ຊຸດເຝິກອົບຮົມຜູ້ບໍລິຫານກີລາ-ກາຍຍະກຳທົ່ວນະຄອນຫຼວງວຽງຈັນ (ນວ) ຈັດຂຶ້ນວັນທີ 12-13 ສິງຫາ 2020 ຢູ່ສູນກີລາບຶງຂະຫຍອງ ມີທ່ານ ສົມພອນ ສອນດາລາ ຫົວໜ້າພະແນກສຶກສາທິການ ແລະ ກີລາ ນວ ທ່ານ ສົມພູ ພົງສາ ຜູ້ຊ່ວຍລັດຖະມົນຕີ ກະຊວງສຶກສາທິການ ແລະ ກີລາ ທັງເປັນຮອງປະທານ ແລະ ເລຂາທິການຄະນະກຳມະການກີລາໂອແລມປິກແຫ່ງຊາດລາວ (ວິທະຍາກອນ) ບັນດາຫົວໜ້າຂະແໜງ ຮອງຫົວໜ້າຫ້ອງການສຶກສາທິການ ແລະ ກີລາ 9 ເມືອງ ໂຮງຮຽນເປົ້າໝາຍ ແລະ ພະນັກງານ ວິຊາການກ່ຽວຂ້ອງເຂົ້າຮ່ວມ.
ທ່ານ ບຸນສົງ ນົນແກ້ວອິນທິຈັກ ຮອງຫົວໜ້າຂະແໜງກີລາລະດັບສູງ ພະແນກສຶກສາທິການ ແລະ ກີລາ ນວ ລາຍງານໜ້າວຽກຂະແໜງກີລາລະດັບສູງວ່າ: ຜ່ານການຈັດຕັ້ງປະຕິບັດແຜນການສົກປີ 2019-2020 ມີຜົນສຳເລັດຫຼາຍດ້ານ ໂດຍສະເພາະ ໄດ້ຈັດການແຂ່ງຂັນກີລາ 26 ປະເພດ ພາຍໃນ ນວ ເພື່ອຄັດເລືອກເອົານັກກີລາເຂົ້າຮ່ວມແຂ່ງຂັນໃນງານມະຫະກຳກີລາແຫ່ງຊາດ ຄັ້ງທີ XI ມີສະຫະພັນຄູເຝິກເຂົ້າຮ່ວມຄັດເລືອກນັກກີລາທັງໝົດ 650 ຄົນ ຍິງ 270 ຄົນ ພ້ອມທັງໄດ້ຂຶ້ນທະບຽນທັບນັກກີລາ ນວ ກະກຽມບຸຄະລາກອນເຂົ້າຮ່ວມກີລາແຫ່ງຊາດ ຄັ້ງທີ XI ມີຄູເຝິກ 89 ຄົນ ນັກກີລາ 432 ຄົນ ຈາກທັງໝົດ 28 ປະເພດ.
