ພິທີເຊັນສັນຍາຮ່ວມມືລະຫວ່າງສູນການຮຽນຮູ້ ວີເອັຟ (VF) ແລະ ໂຮງຮຽນລ້ຽງເດັກ-ອະນຸບານເມທານີ ນະຄອນຫຼວງວຽງຈັນ ໃນ “ໂຄງການສ້າງໂຮງຮຽນຕົ້ນແບບຂອງສະເຕັມສຶກສາ ຜ່ານການສ້າງຫຸ່ນຍົນ” ລະຫວ່າງທ່ານນາງ ອານຸວັດ ພົມມະຈັນ ຜູ້ອຳນວຍການໂຮງຮຽນເມທານີ ແລະ ທ່ານນາງ ສຸກຖາວອນ ວົງສະຫວັນ ຜູ້ອຳນວຍການສູນການຮຽນຮູ້ ວີເອັຟ ຈັດຂຶ້ນວັນທີ 7 ສິງຫາ 2020 ທີ່ໂຮງຮຽນເມທານີ ໂດຍມີຄະນະຜູ້ບໍລິຫານໂຮງຮຽນ ແລະ ພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.
ສະເຕັມສຶກສາ ແມ່ນການຮຽນໃນຮູບແບບໃໝ່ ທີ່ລວມ 4 ວິຊາ ຄື: ວິທະຍາສາດ ເຕັກໂນໂລຊີ ວິສະວະກຳສາດ ແລະ ຄະນິດສາດ ໃຫ້ເປັນວິຊາດຽວ ເຊິ່ງນັກຮຽນຈະໄດ້ຮຽນຜ່ານການລົງມືປະຕິບັດຕົວຈິງ ໂດຍການສ້າງຫຸ່ນຍົນໃນຮູບແບບຕ່າງໆ ຈຸດປະສົງຂອງໂຄງການ ເພື່ອເປັນຂໍ້ມູນໃຫ້ແກ່ລັດຖະບານ ກໍຄືກະຊວງວິທະຍາສາດ ແລະ ເຕັກໂນໂລຊີ ໃນໂຄງການສຶກສາຄວາມເປັນໄປໄດ້ຂອງໂຄງການ ສ້າງສູນສະເຕັມສຶກສາແຫ່ງຊາດໃນ ສປປ ລາວ ເພື່ອສຶກສາຄວາມເປັນໄປໄດ້ຂອງສະເຕັມສຶກສາ ຜ່ານການສ້າງຫຸ່ນຍົນ ໂດຍນຳໃຊ້ຄູ່ມືການຮຽນການສອນຂອງ My Robot Time ທີ່ນຳໃຊ້ຫຼາຍກ່າວ 40 ປະເທດໃນທົ່ວໂລກ ເປັນການເພີ່ມຄວາມຮູ້ຄວາມສາມາດ ທັກສະ ໃຫ້ຄູ-ອາຈານ ໃນການຈັດຕັ້ງປະຕິບັດໂຄງການສິດສອນ ເພີ່ມຈຳນວນນັກຮຽນທີ່ສົນໃຈໃນດ້ານວິທະຍາສາດ ເຕັກໂນໂລຊີ ວິສະວະກຳສາດ ແລະ ຄະນິດສາດ ເພີ່ມການຮັບຮູ້ຂອງນັກຮຽນ ຕໍ່ກັບສະເຕັມສຶກສາຜ່ານການສ້າງຫຸ່ນຍົນ.