ຫ້ອງການຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງຢູ່ລາວ (ຫຄຊກລ) ໂດຍສົມທົບກັບອົງການສະຫະປະຊາຊາດ ເພື່ອການພັດທະນາປະຈຳລາວ ໃນການປັບປຸງການປະສານງານ ວຽກງານການແກ້ໄຂບັນຫາ ລບຕ ຢູ່ລາວ ຈັດກອງປະຊຸມສ້າງຄວາມເຂັ້ມແຂງ ການປະສານງານວຽກງານການແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງໃຫ້ຄະນະກຳມະການຄຸ້ມຄອງລະເບີດບໍ່ທັນແຕກຂັ້ນແຂວງ (ຄຄກລຂ) ທົ່ວປະເທດຂຶ້ນວັນທີ 10-11 ສິງຫາ 2020 ທີ່ເມືອງວັງວຽງ ແຂວງວຽງຈັນ ມີທ່ານ ປະເດີມພອນ ສົນທະນີ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ຮອງປະທານຜູ້ປະຈຳການ ຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ລາວ (ຄຊກລ) ທ່ານ ມູລາລີ ບາລາຊູບຼາມານຽມ ຮອງຜູ້ຕາງໜ້າອົງການສະຫະປະຊາຊາດ ເພື່ອການພັດທະນາປະຈຳລາວ ທ່ານ ໂຈມແຍງ ແພງທອງສະຫວັດ ຫົວໜ້າຫ້ອງການ ຄຊກລ ບັນດາຜູ້ຕາງໜ້າກະຊວງການຕ່າງປະເທດ ກະຊວງແຮງງານ ແລະ ສະຫວັດດີການສັງຄົມ ພະແນກແຮງງານ ແລະ ສະຫວັດດີການສັງຄົມແຂວງທົ່ວປະເທດ ຫ້ອງການ ຄຊກລ ສູນກາງ ໂຄງການເກັບກູ້ລະເບີດແຫ່ງຊາດ ພະນັກງານວິຊາການຫ້ອງການ ຄຊກລ ແລະ ທີມງານ ສປຊ ເຂົ້າຮ່ວມ.
ເພື່ອປັບປຸງກົນໄກການປະສານງານວຽກງານ ການແກ້ໄຂບັນຫາລະເບີດບໍ່ທັນແຕກ ລະຫວ່າງຂັ້ນສູນກາງ ແລະ ທ້ອງຖິ່ນ (ຂັ້ນແຂວງ) ເຊິ່ງຫົວຂໍ້ ສຸມໃສ່ຄົ້ນຄວ້າປຶກສາຫາລືພາລະບົດບາດ ແລະ ການເຄື່ອນໄຫວຂອງ ຄຄກລ ການຄຸ້ມຄອງວຽກງານສຳຫຼວດ ແລະ ກວດກູ້ ລບຕ ຢູ່ຂັ້ນແຂວງ ລະບົບຖານຂໍ້ມູນລະເບີດບໍ່ທັນແຕກ ງົບປະມານ ແລະ ພາຫະນະຮັບໃຊ້ການເຄື່ອນໄຫວວຽກງານວິຊາສະເພາະ ແລະ ຂັ້ນຕອນໃນການຄົ້ນຄວ້າພິຈາລະນາບົດບັນທຶກຄວາມເຂົ້າໃຈ ໃນການແກ້ໄຂບັນຫາລະເບີດບໍ່ທັນແຕກຢູ່ລາວ ແນໃສ່ໃຫ້ໂຄງການຖືກຈັດຕັ້ງປະຕິບັດຢ່າງມີປະສິດທິຜົນ ທັນການ ແລະ ແທດເໝາະກັບຄວາມຮຽກຮ້ອງຕ້ອງການຕົວຈິງຂອງລາວ ເພື່ອປະກອບສ່ວນເຂົ້າໃນແຜນພັດທະນາເສດຖະກິດ-ສັງຄົມແຫ່ງຊາດ ແຜນການລຶບລ້າງຄວາມທຸກຍາກ ແລະ ເປົ້າໝາຍການພັດທະນາແບບຍືນຍົງທີ 18.
ກອງປະຊຸມໄດ້ຈັດແບ່ງເປັນກຸ່ມບັນດາແຂວງພາກເໜືອ ພາກກາງ ແລະ ພາກໃຕ້ ແລະ ຍັງໄດ້ແລກປ່ຽນຄວາມຄິດຄວາມເຫັນເຊິ່ງກັນ ແລະ ກັນຢ່າງກົງໄປກົງມາ ໃນການສຸມໃສ່ປຶກສາຫາລືກ່ຽວກັບການຄຸ້ມຄອງຂໍ້ມູນລະເບີດບໍ່ທັນແຕກ ການສຳຫຼວດ ກວດກູ້ ແລະ ການພິຈາລະນາບົດບັນທຶກຄວາມເຂົ້າໃຈ ເພື່ອນຳໄປຈັດຕັ້ງປະຕິບັດໃນຕໍ່ໜ້າໃຫ້ມີປະສິດທິຜົນດີຂຶ້ນ.
ຕອນທ້າຍກອງປະຊຸມ ທ່ານ ປະເດີມພອນ ສົນທະນີ ຍັງໄດ້ຮຽກຮ້ອງບັນດາຜູ້ເຂົ້າຮວ່ມກອງປະຊຸມ ໂດຍສະເພາະໃຫ້ພະແນກ ຮສສ ຂັ້ນແຂວງ ເອົາໃຈໃສ່ຈັດຕັ້ງຜັນຂະຫຍາຍການປະຕິບັດຄຳສັ່ງ ເລກທີ 039 ໂດຍສະເພາະວຽກງານໂຄສະນາສຶກສາຄວາມສ່ຽງຈາກ ລບຕ ທີ່ຕິດພັນກັບພາກປະຫັວດສາດ ການຖີ້ມລະເບີດ ຕ້ອງໃຫ້ຄົບອົງປະກອບການໂຄສະນາທີ່ມາ ແລະ ຜົນຮ້າຍຂອງ ລບຕ ເອົາໃຈໃສ່ຊີ້ນຳອົງການປະຕິບັດສອດຫ້ອຍການໂຄສະນາເຜີຍແຜ່ ວຽກງານການຕ້ານພະຍາດໂຄວິດ-19 ເຂົ້າໃນການໂຄສະນາສຶກສາຄວາມສ່ຽງຂອງລະເບີດ ໂດຍໃຫ້ອົງການປະຕິບັດງານ ປະສານກັບຄະນະສະເພາະກິດຂັ້ນແຂວງຕື່ມໃນເວລາປະຕິບັດຕົວຈິງ ພ້ອມນັ້ນ ໃນສະເພາະໜ້າ ຫ້ອງການ ຄຊກລ ຈະສົມທົບກັບພາກສ່ວນກ່ຽວຂ້ອງ ຄົ້ນຄວ້າຄິດໄລ່ຕົ້ນທຶນຄ່າໃຊ້ຈ່າຍສຳລັບວຽກງານການສຳຫຼວດ ແລະ ກວດກູ້ ລບຕ ເພື່ອເປັນບ່ອນອີງໃຫ້ພາກສ່ວນກ່ຽວຂ້ອງໃນເວລາຈັດຕັ້ງປະຕິບັດວຽກງານຕົວຈິງ.