ສຳລັບແຜນວຽກຈຸດສຸມປີ 2021 ສືບຕໍ່ເອົາໃຈໃສ່ປັບປຸງ ແກ້ໄຂບັນຫາສິ່ງທ້າທາຍຕ່າງໆນັ້ນໃຫ້ບັນລຸ ໂດຍສະເພາະ ຈະໄດ້ສຸມໃສ່ຈັດຕັ້ງປະຕິບັດບັນດາຄາດໝາຍຕ່າງໆ ທີ່ວາງໄວ້ໃນແຜນພັດທະນາວຽກງານກີລາ-ກາຍຍະກຳຂອງຂະແໜງກີລາລະດັບສູງປີ 2021 ເປັນຕົ້ນ ສົມທົບກັບຂະແໜງວິຊາການທີ່ຕິດພັນກັບຂະແໜງກີລາ-ກາຍຍະກຳ ຄື: ຂະແໜງກີລາມວນຊົນ ຂະແໜງພະລະ ແລະ ສິລະປະສຶກສາໃນການສ້າງບຸຄະລາກອນການກີລາ ເຊັ່ນ: ຜູ້ບໍລິຫານການກີລາ ຄູເຝິກ ກຳມະການຕັດສິນ (ພິເສດ ເນັ້ນຄູພະລະສຶກສາ-ຄູທີ່ຮັກດ້ານການກີລາ) ຄຸ້ມຄອງສະຫະພັນ ກວດກາສະໂມສອນ ແລະ ເກັບກຳອຸປະກອນການກີລາທີ່ມີແລ້ວ ເພື່ອຮັບໃຊ້ງານແຂ່ງຂັນຕໍ່ໄປ ເພື່ອປະຢັດງົບປະມານຂອງລັດ ພ້ອມທັງປຸກລະດົມສັງຄົມ ສະຫະພັນກີລາ ໃຫ້ມີການແຂ່ງຂັນກີລາຢ່າງຕໍ່ເນື່ອງ ໃນວັນສຳຄັນຕ່າງໆຂອງຊາດຂອງສາກົນ ໃຫ້ມີຄວາມຍືນຍົງ ແລະ ຮູບແບບຕໍ່ເນື່ອງ.
ໂອກາດນີ້ ທ່ານ ສົມພອນ ສອນດາລາ ກ່າວວ່າ: ວຽກງານກີລາ-ກາຍຍະກຳເປັນວຽກງານໜຶ່ງທີ່ສຳຄັນ ທີ່ພວກເຮົາຈະຕ້ອງໄດ້ເອົາໃຈໃສ່ໃນການຈັດຕັ້ງປະຕິບັດ ແຜນພັດທະນາກີລາ ນວ ທັງເປັນການຈັດຕັ້ງປະຕິບັດແຜນຍຸດທະສາດແຕ່ນີ້ຮອດປີ 2025 ແລະ ແຜນການ 5 ປີ 2021-2025 ຂອງພະແນກສຶກສາທິການ ແລະ ກີລາ ນວ ວາງອອກ ໂດຍສະເພາະ ການກະກຽມເປັນເຈົ້າພາບຈັດງານກີລາແຫ່ງຊາດ ຄັ້ງທີ XII ປີ 2023 ຂອງ ນວ ສະນັ້ນ ຮຽກຮ້ອງມາ ຍັງນັກເຝິກອົບຮົມຕັ້ງໃຈເກັບກ່ຽວເອົາຄວາມຮູ້ ເພື່ອໄປຜັນຂະຫຍາຍວຽກງານກີລາ-ກາຍຍະກຳໃນຂົງເຂດທີ່ຕົນເອງຮັບຜິດຊອບ ເພື່ອສ້າງບຸຄະລາກອນດ້ານກີລາຮັບໃຊ້ພາຍໃນ ນວ ລະດັບຊາດ ແລະ ກ້າວສູ່ສາກົນ.
ສຳລັບການເຝິກອົບຮົມຄັ້ງນີ້ ປະກອບມີ 5 ຫົວຂໍ້ ຄື: ສະພາບການລວມການຈັດຕັ້ງ ແລະ ເຄື່ອນໄຫວກີລາ-ກາຍຍະກຳການສ້າງ ແລະ ພັດທະນາບຸຄະລາກອນ ລະບົບການບໍລິຫານການເປັນເຈົ້າພາບຈັດງານມະຫະກຳກີລາລະດັບຊາດ ຫຼື ເປັນເຈົ້າພາບກີລາທົ່ວແຂວງ-ນະຄອນຫຼວງ ການສ້າງ ແລະ ການພັດທະນາກີລາໃນໂຮງຮຽນ ເຂົ້າຮ່ວມງານກີລານັກຮຽນ ສາມັນ ການບໍລິຫານ ແລະ ການກະກຽມຂອງແຂວງ ນະຄອນຫຼວງ ເຂົ້າຮ່ວມງານມະຫະກຳກີລາແຫ່ງຊາດ.