທູນ ໄດ້ລົງຕິດຕາມສະພາບເສັ້ນທາງດັ່ງກ່າວ ໃນວັນທີ 17 ສິງຫາຜ່ານມາ ໂດຍທ່ານໄດ້ໃຫ້ທິດຊີ້ນຳຕໍ່ພາກສ່ວນກ່ຽວຂ້ອງ ແລະ ອຳນາດປົກຄອງບ້ານ ໃນການສືບຕໍ່ແກ້ໄຂສະພາບເສັ້ນທາງດັ່ງກ່າວ ເປັນຕົ້ນ ການເອົາໃຈໃສ່ເປັນເຈົ້າການປຸກລະດົມປະຊາຊົນ ແກ້ໄຂສະພາບດັ່ງກ່າວຢ່າງຮີບດ່ວນມອບໃຫ້ພະແນກ ຍທຂ ນວ ປະສານສົມທົບກັນກັບເມືອງໄຊທານີ ປັບປຸງຍົກລະດັບເສັ້ນທາງດັ່ງກ່າວໃຫ້ມີສະພາບດີ ໂດຍສຸມໃສ່ຈັດຕັ້ງປະຕິບັດໃນ 3 ໄລຍະ ຄື: ໄລຍະລະດູຝົນແກ້ໄຂຊົ່ວຄາວ ໄລຍະລະດູແລ້ງ ແລະ ໄລຍະຍາວນານ ສະເພາະໃນໄລຍະລະດູຝົນນີ້ໃຫ້ແກ້ໄຂເບື້ອງຕົ້ນ ໂດຍການຂຸດຮ່ອງລະບາຍນ້ຳອອກຈຸດທີ່ມີນ້ຳຖ້ວມຂັງ ແລະ ນຳໃຊ້ດິນຫີນຖົມຈຸດທີ່ເປັນບວກຂຸມ ໂດຍດຳເນີນຕາມເຕັກນິກຕ່າງໆໃຫ້ສຳເລັດ ສ່ວນງົບປະມານນຳໃຊ້ເຂົ້າໃນການປັບປຸງເສັ້ນທາງທ່ານເຈົ້າຄອງ ເຫັນດີໃຫ້ນຳໃຊ້ທຶນສົມທົບຂອງ ນວ ແລະ ບ້ານປະກອບຈຳນວນໜຶ່ງເພື່ອດຳເນີນການຢ່າງຮີບດ່ວນ.
ນັ້ນກໍຖືໄດ້ວ່າທາງຂັ້ນເທິງເພິ່ນໄດ້ເອົາໃຈໃສ່ໃນການແກ້ໄຂ ເພື່ອເຮັດໃຫ້ການສັນຈອນຕາມເສັ້ນທາງດັ່ງກ່າວມີຄວາມສະດວກສະບາຍ ແຕ່ການແກ້ໄຂບັນຫາດັ່ງກ່າວ ກໍຍັງມີຄວາມຫຍຸ້ງຍາກ ເນື່ອງຈາກໃນໄລຍະນີ້ເປັນລະດູຝົນ ດັ່ງນັ້ນ ການສັນຈອນຕາມເສັ້ນທາງດັ່ງກ່າວ ຜູ້ຂັບຂີ່ເອງກໍຕ້ອງມີສະຕິລະມັດລະວັງ ນອກນັ້ນ ບໍ່ວ່າຈະເປັນລົດຈັກ ລົດໃຫຍ່ ກໍຕ້ອງໃຫ້ກຽດເຊິ່ງກັນ ແລະ ກັນ ເພື່ອບໍ່ໃຫ້ເກີດອຸບັດຕິເຫດ ນອກຈາກເສັ້ນທາງທີ່ກ່າວມານັ້ນ ກໍຍັງມີອີກຫຼາຍຈຸດໃນນະຄອນຫຼວງວຽງຈັນ ທີ່ໄດ້ຮັບການເປ່ເພ ເຊັ່ນ: ໜ້າວັດດົງປາແລບ ເມືອງຈັນທະບູລີ ນະຄອນຫຼວງວຽງຈັນ ເປັນຂຸມກວ້າງສົມຄວນ ບໍລິເວນໃກ້ກັບຂົວດອນແດງ ເມືອງຈັນທະບູລີ ເສັ້ນທາງເປັນຂຸມ ນັບແຕ່ສົ້ນຂົວຈົນກາຍທາງເຂົ້າໂຮງຮຽນຫງວຽນຢູ ເຊິ່ງສ້າງຄວາມຫຍຸ້ງຍາກໃນການສັນຈອນ ໂດຍສະເພາະໃນເວລາຮີບດ່ວນ ແລະ ອາດກໍໃຫ້ເກີດອຸບັດເຫດກໍເປັນໄດ້.
ໂດຍ: ເມັດຝົນ