ອີງຕາມຂໍ້ມູນຈາກເພຈຂ່າວສານ ປກສ ໃນວັນ 29 ກໍລະກົດ 2020 ຄະນະສານອາຍາ ສານຂັ້ນຕົ້ນນະຄອນຫຼວງວຽງຈັນ ໄດ້ຕັດສິນລົງໂທດປະຫານຊີວິດຈຳເລີຍ 2 ຄົນ ຊື່: ທ້າວ ຈື່ກອງແກ້ວ ອາຍຸ 22 ປີ ແລະ ທ້າວ ຕູ້ເລົ່າ ອາຍຸ 26 ປີ ທັງສອງພັກເຊົາຢູ່ບ້ານຄຳຮຸ່ງ ເມືອງໄຊທານີ ນະຄອນຫຼວງວຽງຈັນ ຖານຄ້າຂາຍຢາເສບຕິດ ຖືກເຈົ້າໜ້າທີ່ຕຳຫຼວດກັກຕົວດຳເນີນຄະດີ ໃນວັນທີ 2 ກຸມພາ 2019 ພ້ອມຢາບ້າ 146 ມັດ ກັບ 9 ຖົງ ລວມຢາບ້າທັງໝົດ 293.800 ເມັດ ພ້ອມແປ້ງຝຸ່ນໃຊ້ເປັນສ່ວນປະສົມຢາເສບຕິດ 1 ຖົງ ແລະ ປືນສັ້ນດັດແປງ ແລະ ລູກປືນ 6 ລູກ.
ອີງຕາມສຳນວນຄະດີ: ໃນເດືອນມັງ ກອນ 2019 ທ້າວ ອາລີວ່າງ ໄດ້ມາຫາທ້າວ ຈື່ກອງແກ້ວ ວ່າມີເຖົ້າແກ່ຕ້ອງການຊື້ຢາບ້າຈຳນວນຫຼາຍ ຈາກນັ້ນ ມາວັນທີ 25 ມັງກອນ ທ້າວ ຈື່ກອງແກ້ວ ແລະ ທ້າວ ຕູ້ເລົ່າ ໄດ້ພາກັນໄປເອົາຕົວຢ່າງຢາບ້ານຳທ້າວ ເຊັງ ໄປໃຫ້ເຖົ້າແກ່ເບິ່ງຢູ່ເຮືອນຂອງ ທ້າວ ອາລີວ່າງ ຢູ່ບ້ານນາສ້ຽວ ເມືອງນາຊາຍທອງ ເມື່ອກວດຕົວຢ່າງຢາບ້າແລ້ວ ໄດ້ຕົກລົງຊື້ຂາຍຢາບ້າ ຈຳນວນ 146 ມັດ ກັບ 9 ຖົງ ມາວັນທີ 2 ກຸມພາ 2019 ທ້າວ ອາລີວ່າງ ໄດ້ຂີ່ລົດຈັກໄປຮັບເອົາທ້າວ ຈື່ກອງແກ້ວ ໄປເບິ່ງເງິນນຳເຖົ້າແກ່ຢູ່ເຂດບ້ານຫ້ວຍເຕີຍ ເມືອງໄຊທານີ ເມື່ອເຫັນເງິນແລ້ວ ໄດ້ບອກໃຫ້ທ້າວ ອາລີວ່າງ ໄປຫາ ທ້າວ ຕູ້ເລົ່າ ຢູ່ບ້ານຄຳຮຸ່ງ ຈາກນັ້ນ ໄດ້ຂັບຂີ່ລົດຈັກຄົນລະຄັນອອກໄປເອົາຢາບ້ານຳຄົນຂອງທ້າວ ຈື່ກອງແກ້ວ ທີ່ໄດ້ຕິດ ຕໍ່ຊື້ກ່ອນໜ້ານີ້ ຢູ່ເສັ້ນທາງເຂດໂຮງໝໍແມ່ ແລະ ເດັກ ບ້ານໜອງພະຍາ ເມືອງໄຊທານີ ເມື່ອໄປຮອດ ທ້າວ ຕູ້ເລົ່າ ໄດ້ບອກໃຫ້ທ້າວ ອາລີວ່າງ ຖ້າຢູ່ແຄມທາງເຂດບ້ານຕານມີໄຊ ຈາກນັ້ນ ທ້າວ ຕູ້ເລົ່າ ແມ່ນຂີ່ລົດຈັກໄປເອົາຢາບ້າຢູ່ຈຸດນັດໝາຍກັບຜູ້ຂາຍ ທີ່ຈອດລົດກະບະຮຸນໄດສີຟ້າບໍ່ຈື່ປ້າຍທະ ບຽນລໍຖ້າຢູ່ແຄມທາງ ຊາຍທີ່ຂັບລົດກະ ບະຮຸນໄດ ໄດ້ຫິ້ວເອົາກະເປົາ 2 ໜ່ວຍ ທີ່ບັນຈຸຢາບ້າມາໃຫ້ທ້າວ ຕູ້ເລົ່າ ກັບມາຫາ ທ້າວ ອາລີວ່າງ ທີ່ລໍຖ້າຢູ່ກ່ອນໜ້ານັ້ນ ໂດຍທ້າວ ອາລີວ່າງ ຂີ່ລົດນຳໜ້າໄປຈຸດຊື້ຂາຍທີ່ທ້າວ ຈື່ກອງແກ້ວ ລໍ້ຖ້າກັບເຖົ້າແກ່ນັ້ນ ພໍຮອດຈຸດຊື້ຂາຍເຂດບ້ານຫ້ວຍເຕີຍ ເມືອງໄຊທານີ ຈຶ່ງຖືກເຈົ້າໜ້າທີ່ຈັບຕົວ ພ້ອມຂອງກາງຈຳນວນດັ່ງກ່າວ.
