ພິທີມອບ-ຮັບໜ້າທີ່ເຈົ້າເມືອງສັງທອງ ນະຄອນຫຼວງວຽງຈັນ (ນວ) ຜູ້ເກົ່າ ແລະ ຜູ້ໃໝ່ ຈັດຂຶ້ນວັນທີ 7 ສິງຫາ 2020 ທີ່ເມືອງສັງທອງ ມີທ່ານ ສີຫຸນ ສິດທິລືໄຊ ຮອງເຈົ້າຄອງ ນວ ບັນດາຮອງເຈົ້າເມືອງ ຄະນະປະຈຳພັກ ຄະນະພັກ ຫົວໜ້າຫ້ອງການອ້ອມຂ້າງເມືອງ ນາຍບ້ານ ແລະ ພາກສ່ວນກ່ຽວຂ້ອງເຂົ້າຮ່ວມ.
ໂດຍອີງຕາມຄຳສັ່ງຂອງທ່ານເຈົ້າຄອງ ນວ ວ່າດ້ວຍການຍົກຍ້າຍທ່ານ ດາວເພັດ ອາລຸນ ເຈົ້າເມືອງສັງທອງຜູ້ເກົ່າ ມາປະຈຳການຢູ່ສະຫະພັນກຳມະບານ ນວ ແລະ ມະຕິຕົກລົງຂອງເຈົ້າຄອງ ນວ ວ່າດ້ວຍການແຕ່ງຕັ້ງຜູ້ວ່າການແທນເຈົ້າເມືອງສັງທອງ ເຫັນດີແຕ່ງຕັ້ງທ່ານ ພົງສະຫວັນ ສິລິພັນ ຮອງຫົວໜ້າຄະນະໂຄສະນາອົບຮົມ ນວ ເປັນຜູ້ວ່າການເລຂາຄະນະພັກ ເຈົ້າເມືອງສັງທອງຜູ້ໃໝ່ ນອກນີ້ ຍັງມີຄຳສັ່ງຂອງເຈົ້າຄອງ ວ່າດ້ວຍການຍົກຍ້າຍທ່ານ ບົວຄຳ ສີສົງຄາມ ຮອງເຈົ້າເມືອງສັງທອງ ໄປປະຈຳການຢູ່ສະຖາບັນຄົ້ນຄວ້າການພັດທະນາເສດຖະກິດ-ສັງຄົມ ນວ ແລະ ເຫັນດີຕົກລົງແຕ່ງຕັ້ງທ່ານ ໄຊຍະບັດ ຊຸມມະນີວົງ ຮອງເລຂາຄະນະບໍລິຫານງານຊາວໜຸ່ມ ນວ ມາເປັນຮອງເຈົ້າເມືອງສັງທອງ ຂໍ້ຕົກລົງເຈົ້າເມືອງສັງທອງ ວ່າດ້ວຍການຍົກຍ້າຍ ແລະ ແຕ່ງຕັ້ງພະນັກງານ ຍົກຍ້າຍທ່ານ ນາງ ໄພທູນ ອ່າງມັດສາ ຄະນະປະຈຳພັກ ປະທານກວດກາພັກ-ລັດເມືອງສັງທອງ ເປັນຫົວໜ້າຫ້ອງການແຮງງານ ແລະ ສະຫວັດດີການສັງຄົມເມືອງສັງທອງ.