ໃນຂະນະທີ່ປະຊາຊົນຕ້ອງໃສ່ຜ້າອັດປາກ ເພື່ອປ້ອງກັນເຊື້ອໂຄວິດ-19 ບໍລິສັດດ້ານເຕັກໂນໂລຊີໃນປະເທດຈີນ ໄດ້ອອກມາເປິດ ເຜີຍວ່າໄດ້ພັດທະນາລະບົບຈົດຈຳໃບໜ້າໃຫ້ສາມາດລະບຸຕົວບຸກຄົນໄດ້ ເຖິງແມ່ນຄົນນັ້ນຈະໃສ່ຜ້າອັດປາກຢູ່ກໍຕາມ.
ສຳນັກຂ່າວ Reuters ລາຍງານຈາກສາທາລະນະ ລັດປະຊາຊົນຈີນ ກ່ຽວກັບເຄືອຄ່າຍກ້ອງວົງຈອນປິດ ທີ່ຖືກໃຊ້ຄວບຄູ່ກັບລະບົບຈົດຈຳໃບໜ້າທີ່ປະສົບບັນຫາ ຫຼັງຈາກທ້າຍປີທີ່ຜ່ານມາ ໄດ້ພົບເຊື້ອໂຄວິດ-19 ໃນມົນທົນຫູເປີ່ຍ ແລະ ເກີດການແຜ່ລະບາດຈົນເຮັດໃຫ້ປະຊາຊົນຈຳເປັນຕ້ອງໃສ່ຜ້າອັດປາກເວລາຢູ່ນອກເຮືອນ.
ຫຼ້າສຸດ ບໍລິສັດ Hanwang Technology ຫຼື ຊື່ໃນຕະຫຼາດຕ່າງປະເທດຄື Hanvon ໄດ້ນຳສະເໜີເຕັກໂນໂລຊີກວດຈັບໃບໜ້າ ທີ່ສາມາດລະບຸຕົວບຸກຄົນໄດ້ແມ່ນຢຳ ເຖິງແມ່ນປະຊາຊົນຈະສວມຜ້າອັດປາກຢູ່ກໍຕາມ.
ໂດຍບໍລິສັດນີ້ຕັ້ງຢູ່ໃນນະຄອນຫຼວງປັກກິ່ງ ມີພະນັກງານ 20 ຄົນ ແລະ ໄດ້ພັດທະນາເຕັກໂນໂລຊີດັ່ງກ່າວມາຢ່າງຕໍ່ເນື່ອງໃນໄລຍະ 10 ປີທີ່ຜ່ານມາ ໃນລະບົບມີຂໍ້ມູນຂອງບຸກຄົນປະມານ 6 ລ້ານຄົນ ເຖິງແມ່ນຈະມີຂໍ້ມູນຂອງປະຊາຊົນທີ່ໃສ່ຜ້າອັດປາກ ພຽງເລັກໜ້ອຍ ແຕ່ບໍລິສັດກໍໄດ້ນຳເຕັກໂນໂລຊີນີ້ມາໃຊ້ຈິງ ພາຍຫຼັງເກີດການແຜ່ລະບາດຂອງເຊື້ອໂຄວິດ-19.
ທ່ານ Huang Lei ຮອງປະທານບໍລິສັດ Hanwang Technology ກ່າວວ່າ “ຖ້າເຊື່ອມຕໍ່ກັບຕົວວັດອຸນຫະພູມ ລະບົບຈະສາ ມາດລະບຸຕົວບຸກຄົນ ພ້ອມແຈ້ງເຕືອນຫາກພົບຄົນທີ່ມີອຸນຫະພູມຮ່າງກາຍສູງເກີນ 38 ອົງສາເຊ”.
ແລະ ຫາກນຳເຕັກໂນໂລຊີນີ້ຕິດຕັ້ງຮ່ວມ ກັບກ້ອງວົງຈອນປິດຫຼາຍຕົວ ຈະເພີ່ມສັກກະຍະພາບໃຫ້ສາມາດລະບຸລາຍລະອຽດຂອງປະຊາຊົນໄດ້ຫຼາຍເຖິງ 30 ຄົນພາຍໃນໜຶ່ງວິນາທີ ເຂົາບອກດ້ວຍວ່າ ຖ້າບຸກຄົນໃສ່ຜ້າອັດປາກ ຄວາມແມ່ນຢຳຂອງລະບົບຈະຢູ່ທີ່ 95% ແລະ ຖ້າບໍ່ສວມຜ້າອັດປາກເຕັກໂນໂລຊີນີ້ ຈະມີຄວາມແມ່ນຢຳສູງເຖິງ 99,5%.
ເມື່ອກະຊວງຄວາມໝັ້ນຄົງສາທາລະນະຂອງປະເທດຈີນນຳລະບົບນີ້ໄປໃຊ້ ສາມາດຊ່ວຍລະບຸຊື່ ແລະ ຂໍ້ມູນສຳຄັນຂອງແຕ່ລະບຸກຄົນ ຈາກການປຽບທຽບຮູບຖ່າຍ ແລະ ລາຍລະອຽດທີ່ມີຢູ່ໃນຄັງຂໍ້ມູນຂອງລັດຖະບານ ແລະ ຫາກຕ້ອງການຕິດຕາມບຸກຄົນລາຍໃດເປັນພິເສດ ກໍສາມາດກະທຳໄດ້.
ທາງບໍລິສັດເຊື່ອວ່າຈະເປັນການຊ່ວຍຫຼຸດອາຊະຍາກຳ ລວມເຖິງແຈ້ງເຕືອນລ່ວງໜ້າ ຫາກມີເຫດກໍ່ການຮ້າຍ ຢ່າງໃດກໍຕາມທາງບໍລິສັດ Hanvon ຍອມຮັບວ່າລະບົບຍັງມີຈຸດອ່ອນ ຫາກບຸກຄົນໃສ່ຜ້າອັດປາກພ້ອມກັບແວ່ນຕາກັນແດດ ຈະເຮັດໃຫ້ການກວດຈັບມີບັນຫາ.
ປັດຈຸບັນ ບໍລິສັດມີລູກຄ້າກວ່າ 200 ຄົນ ແລະ ຕຳຫຼວດໃນນະຄອນຫຼວງປັກກິ່ງທີ່ໃຊ້ລະບົບນີ້ ໂດຍເຊື່ອວ່າໃນອະນາຄົດອັນໃກ້ນີ້ ເຕັກໂນໂລຊີດັ່ງກ່າວຈະຂະຫຍາຍໄປຍັງສ່ວນອື່ນໆໃນປະເທດຈີນກວ່າ 20 ມົນທົນ.
ລະບົບນີ້ ເຖິງແມ່ນອາດຈະເພີ່ມການບຸກ ລ້ຳໃນພື້ນທີ່ສ່ວນຕົວຫຼາຍຍິ່ງຂຶ້ນ ແຕ່ພາຍໃຕ້ສະຖານະການທີ່ສຸກເສີນທາງດ້ານສາທາລະນະສຸກ ເຊື່ອວ່າປະຊາຊົນສ່ວນໃຫຍ່ຈະໃຫ້ການຍອມຮັບ.
ທາງບໍລິສັດຫວັງວ່າລະບົບນີ້ ຈະເປັນປະໂຫຍດໃຫ້ກັບປະເທດອື່ນໆທົ່ວໂລກ ທີ່ຈະຕ້ອງປະເຊີນກັບການແຜ່ລະບາດຂອງເຊື້ອໄວຣັສໂຄວິດ-19.