ແມ່ນຢູ່ວ່າຮ່ອງຮອຍຕ້ອງເພີ່ມຂຶ້ນຕາມໄວອາຍຸ ຖ້າອາຍຸຫຼາຍຂຶ້ນ ຮ່ອງຮອຍກໍຕ້ອງເພີ່ມຂຶ້ນ ແຕ່ຮູ້ບໍວ່າ ມີພຶດຕິກຳໃນຊີວິດປະຈຳວັນຂອງທ່ານ ທີ່ເຮັດໃຫ້ຮ່ອງຮອຍເທິງໃບໜ້າເກີດຂຶ້ນກ່ອນໄວ ລອງມາເບິ່ງນຳກັນວ່າມີຫຍັງແດ່ ເພື່ອທີ່ຈະກຳຈັດພຶດຕິກຳດັ່ງກ່າວ.
1. ສູບຢາ: ແນ່ນອນວ່າ ການສູບຢາເປັນສາເຫດສຳຄັນຂອງການເກີດຮ່ອງຮອຍ ແພດຜູ້ຊ່ຽວຊານດ້ານຜິວໜັງ ແລະ ສັນຍະກຳຕົບແຕ່ງ ເວົ້າວ່າ ຖ້າບໍ່ຢາກມີຮ່ອງຮອຍ ໜ້າແກ່ກ່ອນໄວ ຄວນເຊົາສູບຢາ.
2. ການກິນນ້ຳຕານຫຼາຍ: ຖ້າຕ້ອງການໃຫ້ຜິວ ພັນເບິ່ງແລ້ວອ່ອນກວ່າໄວ ແລະ ມີສຸຂະພາບດີ ບໍ່ຄວນກິນນ້ຳຕານຫຼາຍ ເພາະການກິນນ້ຳຕານ ຫຼື ສິ່ງທີ່ຫວານຫຼາຍ ຈະເຮັດໃຫ້ຕຸ້ຍ ແລະ ຄວາມ ຕຸ້ຍນັ້ນຈະເຮັດໃຫ້ແກ່ກ່ອນໄວອັນຄວນ
3. ກິນທາດແອວກໍຮໍ: ແພດຜູ້ຊ່ຽວຊານດ້ານການສັນຍະກຳຕົບແຕ່ງ ບອກວ່າ ການກິນທາດແອວກໍຮໍທຸກຊະນິດ ຈະເຮັດໃຫ້ຜິວແຫ້ງ ເຮັດໃຫ້ຕື່ນໃນຕອນເຊົ້າບໍ່ສົດຊື່ນ ຫາກກິນຕະຫຼອດຈະເຮັດໃຫ້ຜິວໜັງເກີດຮ່ອງຮອຍໄດ້ງ່າຍ ເນື່ອງຈາກຂາດຄວາມຊຸ່ມຊື່ນ ນອກຈາກນັ້ນ ແອວກໍຮໍຍັງ ສົ່ງຜົນກະທົບຕໍ່ລະດັບວິຕາມິນໃນຮ່າງກາຍ ເຊິ່ງ ວິຕາມິນດັ່ງກ່າວມີຄວາມສຳພັນຕໍ່ອະນຸມູນອິດ ສະຫຼະ ແລະ ການສ້າງເຊວໃໝ່ ຂອງຜິວໜັງ ແລະ ຮ່າງກາຍ.
4. ບໍ່ລ້າງເຄື່ອງສຳອາງ: ຫາກທ່ານຕ້ອງນອນໂດຍບໍ່ລ້າງເຄື່ອງສຳອາງອອກໃຫ້ໝົດເສຍກ່ອນ ແນ່ນອນວ່າຈະເຮັດໃຫ້ເກີດຮ່ອງຮອຍ ດັ່ງນັ້ນ ຖ້າ ຢາກຮັກສາໜ້າໃຫ້ອ່ອນເຍົາດົນໆ ຄວນລ້າງເຄື່ອງສຳອາງອອກໃຫ້ໝົດກ່ອນເຂົ້ານອນທຸກຄັ້ງ.
5. ແກະສິວ: ຄວນເຊົາການແກະສິວ ຄວນປ່ອຍໃຫ້ມັນຫຼຸດອອກມາເອງ ຫຼື ອາດຈະໃຊ້ຜະລິດຕະພັນຈາກທຳມະຊາດເພື່ອຫຼຸດການເກີດສິວ ໃຫ້ຄິດໄວ້ສະເໝີວ່າ ທຸກເທື່ອທີ່ເຮົາແກະສິວ ຈະເຮັດໃຫ້ເກີດການລະຄາຍເຄືອງ ເຮັດໃຫ້ເກີດເປັນແຜ ແລະ ຮ່ອງຮອຍເວລາຕໍ່ມາ.
6. ວິທີແຕ່ງໜ້າ: ທີ່ຕ້ອງອາໄສການດຶງ ການຢືດຜິວໜັງສ່ວນຕ່າງໆເທິງໃບໜ້າ ການດຶງ ຫຼື ການຢືດໜ້າ ຈະເຮັດໃຫ້ຜິວໜັງເກີດຮ່ອງຮອຍໄດ້ງ່າຍ.
7. ບໍ່ໃຊ້ຄີມກັນແດດ: ມີຫຼາຍຄົນບໍ່ມັກໃຊ້ຄີມກັນແດດ ເພາະເສຍເວລາ ແຕ່ເຊື່ອວ່າການຖືກແສງແດດແຮງໆ ບໍ່ພໍເທົ່າໃດນາທີ ຈະສ້າງຄວາມເສຍຫາຍໃຫ້ກັບຄໍລາເຈນ ແລະ ແສງແດດກໍເປັນສາເຫດໜຶ່ງທີ່ສຳຄັນຂອງການເກີດຮ່ອງຮອຍ.
8. ການນອນຂວ້ຳ: ເວລາເຮົານອນຂວ້ຳ ໃບໜ້າຂອງເຮົາຖືກເຕັງກັບໝອນ ເຊິ່ງນັ້ນກໍເປັນສາເຫດໜຶ່ງຂອງການເກີດຮ່ອງຮອຍ ທາງທີ່ດີຄວນນອນໝອນທີ່ອ່ອນນຸ້ມ ຫຼື ຄວນນອນຫງາຍຈະດີທີ່ສຸດ.
ວ. ດາລາວົງ-ນຳສະເໜີ