ໃນເວລາໄຕ່ສ່ວນຄະດີຂອງພວກກ່ຽວ ທ້າວ ຈື່ກອງແກ້ວ ພະຍາຍາມໃຫ້ການບ່າຍບ່ຽງຄວາມຈິງ ໂດຍອ້າງວ່າທ້າວ ຕູ່ເລົ່າ ແມ່ນບໍ່ມີສ່ວນກ່ຽວຂ້ອງກັບການຊື້ຂາຍຄັ້ງນີ້ ເພາະວ່າມື້ຖືກກັກຕົວນັ້ນ ໄດ້ບອກໃຫ້ທ້າວ ຕູ່ເລົ່າ ໄປຮັບຢູ່ຈຸດຊື້ຂາຍຢາບ້າ ເພາະວ່າເປັນວັນເກີດຂອງທ້າວ ຈື່ກອງແກ້ວ ແລະ ຈະພາທ້າວ ຕູ້ເລົ່າໄປສະຫຼອງວັນເກີດ.
ແຕ່ຄຳໃຫ້ການຂອງທ້າວ ຈື່ກອງແກ້ວ ນັ້ນ ຄະນະສານໄດ້ຊັກຖາມຫຼາຍບັນຫາບໍ່ ສາມາດຕອບໄດ້ ແລະ ຈາກຄົ້ນຄວ້າບັນ ດາຂໍ້ມູນຫຼັກຖານ ແລະ ເອກະສານຕ່າງໆ ທີ່ມີຢູ່ໃນສຳນວນຄະດີຢ່າງລະອຽດຖີ່ຖ້ວນ ຮອບດ້ານ ພາວະວິໄສແລ້ວ ເຫັນວາເປັນພຽງຂໍ້ອ້າງ ເພື່ອຢາກໃຫ້ທ້າວ ຕູ້ເລົ່າ ພົ້ນໂທດໃນຄັ້ງນີ້.
ການກະທຳຂອງທ້າວ ຈື່ກອງແກ້ວ ແລະ ທ້າວ ຕູ້ເລົ່າ ເປັນການກະທຳຜິດທາງອາຍາ ໃນສະຖານການຄ້າຂາຍຢາເສບຕິດ ທີ່ແຕະຕ້ອງຕໍ່ສະຖຽນລະພາບດ້ານເສດ ຖະກິດຂອງຊາດ ເຮັດໃຫ້ສັງຄົມບໍ່ມີຄວາມສະຫງົບ ແລະ ຄວາມເປັນລະບຽບຮຽບຮ້ອຍ ສະນັ້ນ ສານຈຶ່ງໄດ້ຕັດສິນປະຫານຊີ ວິດພວກກ່ຽວທັງສອງ ພ້ອມຢຶດຂອງກາງທີ່ພົວພັນກັບການຄ້າຂາຍຢາເສບຕິດໄປທຳ ລາຍຖີ້ມ.
ສ່ວນ ທ້າວ ເຊັງ ພວກກ່ຽວໃຫ້ການຊັດທອດຫາວ່າ: ໄດ້ເປັນຜູ້ຂາຍຢາບ້າໃຫ້ນັ້ນ ເຈົ້າທີ່ໄດ້ຂຶ້ນເປັນເປົ້າໝາຍຕິດຕາມເອົາຕົວມາດຳເນີນຄະດີຕາມພາຍຫຼັງ ສຳລັບທ້າວ ອາລີວ່າງ ຜູ້ຖືກຫາໃນຄະດີດຽວກັນນັ້ນຜູ້ ກ່ຽວຍັງເປັນເດັກຕາມປື້ມສຳມະໂນຄົວເຈົ້າໜ້າທີ່ ຈຶ່ງໄດ້ແຍກອອກເປັນສຳນວນໜຶ່ງຕ່າງຫາກ ແລະ ໄດ້ສະຫຼຸບສົ່ງອົງການໄອຍະການປະຊາຊົນນະຄອນຫຼວງວຽງຈັນ ໃນຂັ້ນຕໍ່ໄປ.