ກອງປະຊຸມໃຫຍ່ຄັ້ງທີ XI ສະຫະພັນກຳມະບານກະຊວງການຕ່າງປະເທດ ຈັດຂຶ້ນວັນທີ 11 ສິງຫາ 2020 ທີ່ສູນການຮ່ວມມື ແລະ ເຝີກອົບຮົມສາກົນ ນະຄອນຫຼວງວຽງຈັນ ເປັນປະທານຂອງທ່ານ ບົວພັດ ພຸດທະວົງ ປະທານສະຫະພັນກຳມະບານກະຊວງການຕ່າງປະເທດ ມີທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ທ່ານ ປ້ານ ນ້ອຍມະນີ ປະທານສູນກາງສະຫະພັນກຳມະບານລາວ ຜູ້ຕາງໜ້າອົງການຈັດຕັ້ງມະຫາຊົນ ແລະ ສະມາຊິກກຳມະບານເຂົ້າຮ່ວມ.
ທ່ານ ບົວພັດ ພຸດທະວົງ ໄດ້ຂຶ້ນຜ່ານບົດລາຍງານການເມືອງທັງສອງພາກ ໂດຍໄດ້ທົບທວນຄືນສະພາບການເຄື່ອນໄຫວວຽກງານກຳມະບານ 5 ປີຜ່ານມາ (20156-2019) ແລະ ທິດທາງຄາດໝາຍສູ້ຊົນໃນໄລຍະ 5 ປີ ຕໍ່ໜ້າ (2020-2024) ໄດ້ຕີລາຄາຜົນງານອັນພົ້ນເດັ່ນ ແລະ ຜົນສໍາເລັດທີ່ຍາດມາໄດ້ໃນການເຄື່ອນໄຫວ ພ້ອມທັງຍົກໃຫ້ເຫັນຈຸດດີ ຂໍ້ຄົງຄ້າງ ແລະ ບາງບົດຮຽນທີ່ຖອດຖອນມາໄດ້ໃນດ້ານຕ່າງໆທີ່ສະຫະພັນກຳມະບານຍາດມາໄດ້ ປັດຈຸບັນ ຄະນະສະຫະພັນກໍາມະບານມີ 11 ທ່ານ ຍິງ 2 ທ່ານ ມີຄະນະກໍາມະບານຮາກຖານທັງຢູ່ພາຍໃນ ແລະ ຕ່າງປະເທດທັງໝົດ 57 ຮາກຖານ ມີສະມາຊິກ 750 ຄົນ ຍິງ 300 ຄົນ ສະຫະພັນກຳມະບານໄດ້ຖືເອົາວຽກງານໂຄສະນາສຶກສາອົບຮົມດ້ານການເມືອງ-ແນວຄິດໃຫ້ສະມາຊິກ ເຊື່ອມຊຶມແນວທາງນະໂຍບາຍຂອງພັກ ກົດໝາຍຂອງລັດ ແລະ ກຳໄດ້ແນວທາງນະໂຍບາຍການຕ່າງປະເທດຂອງພັກຢ່າງໜັກແໜ້ນ ໄດ້ມີການເຄື່ອນໄຫວວຽກງານກຳມະບານ ໂດຍຖືເອົາຂໍ້ແຂ່ງຂັນ 5 ເປັນເຈົ້າທີ່ສູນກາງກຳມະບານລາວວາງອອກ ໃນການຈັດຕັ້ງປະຕິບັດວຽກງານ ຕິດພັນກັບວຽກງານວິຊາສະເພາະຂອງຕົນຢ່າງມີຜົນສໍາເລັດເປັນກ້າວໆ.
ກອງປະຊຸມຍໄດ້ປ່ອນບັດຄັດເລືອກເອົາຄະນະບໍລິຫານງານຊຸດໃໝ່ 11 ທ່ານ ໂດຍເລືອກເອົາ ທ່ານ ວັນທາ ແສງເມືອງ ເປັນປະທານ ທ່ານ ຄຳໄພ ພັນທອງດີ ເປັນຮອງປະທານ ແລະ ທ່ານ ກັນຍາ ຄຳມຸງຄຸນ ເປັນຮອງປະທານ ທັງເປັນປະທານກວດກາ ເພື່ອສືບຕໍ່ຊີ້ນຳ-ນຳພາວຽກງານການຈັດຕັ້ງປະຕິບັດຕາມມະຕິກອງປະຊຸມໃຫຍ່ຄັ້ງທີ XI ສະຫະພັນກຳມະບານກະຊວງການຕ່າງປະເທດໃຫ້ປາກົດຜົນເປັນຈິງ.
ຕ້ອນທ້າຍທ່ານ ປ້ານ ນ້ອຍມະນີ ຕາງໜ້າໃຫ້ສູນກາງສະຫະພັນກຳມະບານລາວໃຫ້ກຽດປະດັບຫຼຽນກຳມະບານສູງສຸດໃຫ້ຄະນະພັກ-ຄະນະນຳກະຊວງການຕ່າງປະເທດທີ່ມີຜົນງານອັນພົ້ນເດັ່ນໃນການຊີ້ນຳ-ນຳພາສະຫະພັນກຳມະບານກະຊວງການຕ່າງປະເທດໃນຜ່ານມາ ພ້ອມທັງໃຫ້ກຽດໂອ້ລົມອີກດ້ວຍ.
# ຂ່າວ & ພາບ: ລັດເວລາ