ພິທີມອບ-ຮັບພາຫະນະ (ລົດກະບະ 1 ຄັນ) ຈາກລັດຖະບານ ສ ເກົາຫຼີ ແລະ ອົງການອຸຍນີເຊັບ ປະຈໍາລາວ ໃຫ້ແກ່ກະຊວງແຮງງານ ແລະ ສະຫວັດດີການສັງຄົມ ເພື່ອນໍາໃຊ້ເຂົ້າໃນການຕິດຕາມກວດກາ ແລະ ໃຫ້ບໍລິການປົກປ້ອງເດັກ ໃຫ້ແກ່ເດັກນ້ອຍຢູ່ແຂວງອັດຕະປື ສປປ ລາວ ຈັດຂຶ້ນວັນທີ 14 ສິງຫາ 2020 ຢູ່ກະຊວງແຮງງານ ແລະ ສະຫວັດດີການສັງຄົມ.
ເລີ່ມແຕ່ເດືອນທັນວາ 2018 ເປັນຕົ້ນມາ ແຜນງານປັບປຸງຊີວິດການເປັນຢູ່ຂອງເດັກໃນແຂວງອັດຕະປື ໂດຍການສະໜອງການເບິ່ງແຍງດູແລທີ່ດີແກ່ເດັກ ແລະ ການສ້າງລະບົບປົກປ້ອງເດັກ ຈໍານວນ 58 ຄົນ ທີ່ບໍ່ມີການເບິ່ງແຍງດູແລຂອງພໍ່ແມ່ ແລະ ສະໜັບສະໜູນການສ້າງຄວາມສາມາດຂອງພະນັກງານບໍລິຫານດ້ານສັງຄົມສົງເຄາະ 106 ຄົນ ໃນຂັ້ນແຂວງ ຂັ້ນເມືອງ ແລະ ຂັ້ນບ້ານ ຢູ່ແຂວງອັດຕະປື ກ່ຽວກັບສິດທິເດັກ ການຄຸ້ມຄອງບໍລິຫານກໍລະນີ ແລະ ວຽກງານສັງຄົມສົງເຄາະ.
ທ່ານ ຄໍາແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ກ່າວວ່າ:ລັດຖະບານລາວ ເອົາໃຈໃສ່ເປັນພິເສດຕໍ່ການສ້າງຄວາມເຂັ້ມແຂງໃຫ້ແກ່ລະບົບປ້ອງກັນເດັກ ເພື່ອສະໜັບສະໜູນຊຸມຊົນ ລວມທັງເດັກ ຄອບຄົວ ແລະ ຜູ້ເບິ່ງແຍງດູແລເດັກ ໂດຍການເປັນຄູ່ຮ່ວມຢ່າງແໜ້ນແຟ້ນ ລະຫວ່າງລັດຖະບານ ອົງການສະຫະປະຊາຊາດ ອົງການຈັດຕັ້ງທາງສັງຄົມ ຄູ່ຮ່ວມພັດທະນາ ແລະ ພາກເອກະຊົນ ເພື່ອປົກປ້ອງເດັກ.
ທ່ານ ຊິງຊຸງຊຸນ ເອກອັກຄະລັດຖະທູດແຫ່ງ ສ ເກົາຫຼີ ປະຈໍາລາວ ກ່າວວ່າ: ດ້ວຍການປະກອບສ່ວນນີ້ ໂດຍຮ່ວມກັບລັດຖະບານ ສປປ ລາວ ແລະ ອົງການອຸຍນີເຊັບ ລັດຖະບານ ແລະ ປະຊາຊົນ ສ ເກົາຫຼີ ເຊື່ອວ່າຈະສາມາດເຮັດໃຫ້ການບໍລິການປົກປ້ອງເດັກທີ່ຈໍາເປັນ ແລະ ການຊ່ວຍກອບກູ້ຊີວິດທີ່ຢູ່ໃກ້ປະຊາຊົນທີ່ຕ້ອງການບໍລິການປົກປ້ອງໃນແຂວງອັດຕະປື ຕື່ມອີກ
# ຂ່າວ & ພາບ: ສີພອນ