ນັບແຕ່ວັນສື່ມວນຊົນລາວ ໄດ້ຮັບການສ້າງຕັ້ງຂຶ້ນ ພາຍໃຕ້ການຊີ້ນຳ-ນຳພາຂອງພັກ ແລະ ລັດ ຖະບານ ມາຮອດປັດຈຸບັນ ສື່ມວນຊົນລາວທັງສູນກາງ ແລະ ທ້ອງຖິ່ນ ໄດ້ມີການເຕີບໃຫຍ່ຂະຫຍາຍ ຕົວຢ່າງຕໍ່ເນື່ອງ ທັງດ້ານປະລິມານ ແລະ ຄຸນນະພາບ ລວມທັງສື່ເອເລັກໂຕຣນິກ ແລະ ສື່ສິ່ງພິມ ເຮັດໃຫ້ການກະຈາຍຂໍ້ມູນຂ່າວສານໄປເຖິງປະປະຊາຊົນໄດ້ຢ່າງກວ້າງຂວາງ ແລະ ວ່ອງໄວຫຼາຍຂຶ້ນ.
ທ່ານ ຈັນສະໝອນ ທິບພາວັນ ຮອງຫົວໜ້າພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ແຂວງຫຼວງພະບາງ ຜູ້ຊີ້ນຳວຽກງານສື່ມວນຊົນແຂວງ ໃຫ້ສຳພາດໃນໂອກາດການກະກຽມສະ ເຫຼີມສະຫຼອງວັນສື່ມວນຊົນລາວ ແລະ ການພິມຈຳໜ່າຍ ຄົບຮອບ 70 ປີ ເມື່ອບໍ່ດົນມານີ້ ວ່າ: ໄລຍະ ຜ່ານມາ ສື່ມວນຊົນແຂວງຫຼວງພະບາງໄດ້ເຮັດໜ້າທີ່ຂອງຕົນຢ່າງຕັ້ງໜ້າ ແລະ ດ້ວຍຄວາມຮັບຜິດ ຊອບສູງ ເຖິງຈະພົບພໍ້ຄວາມຫຍຸ້ງຍາກ ແລະ ສິ່ງທ້າທາຍຈາກສະພາບການເຊື່ອມໂຍງໃນຂະບວນວິ ວັດແຫ່ງຍຸກວິທະຍາສາດ ເຕັກໂນໂລຊີຂໍ້ມູນຂ່າວສານນັບມື້ນັບມີການຂະຫຍາຍຕົວ ແລະ ທັນສະໄໝ ສົ່ງຜົນກະທົບໂດຍກົງທັງທາງບວກ ແລະ ທາງລົບ ຕໍ່ການພັດທະນາວຽກງານສື່ມວນຊົນ ແຕ່ຍ້ອນຄວາມເອົາໃຈໃສ່ຂອງພັກ-ລັດ ກໍຄືອົງການປົກຄອງແຂວງຫຼວງພະບາງ ບັນດາຂະແໜງການ ກົມກອງ ນັບແຕ່ຂັ້ນແຂວງລົງຮອດຂັ້ນເມືອງ ໄດ້ປະຕິບັດໜ້າທີ່ການໂຄສະນາເຜີຍແຜ່ແນວທາງຂອງພັກ ລະ ບຽບກົດໝາຍຂອງລັດຢ່າງຕັ້ງໜ້າ ເຮັດໃຫ້ສື່ມວນຊົນແຂວງຫຼວງພະບາງ ມີການເຕີບໃຫຍ່ຂະຫຍາຍຕົວທັງດ້ານປະລິມານ ແລະ ຄຸນນະພາບ ບຸກຄະລາກອນສື່ມວນຊົນກໍໄດ້ຮັບການຍົກລະດັບທັງພາຍໃນ ແລະ ຕ່າງປະເທດ ພື້ນຖານໂຄງລ່າງ ລວມທັງວັດຖຸເຕັກນິກໄດ້ຮັບການພັດທະນາໄປສູ່ຄວາມທັນສະໄໝ ແລະ ຫັນຈາກລະບົບອານາລັອກໄປສູ່ລະບົບດີຈີຕອນເທື່ອລະກ້າວ ອັນພົ້ນເດັ່ນແມ່ນການນຳໃຊ້ລະບົບອິນເຕີເນັດໃນການສະໜອງຂໍ້ມູນຂ່າວສານ ສາລະຄວາມຮູ້ ແລະ ສາລະບັນເທິງ ໃຫ້ເປົ້າໝາຍ ເພື່ອຮັບໃຊ້ການພັດທະນາເສດຖະກິດ-ສັງຄົມໄລຍະໃໝ່ໄດ້ຢ່າງວ່ອງໄວ.
ໂອກາດວັນສື່ມວນຊົນລາວ ແລະ ການພິມຈຳໜ່າຍ ຄົບຮອບ 70 ປີ ນີ້ ໃນນາມຮອງຫົວໜ້າພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວແຂວງຫຼວງພະບາງ ຂໍໄດ້ສະແດງຄວາມຮູ້ບຸນຄຸນຕໍ່ການນຳພັກ-ລັດ ທີ່ໄດ້ເອົາໃຈໃສ່ຊີ້ນຳ-ນຳພາວຽກງານໃນຂົງເຂດສື່ມວນຊົນດ້ວຍດີຕະຫຼອດມາ ພ້ອມທັງຮຽກຮ້ອງເຖິງບຸກຄົນ ນິຕິບຸກຄົນ ອົງການຈັດຕັ້ງທີ່ເຄື່ອນໄຫວເຮັດໜ້າທີ່ວຽກງານສື່ມວນຊົນ ໃນການສະເໜີຂໍ້ມູນຂ່າວສານ ຜ່ານເວັບໄຊ ເຟສບຸກ ແລະ ລະບົບອອນລາຍປະເພດຕ່າງໆ ຕ້ອງເຄື່ອນໄຫວໃຫ້ຖືກຕ້ອງຕາມລະບຽບກົດໝາຍ ເພື່ອຫຼີກລ່ຽງການນຳສະເໜີຂໍ້ມູນບິດເບືອນຄວາມຈິງ ຂໍ້ມູນອະກຸສົນ ທີ່ຈະສ້າງຄວາມປັ່ນປວນ ແລະ ຜົນກະທົບທີ່ບໍ່ດີໃຫ້ສັງຄົມ.