ພິທີຖະແຫຼງຂ່າວ ແລະ ມອບເງິນອຸປະຖຳງານແຂ່ງຂັນກີລາດອກປີກໄກ່ທົ່ວປະເທດ ຄັ້ງທີ 20 ຊີງຂັນປະທານສະພາແຫ່ງຊາດ ໄດ້ມີຂຶ້ນໃນວັນທີ 14 ສິງຫາ 2020 ໂດຍກ່າວມອບຂອງທ່ານ ສູນທອນ ພົມມະຈັກປະທານບໍລິສັດ ເບຍລາວ ຈຳກັດ ແລະ ກ່າວຮັບຂອງທ່ານ ບຸນເຫຼືອ ສິນໄຊວໍຣະວົງ ຮອງລັດຖະມົນຕີກະຊວງການເງິນ ທັງເປັນປະທານສະຫະພັນດອກປີກໄກ່ແຫ່ງຊາດລາວ ໂດຍມີທ່ານນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກີລາ ພ້ອມດ້ວຍຄະນະ ແລະ ແຂກຖືກເຊີນເຂົ້າຮ່ວມເປັນສັກຂີພິຍານ.
ໂອກາດນີ້ ທ່ານ ບຸນເຫຼືອ ສິນໄຊວໍຣະວົງ ກໍໄດ້ຂຶ້ນລາຍງານການກະກຽມຈັດການແຂ່ງຂັນກີລາດອກປີກໄກ່ທົ່ວປະເທດ ຫຼື ລາຍການ Beerlao Open ຈະມີຂຶ້ນລະຫວ່າງ 20-23 ສິງຫາ 2020 ຢູ່ເດີ່ນດອກປີກໄກ່ເສດຖາ ເມືອງສີສັດຕະນາກ ນະຄອນຫຼວງວຽງຈັນ ເຊິ່ງມາຮອດປັດຈຸບັນມີຄວາມພ້ອມຮອບດ້ານ ແລະ ຄາດວ່າຈະມີນັກກີລາໃນຂອບເຂດທົ່ວປະເທດເຂົ້າຮ່ວມ 200 ກວ່າຄົນ ມີການຊີງໄຊກັນເຖິງ 11 ລາຍການ ປະກອບມີ ປະເພດດ່ຽວເຍົາວະຊົນຊາຍ ຮຸ່ນອາຍຸບໍ່ເກີນ 14 ປີ ດ່ຽວເຍົາວະຊົນຍິງ ຮຸ່ນ 17 ປີ ຄູ່ເຍົາວະຊົນປະສົມ ຮຸ່ນ 17 ປີ ດ່ຽວຊາຍທົ່ວໄປ ຄູ່ຍິງທົ່ວໄປ ຄູ່ອາວຸໂສຊາຍອາຍຸລວມ 90 ປີຂຶ້ນໄປ ດ່ຽວເຍົາວະຊົນຊາຍ ຮຸ່ນ 17 ປີ ຄູ່ເຍົາວະຊົນຊາຍ ຮຸ່ນ 17 ປີ ຄູ່ສະໝັກຫຼິ້ນຊາຍ ຄູ່ຊາຍທົ່ວໄປ ແລະ ຄູ່ປະສົມທົ່ວໄປ.
ຂະນະທີ່ທ່ານ ສູນທອນ ພົມມະຈັກ ປະທານບໍລິສັດ ເບຍລາວ ກໍໄດ້ສະແດງຄວາມຍິນດີ ທີ່ໃຫ້ບໍລິສັດ ເບຍລາວ ສືບຕໍ່ມີສ່ວນຮ່ວມໃນການພັດທະນາວົງການກີລາ ໂດຍສະເພາະ ກີລາດອກປີກໄກ່ ທີ່ເປັນການແຂ່ງຂັນທີ່ຍາວນານ ແລະ ຄັ້ງນີ້ກໍເປັນຄັ້ງທີ 20 ເຊິ່ງເປັນການສ້າງສາພັດທະນາກີລາດອກປີກໄກ່ ໃຫ້ມີການເຄື່ອນໄຫວ ແລະ ທຽບເທົ່າກັບສາກົນ.