ໃນຂະບວນການຂອງການ ດຳເນີນຄະດີອາຍາ ບາງກໍລະນີອາດມີການນຳໃຊ້ມາດຕະການຕ່າງໆ ຕາມທີ່ກົດໝາຍໄດ້ອະນຸຍາດ ເຊັ່ນ: ການກວດຄົ້ນ ການຢຶດ ຫຼື ການ ອາຍັດຊັບທີ່ພົວພັນກັບການກະທຳຜິດ ດັ່ງນັ້ນ ການກວດຄົ້ນກໍແມ່ນມາດຕະການໜຶ່ງທີ່ໄດ້ຖືກນຳໃຊ້ເຂົ້າໃນການຊອກຫາຮ່ອງຮອຍ ວັດຖຸສິ່ງຂອງທີ່ນຳໃຊ້ ຫຼື ໄດ້ມາຈາກການກະທຳຜິດ.
ການກວດຄົ້ນຈະດຳເນີນໄດ້ ກໍຕໍ່ເມື່ອຫາກມີຄຳສັ່ງເປັນລາຍລັກອັກສອນ ຂອງຫົວໜ້າອົງການໄອຍະການ ຫຼື ສານເທົ່ານັ້ນ ເວັ້ນເສຍແຕ່ໃນກໍລະນີການກະທຳຜິດເຊິ່ງໜ້າ ຫຼື ຮີບດ່ວນ ແຕ່ກໍຕ້ອງລາຍງານໃຫ້ຫົວໜ້າອົງການໄອຍະການຊາບ ພາຍໃນກຳນົດເວລາ 24 ຊົ່ວໂມງ ພາຍຫຼັງທີ່ການກວດຄົ້ນໄດ້ສິ້ນສຸດລົງແລ້ວ.
ຄຳສັ່ງກວດຄົ້ນ ມີຜົນບັງຄັບໃຊ້ນັບແຕ່ວັນລົງລາຍເຊັນເປັນຕົ້ນໄປ ແລະ ຕ້ອງຈັດຕັ້ງປະຕິບັດພາຍໃນກຳນົດ 24 ຊົ່ວໂມງ.
ກ່ອນ ແລະ ຫຼັງການກວດຄົ້ນ ບຸກຄົນທີ່ເຂົ້າຮ່ວມໃນການກວດຄົ້ນ ຕ້ອງສະແດງຄວາມບໍລິສຸດຂອງຕົນຕໍ່ເຈົ້າໜ້າທີ່ ເຈົ້າຂອງຍານພາຫະນະ ຫຼື ຕໍ່ບຸກຄົນທີ່ຖືກກວດຄົ້ນ.
ການກວດຄົ້ນຈະດຳເນີນໄປໄດ້ກໍຕໍ່ເມື່ອມີສາເຫດດັ່ງນີ້: 1. ມີຂໍ້ມູນທີ່ເຊື່ອໄດ້ວ່າ ໃນເຄຫາສະຖານ ຍານພາຫະນະ ຫຼື ຕົວບຸກຄົນໄດ້ເກັບມ້ຽນ ຫຼື ຊຸກເຊື່ອງວັດຖຸສິ່ງຂອງທີ່ຜິດ ກົດໝາຍ ຫຼື ໄດ້ມາຈາກການກະທຳຜິດ ຫຼື ວັດຖຸ ແລະ ເອກະສານອື່ນ ທີ່ພົວພັນກັບການກະທຳຜິດ 2. ໃນກໍລະນີຈຳເປັນ ເພື່ອເກັບໂຮມຫຼັກຖານທາງດ້ານເອກະສານ ແລະ ວັດຖຸສິ່ງຂອງທີ່ພົວພັນກັບການກະທຳຜິດ.
ການກວດຄົ້ນເຄຫາສະຖານ ຫຼື ຍານພາຫະນະ ອາດຈະດຳເນີນເພື່ອຊອກຫາຜູ້ກະທຳຜິດກໍໄດ້.
