ພິທີຈັບສະຫຼາກແຂ່ງຂັນບານເຕະລາຍການຊີງຂັນ ສະຫະພັນບານເຕະແຫ່ງຊາດລາວ (ສຕລ) ຄອມມານໂດ 2020 ຮອບຄັດເລືອກ (LFF COMMANDO CUP 2020 PLAY-OFF STAGE) ຈັດຂຶ້ນວັນທີ 18 ສິງຫາ 2020 ຢູ່ ສຕລ ເຊິ່ງຜົນການຈັບສະຫຼາກມີດັ່ງນີ້: ທຣີນີຕີ ເອັຟຊີ ພົບ ເຮັສບີທີ 941 ເອັຟຊີ ກະຣຸດາ ເອັຟຊີ ພົບ ວຽງຈັນ ຢູໄນເຕັດ ກອງທັບ ເອັຟຊີ ພົບ ເມືອງຫາດ ຢູໄນເຕັດ ເອັສອີຊີ ຢູໄນເຕັດ ພົບ ລາວ-ທ໋ອບ ເອັຟຊີ ເຄວສ ຢູໄນເຕັດ ພົບ ເອັສທີທີ ເອັຟຊີ ບີແກນ ຢູໄນເຕັດ ພົບ ເຄພີເອັສ ເອັຟຊີ ສ່ວນນະຄອນຫຼວງ ເອັຟຊີ ຖືກຈັບສະຫຼາກໄດ້ຜ່ານເຂົ້າຮອບ 16 ທີມ.
ການແຂ່ງຂັນບານເຕະລາຍການດັ່ງກ່າວ ເປັນການແຂ່ງຂັນແບບຈົກສະຫຼາກປະກົບຄູ່ເຕະແບບນັດດຽວ ສະໂມສອນບານເຕະໃນການແຂ່ງຂັນລີກ 1 ຈະໄດ້ຮັບສິດເຂົ້າຮອບ 16 ທີມໂດຍອັດຕະໂນມັດ ເພື່ອລໍຖ້າຈົກສະຫຼາກປະກົບຄູ່ຮ່ວມກັບທີມທີ່ຜ່ານຮອບຄັດເລືອກຈາກການແຂ່ງຂັນລີກ 2 ສະໂມສອນຈາກການແຂ່ງຂັນບານເຕະ ຄອມມານໂດ ລາວລີກ 2 ທີ່ຜ່ານຮອບຄັດເລືອກ ແລະ ເປັນການຈົກສະຫຼາກປະກົບຄູ່ກັບສະໂມສອນຈາກການແຂ່ງຂັນລີກ 1 ຖ້າຫາກແຂ່ງຂັນຄົບເວລາ 90 ນາທີແລ້ວ ຜົນການແຂ່ງຂັນສະເໝີກັນ ໃຫ້ຕັດສິນດ້ວຍການເຕະຈຸດໂທດທັນທີ ໃນນີ້ ຈະມີພຽງຮອບຊີງຊະນະເລີດເທົ່ານັ້ນ ທີ່ຈະມີການຕໍ່ເວລາໃນກໍລະນີສະເໝີກັນ ໃນເວລາແຂ່ງຂັນປົກກະຕິ ທີມຊະນະເລີດ ຈະໄດ້ຮັບເງິນ ລາງວັນ 30 ລ້ານກີບ ພ້ອມຂັນ 1 ໜ່ວຍ ແລະ ຫຼຽນຊະນະເລີດ 35 ຫຼຽນ ອັນດັບ 2 ໄດ້ຮັບເງິນລາງວັນ 15 ລ້ານກີບ ຫຼຽນຮອງຊະນະເລີດ 35 ຫຼຽນ ແລະ ສະໂມສອນທີ່ເຂົ້າຮ່ວມແຂ່ງຂັນ ຈະໄດ້ຮັບເງິນອຸດໜູນເພີ່ມເຕີມ 1 ລ້ານກີບ ໃນກໍລະນີເປັນຜູ້ຊະນະໃນແຕ່ລະນັດການແຂ່ງຂັນຂອງສະໂມສອນຕົວເອງ ນອກນີ້ ຍັງມີລາງວັນນັກກີລາທີ່ຍິງປະຕູສູງສຸດ ຜູ້ຮັກສາປະຕູດີເດັ່ນ ນັກກີລາດີເດັ່ນ ຄູເຝິກດີເດັ່ນ ແລະ ກຳມະການດີເດັ່ນ ຕື່ມອີກ.
ການແຂ່ງຂັນບານເຕະລາຍການຊີງຂັນ ສຕລ ຄອມມານໂດ 2020 ຈະເລີ່ມແຂ່ງຂັນວັນທີ 5 ກັນຍາ 2020 ເປັນຕົ້ນໄປ ໂດຍແຂ່ງຂັນຢູ່ສະໝາມຫຍ້າທຽມ ສຕລ ສະໜາມ 1 ສະໜາມ 2 ແລະ ສະໜາມກີລາແຫ່ງຊາດ ຫຼັກ 16 (ສະໜາມນອກ) ສຳລັບແຊັມໃນປີທີ່ຜ່ານມາແມ່ນສະໂມສອນ ລາວໂຕໂຢຕ້າ ເອັຟຊີ.