ວິຊຸນນະລາດ ພິຈິດ ນັກກີລາດອກປີກໄກ່ ມື 1 ຂອງລາວ ຈາກສະໂມສອນດອກປີກໄກ່ມັນທາຕຸລາດ ໃຫ້ສຳພາດເມື່ອບໍ່ດົນມານີ້ ວ່າ: ປີນີ້ ຂະບວນການກີລາດອກປີກໄກ່ໃນລາວເຮົາ ເລີ່ມມີສີສັນທີ່ໜ້າຕື່ນເຕັ້ນ ພາຍຫຼັງການແຜ່ລະບາດພະຍາດໂຄວິດ-19 ນັກກີລາຫຼາຍຄົນກໍໄດ້ຫ່າງຈາກວົງການ ພໍແຕ່ມີການໂຄສະນາຈະມີການແຂ່ງຂັນລາຍການ ເບຍລາວ ໂອເພັນ 2020 ກໍມີບັນດາສະໂມສອນ ແລະ ນັກກີລາເລີ່ມເຄື່ອນໄຫວ ແລະ ເຝິກຊ້ອມກັບສະໂມສອນຫຼາຍຂຶ້ນກວ່າເກົ່າ ພ້ອມທັງເຫັນຄູ່ແຂ່ງຂັນທີ່ສີມືດີຫຼາຍຄົນເກີດຂຶ້ນ ຕົນຄິດວ່າຄວນຈະເພີ່ມລາຍການຈັດແຂ່ງຂັນຕື່ມອີກໃນປີຕໍ່ໄປ ເພື່ອສົ່ງເສີມກີລາປະເພດນີ້ໃຫ້ເຕີບໃຫຍ່ຂະຫຍາຍຕົວກວ່າເກົ່າ ແລະ ຂໍສະແດງຄວາມຂອບໃຈ ແລະ ຮູ້ບຸນຄຸນມາຍັງຜູ້ໃຫ້ການສະໜັບສະໜູນ ເຮັດໃຫ້ການແຂ່ງຂັນຄັ້ງນີ້ເກີດຂຶ້ນ ເຊິ່ງຕົນຮູ້ສຶກດີໃຈທີ່ໄດ້ເຂົ້າຮ່ວມການແຂ່ງຂັນນີ້ ເພື່ອຮັບປະກັນໃນການປ້ອງກັນແຊັມ ສະໄໝທີ 4 ຕົນຈະພະຍາຍາມເຝິກຊ້ອມໃຫ້ຫຼາຍຂຶ້ນ.
ການແຂ່ງຂັນລາຍການ ເບຍລາວ ໂອເພັນ 2020 ຈະຈັດຂຶ້ນວັນທີ 20-23 ສິງຫາ 2020 ຢູ່ສະໂມສອນດອກປີກໄກ່ເສດຖາ (ບຶງຂະຫຍອງ) ໄດ້ຮັບການສະໜັບສະໜູນຫຼັກ 162 ລ້ານກີບ ປັດຈຸບັນມີນັກກີລາແຈ້ງເຈດຈຳນົງເຂົ້າຮ່ວມ 112 ຄົນ ໃນນີ້ ປະເພດດ່ຽວ 86 ຄົນ ປະເພດຄູ່ 45 ຄູ່ ມາຈາກ 20 ພາກສ່ວນ 7 ແຂວງ ຄື: ຫຼວງພະບາງ ຫຼວງນ້ຳທາ ໄຊຍະບູລີ ອຸດົມໄຊ ບໍລິຄຳໄຊ ຄຳມ່ວນ ສະຫວັນນະເຂດ ແລະ 13 ສະໂມສອນຂອງນະຄອນຫຼວງວຽງຈັນ ຄາດວ່າຍັງຈະມີນັກກີລາສະໝັກເຂົ້າຮ່ວມອີກຫຼາຍສົມຄວນ ໃນນີ້ຈະມີ 12 ລາຍການ ຄື: ຮຸ່ນເຍົາວະຊົນ 5 ລາຍການ ຮຸ່ນຊາວໜຸ່ມທົ່ວໄປ 5 ລາຍການ ຮຸ່ນອາວຸໂສ 2 ລາຍການ.