ປັດຈຸບັນ ເຖິງແມ່ນວ່າສະພາບການລະບາດຂອງ COVID-19 ໃນປະເທດລາວເຮົາ ຍັງຢູ່ໃນຕົວເລກທີ່ຄົງທີ່ ກໍຄື ຜູ້ຕິດເຊື້ອຈຳນວນ 19 ກໍລະນີ ກໍໄດ້ຮັບການປິ່ວປົວໃຫ້ຫາຍດີແລ້ວ ແລະ ຍັງມີກໍລະນີນຳເຂົ້າທີ່ເປັນຄົນຕ່າງປະເທດນັ້ນ ແມ່ນກໍລັງຮັບການປິ່ນປົວຢ່າງໃກ້ຊິດຈາກຄະນະແພດຜູ້ຊ່ຽວຊານ ແຕ່ເບິ່ງສະພາບການລະບາດໃນທົ່ວໂລກ ລວມໄປເຖິງປະເທດອ້ອມຂ້າງແມ່ນຢູ່ໃນສະພາບທີ່ໜ້າເປັນຫ່ວງ ຈາກສະພາບການລະບາດ ລັດຖະບານລາວເຮົາ ກໍບໍ່ໄດ້ ເຫຼີງໃຈ ໂດຍໄດ້ເນັ້ນໃຫ້ຂະແໜງການກ່ຽວຂ້ອງເອົາໃຈໃສ່ໃນການປະຕິບັດມາດຕະການຕ່າງໆເພື່ອປ້ອງກັນການລະບາດຂອງພະຍາດດັ່ງກ່າວ.
ສຶກສາທິການ-ກີລາ ກໍເປັນຂະແໜງການໜຶ່ງທີ່ເປັນເຈົ້າການໃນການຈັດຕັ້ງປະຕິບັດມາດຕະການຕ່າງໆເຂົ້າໃນການຮຽນ-ການສອນ ເວົ້າໄດ້ວ່າ ທັງເຝົ້າລະວັງບໍ່ໃຫ້ມີການລະບາດ ທັງສິດສອນໄປພ້ອມເພື່ອບໍ່ໃຫ້ກະທົບເຖິງການຮຽນຂອງນັກຮຽນ ເຊິ່ງໃນໄລຍະຜ່ານມາຫຼາຍໆທ່ານກໍຄົງໄດ້ຕິດຕາມຂ່າວສານຈາກສື່ຕ່າງໆແລ້ວ ພໍເຫັນໄດ້ເຖິງຄວາມເອົາໃຈໃສ່ ຄວາມເປັນເຈົ້າການຂອງສະຖາບັນການສຶກສາ ຕໍ່ການປ້ອງກັນການລະບາດຂອງພະຍາດຮ້າຍ.
ໃນໄລຍະທີ່ມີການລະບາດ ຂະແໜງການສຶກສາ ໂດຍໄດ້ຮັບການສະໜັບສະໜູນຈາກພາກສ່ວນຕ່າງໆ ກໍໄດ້ໂຄສະນາຄວາມຮູ້ກ່ຽວກັບ COVID-19 ວິທີການປ້ອງກັນ ແລະອື່ນໆ ແຕ່ໃນມື້ນີ້ ຄໍລຳສຶກສາພວກເຮົາ ຂໍນຳສະເໜີຂໍ້ມູນກ່ຽວກັບຄວາມເຂົ້າໃຈ ແລະ ສິ່ງທີ່ຄວນເອົາໃຈໃສ່ຂອງນັກຮຽນ ແລະ ເດັກ ມານຳສະເໜີ ເພື່ອສືບຕໍ່ຈັດຕັ້ງປະຕິບັດໃນສົກຮຽນຕໍ່ໄປ.
ຕາມຂໍ້ມູນທີ່ໄດ້ຈາກເວັບໄຊ ອົງການອຸຍນີເຊັບປະຈຳລາວ ເຫັນວ່າ: ນັກຮຽນ ເດັກ ກໍຄື ຄົນຮຸ່ນໜຸ່ມຄວນເຂົ້າໃຈຂໍ້ມູນພື້ນຖານທີ່ເໝາະສົມກ່ຽວກັບ COVID-19 ບໍ່ວ່າຈະເປັນອາການ ພາວະແຊກຊ້ອນ ການຕິດຕໍ່ ແລະ ວິທີປ້ອງກັນບໍ່ໃຫ້ພະຍາດຕິດຕໍ່ໃສ່ຜູ້ອື່ນ ພ້ອມນັ້ນ ກໍຕ້ອງໄດ້ແນະນຳໃຫ້ເຂົາເຈົ້າຕິດຕາມຂ່າວ ສານກ່ຽວກັບການລະບາດຂອງພະຍາດດັ່ງກ່າວຕາມແຫຼ່ງຂ່າວທີ່ໜ້າເຊື່ອຖື ເຊັ່ນ: ອົງການອຸຍນີເຊັບ ອົງການອະນາໄມໂລກ ແລະ ກະຊວງສາທາລະນະສຸກ ແລະ ຈົ່ງລະວັງຂ່າວປອມທີ່ເວົ້າ ແລະ ສົ່ງຕໍ່ກັນໃນອິນເຕີເນັດ.