ການກວດຄົ້ນເຄຫາສະຖານ ແມ່ນເຮືອນຢູ່ ແລະ ສິ່ງຕ່າງໆທີ່ຕັ້ງຢູ່ໃນບໍລິເວນເດີ່ນບ້ານ ເຮືອ ແພ ທີ່ໃຊ້ເປັນບ່ອນຢູ່ປະຈຳຂອງຄອບຄົວ ສຳນັກງານ ເຮືອນພັກ ໂຮງແຮມ ໂຮງງານ ແລະ ເຄຫາສະຖານອື່ນ ການກວດຄົ້ນເຄຫາສະຖານ ຕ້ອງເຮັດຊ້ອງໜ້າອົງການປົກຄອງບ້ານ ອົງການ ວິສາຫະກິດ ຕ້ອງເຮັດຊ້ອງໜ້າຜູ້ຕາງໜ້າ ສຳນັກງານ ອົງການ ວິສາຫະກິດທີ່ກ່ຽວຂ້ອງ ການກວດຄົ້ນສາສະໜາສະຖານ ຊຶ່ງແມ່ນເຄຫາສະຖານປະເພດໜຶ່ງເຊັ່ນ ກຸຕິວິຫານ ສິມ ໂບດ ຫໍ ແລະ ສິ່ງຕ່າງໆທີ່ຕັ້ງຢູ່ໃນບໍລິເວນສາສະໜາສະຖານ ຕ້ອງມີການເຂົ້າຮ່ວມຂອງເຈົ້າ ອາທິການວັດ ຄຸນພໍ່ ຜູ້ຮັບຜິດຊອບ ຫຼື ຜູ້ ຕາງໜ້າອົງການສາສະໜາທີ່ກ່ຽວຂ້ອງ.
ການກວດຄົ້ນເຄຫາສະຖານ ແລະ ສາສະໜາສະຖານໃຫ້ດຳເນີນໃນເວລາ ກາງ ເວັນ ແຕ່ ຫົກໂມງ ຫາ ສິບແປດໂມງ ໃນກໍລະນີທີ່ການກວດຄົ້ນຫາກໄດ້ດຳເນີນມາແລ້ວ ແຕ່ເມື່ອຮອດສິບແປດໂມງ ແຕ່ການກວດຄົ້ນຍັງບໍ່ສິ້ນສຸດ ກໍໃຫ້ສືບຕໍ່ຈົນກວ່າຈະສຳເລັດ ໃນເວລາທຳການກວດຄົ້ນເຈົ້າ ໜ້າທີ່ ທີ່ທຳການກວດຄົ້ນ ມີສິດບໍ່ອະນຸຍາດ ໃຫ້ບຸກຄົນພາຍໃນອອກນອກ ຫຼື ບຸກຄົນພາຍນອກເຂົ້າພາຍໃນເຄຫະສະຖານ ຫຼື ບໍ່ອະນຸຍາດໃຫ້ມີການຕິດຕໍ່ພົວພັນ ລະຫວ່າງບຸກຄົນພາຍໃນ ແລະ ພາຍນອກ ຈົນກວ່າການກວດຄົ້ນຈະສຳເລັດ.
