ໃນບົດຄວາມນີ້ ທ່ານຜູ້ອ່ານຈະໄດ້ຊາບກ່ຽວກັບສິດຂັບຂີ່ພິເສດໃນອັງກິດ ແລະ ກົດໝາຍຕ້ານການກໍ່ການຮ້າຍຂອງ ສ ເກົາຫຼີ.
ທີ່ອັງກິດ: ໃນໄລຍະຫຼັງໆມານີ້ ເຫດກໍ່ການຮ້າຍ ແລະ ຄວາມຮຸນແຮງທີ່ປະເທດອັງກິດໄດ້ເກີດຂຶ້ນອ່າວຖີ່ ເຊັ່ນ: ການເອົາມີດໄລ່ແທງກັນຢູ່ສວນສາທາລະນະ ເມືອງຣີດິງ ໃນຄ່ຳຄືນວັນທີ 20 ເດືອນມິຖຸນາປີນີ້ (ວຽງຈັນທາມ 23 ມິຖຸນາ 2020) ເຊິ່ງໄດ້ເຮັດໃຫ້ມີຜູ້ເສຍຊີວິດກັບທີ່ຈຳນວນ 3 ຄົນ ແລະ ອີກ 3 ຄົນ ບາດເຈັບສາຫັດ ຜູ້ກໍ່ເຫດເປັນຊາຍອາຍຸ 25 ປີ ຈາກປະເທດລີບີ ຖືກເຈົ້າໜ້າທີ່ຕຳຫຼວດຈັບກຸມ ຂ່າວບອກວ່າ ເຂົາຄົນນີ້ເຄີຍໄດ້ຮັບໂທດຕິດຄຸກມາແລ້ວ ຍ້ອນຄະດີເບົາບາງທີ່ບໍ່ມີການພົວພັນກັບການກໍ່ການຮ້າຍ ແນວໃດກໍດີ ທາງເຈົ້າໜ້າທີ່ປາບການກໍ່ການຮ້າຍຂອງອັງກິດ ພວມເລັ່ງສືບສວນເຫດການອາລະວາດຄັ້ງນີ້ຢ່າງຂຸ້ນຂ້ຽວ ໃນໄລຍະຜ່ານມາ ທາງການອັງກິດໄດ້ອອກມາດຕະການເຄັ່ງຄັດຮັດກຸມທີ່ສຸດ ເພື່ອປ້ອງກັນບໍ່ໃຫ້ມີເຫດກໍ່ການຮ້າຍ ກໍຄື ການໃຊ້ຄວາມຮຸນແຮງເກີດຂຶ້ນໃນສັງຄົມ ຊຶ່ງຈະເປັນການເຕາະຕ້ອງເຖິງຄວາມໝັ້ນຄົງຂອງຊາດ ຕົວຢ່າງ: ໃນເດືອນມັງກອນ ປີ 2014 ທາງການອັງກິດ ໄດ້ສະເໜີສ້າງກົດໝາຍ ຈະລາຈອນພິເສດ ເພື່ອເອື້ອອຳນວຍໃຫ້ກອງກຳລັງສືບຂ່າວ (ສາຍລັບ) ໜ່ວຍ M15 ແລະ M16 ໃນການປະຕິບັດໜ້າທີ່ຂອງຕົນໃຫ້ວ່ອງໄວທັນການ ເພື່ອແກ້ໄຂເຫດສຸກເສີນ ກົດໝາຍສະບັບດັ່ງກ່າວອະນຸຍາດໃຫ້ສາຍລັບທັງ 2 ໜ່ວຍງານນີ້ ສາມາດຂັບລົດລ່ວງສັນຍານໄຟແດງ ໂດຍບໍ່ຈຳເປັນຕ້ອງປະຕິບັດຕາມເຄື່ອງໝາຍຈະລາຈອນຕາມເສັ້ນທາງ ແລະ ບໍ່ຈຳເປັນຕ້ອງຢຸດໃຫ້ຄົນຂ້າມທາງມ້າລາຍ ນອກຈາກນັ້ນ ຍັງສາມາດຂັບລົດໄວເກີນກວ່າທີ່ກົດຈະລາຈອນກຳນົດໄວ້ອີກດ້ວຍ ສິດພິເສດດັ່ງກ່າວ ອະນຸຍາດສະເພາະເວລາໜ່ວຍສາຍລັບພວມປະຕິບັດພາລະກິດອັນຮີບດ່ວນ ສຸກເສີນ ເພື່ອຄວາມໝັ້ນຄົງຂອງຊາດເທົ່ານັ້ນ ໜ່ວຍງານທີ່ໄດ້ຮັບສິດທິພິເສດແບບນີ້ມາກ່ອນໜ້າແລ້ວນັ້ນ ລວມມີ ກອງກຳລັງຕຳຫຼວດ ແລະ ໜ່ວຍກູ້ຊີບສຸກເສີນ ຄາດວ່າໃນຕໍ່ໜ້າ ໜ່ວຍງານເກັບກູ້ລະເບີດ ໜ່ວຍງານຂົນຍ້າຍອະໄວຍະວະເພື່ອການຜ່າຕັດປ່ຽນຖ່າຍອະໄວຍະວະສຸກເສີນ ກໍຈະໄດ້ຮັບສິດພິເສດດ້ານການຈະລາຈອນ ເຊັ່ນ: ດຽວກັນ.
ທີ່ ສ ເກົາຫຼີ: ໃນຕົ້ນເດືອນມີນາ 2016 ສະພາແຫ່ງຊາດ ສ ເກົາຫຼີ ໄດ້ລົງມະຕິຮັບຮອງເອົາຮ່າງກົດໝາຍຕໍ່ຕ້ານການກໍ່ການຮ້າຍ ສະບັບທຳອິດຂອງປະເທດ ດ້ວຍຄະແນນສຽງ ເຫັນດີ 160 ຕໍ່ 1 ສຽງຄັດຄ້ານ ສ່ວນສະມາຊິກຝ່າຍຄ້ານນັ້ນບໍ່ໄດ້ຮ່ວມລົງມະຕິ ຂ່າວບອກວ່າ ກວ່າຈະສາມາດລົງມະຕິຮັບຮອງເອົາກົດໝາຍສະບັບນີ້ນັ້ນ ກໍໄດ້ມີການອະພິປາຍແກ່ຍືດແກ່ຍາວເປັນເວລາເຖິງ 9 ວັນ ຊຶ່ງກວມເອົາເວລາເກືອບ 200 ຊົ່ວໂມງ ເປົ້າໝາຍສຳຄັນຂອງກົດໝາຍສະບັບນີ້ແມ່ນ ເພື່ອປ້ອງກັນປະເທດຈາກໄພຂົ່ມຂູ່ຂອງການກໍ່ການຮ້າຍທຸກຮູບແບບ ລວມທັງອັນທີ່ທາງການ ສ ເກົາຫຼີ ອ້າງວ່າເປັນໄພຂົ່ມຂູ່ຈາກການທົດລອງອາວຸດນິວເຄຼຍ ແລະ ຂີປະນາວຸດຂອງ ສປປ ເກົາຫຼີ ນຳດ້ວຍ.