ພິທີປະກາດປັບປຸງການ ຈັດຕັ້ງ ຄະນະບໍລິຫານງານສະ ຫະພັນກີລາດອກປີກໄກ່ແຫ່ງຊາດລາວຊຸດໃໝ່ ໄດ້ມີຂຶ້ນວັນທີ 14 ສິງຫາ 2020 ຢູ່ຫ້ອງປະຊຸມ ຂອງຄະນະກຳມະການກີລາໂອແລມປີກແຫ່ງຊາດລາວ (ຄອລ) ໃຫ້ກຽດເປັນປະທານຂອງທ່ານນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິ ການ ແລະ ກີລາ ທັງເປັນປະ ທານ ຄອລ ພ້ອມດ້ວຍຄະນະ ແລະ ແຂກຖືກເຊີນເຂົ້າຮ່ວມ.
ໃນໂອກາດນີ້ ຄະນະພິທີ ໄດ້ອ່ານຂໍ້ຕົກລົງວ່າດ້ວຍການຮັບ ຮອງເອົາການປັບປຸງຄະນະບໍລິຫານງານສະຫະພັນກີລາດອກປີກໄກ່ແຫ່ງຊາດລາວຊຸດໃໝ່ ໂດຍອີງຕາມດຳລັດຂອງນາຍົກ ລັດຖະມົນຕີ ວ່າດ້ວຍການຈັດ ຕັ້ງ ແລະ ການເຄື່ອນໄຫວຂອງກະຊວງສຶກສາທິການ ແລະ ກີລາ ສະບັບເລກທີ 253/ນຍ ລົງວັນທີ 26 ພຶດສະພາ 2020 ລັດຖະມົນຕີກະຊວງສຶກສາທິການ ແລະ ກີລາ ຈຶ່ງຕົກລົງຮັບຮອງເອົາການປັບປຸງກົງຈັກການຈັດຕັ້ງ ຄະນະບໍລິຫານງານສະຫະພັນດອກປີກໄກ່ແຫ່ງຊາດລາວຊຸດໃໝ່ 2020-2024 ເຊິ່ງໄດ້ແຕ່ງຕັ້ງທ່ານ ບຸນເຫຼືອ ສິນໄຊວໍຣະວົງ ຮອງລັດຖະມົນຕີກະຊວງການເງິນ ເປັນປະທານສະຫະພັນດອກປີກໄກ່ແຫ່ງຊາດລາວຊຸດໃໝ່ ພ້ອມກັບແຕ່ງຕັ້ງຮອງປະທານ 5 ທ່ານ ເລຂາທິການ 1 ທ່ານ ຮອງເລຂາ 1 ທ່ານ ຄະນະກຳມະການ 11 ທ່ານ.
ພ້ອມນີ້ ສະຫະພັນດອກປີກໄກ່ແຫ່ງຊາດມີແຜນຈະຈັດການແຂ່ງຂັນດອກປີກໄກ່ ທົ່ວປະເທດ ຄັ້ງທີ 20 ຫຼື Beerlao Open 2020 ຊີງຂັນປະທານສະພາແຫ່ງຊາດ ເຊິ່ງຈະຈັດຂຶ້ນວັນທີ 20-23 ສິງຫາ 2020 ຢູ່ເດີ່ນດອກປີກໄກ່ເສດຖາ ບ້ານບຶງຂະຫຍອງ ເມືອງສີສັດຕະນາກ ນະຄອນຫຼວງວຽງຈັນ ແລະ ຈະມີນັກກີລາເຂົ້າຮ່ວມ 200 ກວ່າຄົນ ໃນທົ່ວປະເທດ.