ການປະຕິບັດຕາມຫຼັກການແມ່ນບັນຫາ ທີ່ສຳຄັນເພື່ອປົກປ້ອງອົງການ ບຸກຄົນທີ່ເຮັດໜ້າທີ່ດັ່ງກ່າວ ເພື່ອຫຼີກເວັ້ນການປະຕິບັດໜ້າທີ່ ທີ່ບໍ່ຖືກຕ້ອງ ໂດຍສະເພາະ ການປະຕິບັດຕາມຫຼັກການໃນການກວດຄົ້ນຊຶ່ງໄດ້ນຳສະເໜີມານີ້ ໃນກໍລະນີທີ່ຜູ້ມີໜ້າທີ່ປະຕິບັດວຽກງານດັ່ງກ່າວ ຫາກໄດ້ມີການລະເມີດມາດຕະການເຫຼົ່ານີ້ ກໍຈະຖືວ່າ ບຸກຄົນນັ້ນມີຄວາມຜິດຕາມປະມວນກົດໝາຍອາຍາເຊັ່ນ: ຈະເປັນການລ່ວງລະເມີດເຄຫາສະຖານ ມາດຕາ 222 ຫຼື ໃນກໍລະນີທີ່ທຳການກວດຄົ້ນຫາໄດ້ລັກເອົາຊັບໃນເວລາກວດຄົ້ນ ກໍຈະມີຄວາມຜິດຖານລັກຊັບຂອງພົນລະເມືອງ ຫຼື ການກະທຳຜິດທາງອາຍາອື່ນໆ.
ມາດຕາ 222 ໄດ້ກຳນົດວ່າ ບຸກຄົນໃດ ຫາກລ່ວງເຂົ້າເຄຫາສະຖານຜູ້ອື່ນ ໂດຍບໍ່ຖືກຕ້ອງຕາມກົດໝາຍ ດ້ວຍການໃຊ້ຄວາມຮຸນແຮງ ການນາບຂູ່ ການໃຊ້ເອກະສານປອມ ການປອມແປງເປັນເຈົ້າໜ້າທີ່ ຫຼື ດ້ວຍວິທີການອື່ນ ຈະຖືກລົງໂທດຕັດອິດສະຫຼະພາບແຕ່ ໜຶ່ງປີ ຫາ ສາມປີ ຫຼື ດັດສ້າງໂດຍບໍ່ຕັດອິດສະຫຼະພາບ ແລະ ຈະຖືກປັບໃໝແຕ່ 3.000.000 ກີບຫາ 10.000.000 ກີບ.
ມາດຕາ 231 ໄດ້ກຳນົດວ່າ: ບຸກຄົນໃດ ຫາກເອົາຊັບຂອງຜູ້ອື່ນມາເປັນຂອງຕົນໂດຍບໍ່ຖືກຕ້ອງ ຈະຖືກລົງໂທດຕັດອິດສະຫຼະພາບແຕ່ສາມເດືອນ ຫາ ສາມປີ ຫຼື ດັດສ້າງໂດຍບໍ່ຕັດອິດສະຫຼະພາບ ແລະ ຈະຖືກປັບໃໝແຕ່ 1.000.000 ກີບຫາ 5.000.000 ກີບ.
ໃນກໍລະນີທີ່ຜູ້ກະທຳຜິດຫາກໄດ້ລັກດ້ວຍການງັດແງະ ມ້າງເພຮົ້ວຮາວ ປະຕູ ຫີບ ຕູ້ ແລະ ອື່ນໆ ຈະຖືກລົງໂທດຕັດອິດສະຫຼະພາບແຕ່ ຫົກເດືອນ ຫາ ຫ້າປີ ແລະ ຈະຖືກປັບໃໝແຕ່ 3.000.000 ກີບຫາ 10.000.000 ກີບ.
ໃນກໍລະນີທີ່ຜູ້ກະທຳຜິດຫາກໄດ້ເອົາການລັກເປັນອາຈິນ ມີການຈັດຕັ້ງເປັນກຸ່ມ ຫຼື ໃນກໍລະນີກໍ່ຄວາມເສຍຫາຍຢ່າງຫຼວງຫຼາຍ ຈະຖືກລົງໂທດຕັດອິດສະຫຼະພາບແຕ່ ສາມປີ ຫາ ແປດປີ ແລະ ຈະຖືກປັບໃໝແຕ່ 5.000.000 ກີບຫາ 15.000.000 ກີບ ຄວາມພະຍາຍາມກໍ່ການກະທຳຜິດ ກໍຈະຖືກລົງໂທດ.
ໂດຍ: ໄມ້ງັດ