ສຳລັບສິ່ງທີ່ຄວນໃສ່ໃຈຂອງນັກຮຽນ ແລະ ເດັກ ປະກອບມີ: 1. ມັນເປັນເລື່ອງປົກກະຕິໃນສະຖາບັນລັກສະນະນີ້ທີ່ຄົນຈະຮູ້ສຶກເສົ້າ ກັງວົນ ສັບສົນ ຢ້ານກວາ ແລະ ຢາກຮ້າຍ ຈົ່ງຮູ້ວ່າເຮົາບໍ່ໄດ້ຢູ່ຄົນດຽວ ແລະ ຈົ່ງບອກກັບຄົນທີ່ພວກເຮົາເຊື່ອໃຈ ເຊັ່ນ: ພໍ່ແມ່ ຄູອາຈານ ເພື່ອຊ່ວຍຕົວເຮົາ ແລະ ໂຮງຮຽນປອດໄພ ແລະ ສຸກຂະພາບດີ 2. ປົກປ້ອງຕົນເອງ ແລະ ຜູ້ອື່ນໆ ໂດຍການໝັ່ນລ້າງມືດ້ວຍສະບູ (ປະມານ 20 ວິນາທີ) ຢ່າຈັບໜ້າຕົນເອງ ແລະ ຢຸດໃຊ້ຈອກກິນນ້ຳ ພາຊະນະໃສ່ອາຫານຮ່ວມກັບຄົນອື່ນ 3. ຮັກສາຕົວເຮົາເອງ ໂຮງຮຽນ ຄອບຄົວ ແລະ ຊຸມຊົນຂອງພວກເຮົາໃຫ້ມີສຸຂະພາບດີ ໂດຍການບອກຕໍ່ໃຫ້ຄອບຄົວ ແລະ ໝູ່ຄູ່ ສິ່ງທີ່ພວກເຮົາຮຽນຮູ້ກ່ຽວກັບວິທີການປ້ອງກັນ ໂດຍສະເພາະ ແມ່ນເດັກ ພ້ອມນັ້ນ ກໍປະພຶດຕົນໃຫ້ເປັນແບບຢ່າງໂດຍສະເພາະ ແມ່ນເດັກ ເວລາຈາມ ຫຼື ໄອ ໂດຍການໃຊ້ແຂນປົກປິດ ບໍລິເວນປາກ ຫຼື ດັງ ພ້ອມລ້າງມືໃຫ້ສະອາດ.
ສ່ວນ 4. ແມ່ນບໍ່ລັງກຽດ ຫຼື ຢອກລໍ້ໝູ່ເພື່ອນເວລາບໍ່ສະບາຍ ຈົ່ງຈື່ໄວ້ວ່າ ເຊື້ອຈຸລະໂລກບໍ່ໄດ້ເກີດຂຶ້ນຍ້ອນທີ່ຕັ້ງພູມສັນຖານ ຊົນເຜົ່າ ອາຍຸ ຄວາມສາມາດ ຫຼື ເພດ ແລະ 5. ຕ້ອງບອກໃຫ້ພໍ່ແມ່ ຄົນໃນຄອບຄົວ ຫຼື ຄູຮູ້ ຖ້າຫາກບໍ່ສະບາຍ ແລະ ຂໍອະນຸຍາດພັກຜ່ອນຢູ່ເຮືອນ.
ສິ່ງທີ່ກ່າວມາຂ້າງເທິງນັ້ນ ເປັນການສະເໜີເພື່ອໃຫ້ບັນດານ້ອງນັກຮຽນເປັນເຈົ້າການສືບຕໍ່ປະຕິບັດຕາມມາດຕະການທີ່ທາງຄະນະສະເພາະກິດຂັ້ນສູນກາງ ກໍຄື ຂັ້ນແຂວງ ເມືອງ ລວມໄປເຖິງມາດຕະການຕ່າງໆທີ່ໂຮງ ຮຽນວາງອອກ ເພື່ອບໍ່ໃຫ້ມີການລະບາດຂອງພະຍາດຮ້າຍ.
ໂດຍ: ສ.ຣາຊະສີ