ພິທີລົງນາມສັນຍາ ສ້າງສວນວິທະຍາສາດ ແລະ ພຶດສາສາດ ພ້ອມເປີດສູນສຶກສາວິທະຍາສາດ ດາລາສາດ ແລະ ສວນພຶກສາສາດ ລະຫວ່າງກະຊວງວິທະຍາສາດ – ເຕັກໂນໂລຊີ (ກວຕ) ແລະ ບໍລິສັດ ແອັດແລນຕິກ ອິນເຕີເນເຊີແນວ ກຣຸບ ຈຳກັດຜູ້ດຽວ ຈັດຂຶ້ນວັນທີ 7 ສິງຫາ 2020 ທີ່ ກວຕ ຮ່ວມລົງນາມໂດຍທ່ານນາງ ແກ້ວໄພວັນ ດວງສະຫວັນ ຫົວໜ້າຫ້ອງການສະພາວິທະຍາສາດແຫ່ງຊາດ ກວຕ ແລະ ທ່ານ ພູວົງ ສຸ້ຍຍະວົງ ປະທານບໍລິສັດ ແອັດແລນຕິກ ອິນເຕີເນເຊິແນວ ກຣຸບ ຈຳກັດ ມີທ່ານ ບໍ່ວຽງຄຳ ວົງດາລາ ລັດຖະມົນຕີ ກວຕ ປະທານສະພາວິທະຍາສາດແຫ່ງຊາດ ພ້ອມດ້ວຍຄະນະການນຳຈາກສະຖາບັນ ແຂວງ ກະຊວງ ຕະຫຼອດຮອດພະນັກງານວິຊາການພາກລັດ ແລະ ເອກະຊົນກ່ຽວຂ້ອງເຂົ້າຮ່ວມ.
ທ່ານ ນາງ ແກ້ວໄພວັນ ດວງສະຫວັນ ກ່າວວ່າ: ການເຊັນສັນຍາຄັ້ງນີ້ ເພື່ອຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ທີ່ຢັ້ງຢືນວ່າ: ຊຸກຍູ້ສົ່ງເສີມການພັດທະນາເສດຖະກິດ-ສັງຄົມແຫ່ງຊາດ ໂດຍນຳໃຊ້ວິທະຍາສາດ ແລະ ເຕັກໂນໂລຊີ ເປັນແຮງຂັບເຄື່ອນ ແລະ ເປັນການຈັດຕັ້ງຜັນຂະຫຍາຍແຜນງານພັດທະນາວິທະຍາສາດ ແລະ ເຕັກໂນໂລຊີເຂົ້າສູ່ຂົງເຂດການບໍລິການ ແລະ ການຜະລິດ ເວົ້າລວມ ແລະ ເວົ້າສະເພາະ ບົດບັນທຶກຄວາມເຂົ້າໃຈການຮ່ວມມືລະຫວ່າງ ກວຕ ແລະ ບໍລິສັດ ແອັດແລນຕິກ ອິນເຕີເນເຊິແນວຈຳກັດ ຜູ້ດຽວ ທີ່ກົມແຜນການໄດ້ລົງນາມເດືອນຕຸລາ 2013.
ສຳລັບເປົ້າໝາຍ ແນໃສ່ເຮັດໃຫ້ພື້ນຖານໂຄງລ່າງ ພັດທະນາຊັບພະຍາກອນມະນຸດ ຈິດສຳນຶກຄວາມຮັບຮູ້ດ້ານວິທະຍາສາດ ເຕັກໂນໂລຊີ ແລະ ນະວັດຕະກຳຂອງສັງຄົມ ນັບມື້ນັບເຂັ້ມແຂງ ກວ້າງຂວາງ ພ້ອມກັນນີ້ ເປັນການຊຸກຍູ້ສົ່ງເສີມການນຳໃຊ້ວິທະຍາສາດ ເຕັກໂນໂລຊີ ເຂົ້າໃນການຊຸກຍູ້ສົ່ງເສີມການທ່ອງທ່ຽວທຸລະກິດຂະໜາດນ້ອຍ-ຂະໜາດກາງ ແລະ ອື່ນໆຕາມແນວທາງຂອງພັກເຮົາ.
ໃນການຮ່ວມມືຄັ້ງນີ້ ຝ່າຍບໍລິສັດຈະເປັນຜູ້ສະໜັບສະໜູນດ້ານງົບປະມານ ແລະ ສິ່ງອຳນວຍຄວາມສະດວກໃຫ້ແກ່ການເຄື່ອນໄຫວວຽກງານ ສ່ວນ ກວຕ ຈະເປັນຜູ້ສະໜັບສະໜູນດ້ານເຕັກນິກວິຊາການ ພົວພັນຮ່ວມມືກັບສາກົນ ຜົນປະໂຫຍດທັງໝົດທີ່ເກີດໃນຂະບວນການຮ່ວມມື ການບໍລິການ ແລະ ອື່ນໆ ຂອງສວນວິທະຍາສາດ ແລະ ພຶກສາສາດ ແມ່ນຕ່າງຝ່າຍຕ່າງມີຜົນປະໂຫຍດຮ່ວມກັນ ແລະ ມີໄລຍະການຮ່ວມມື 25 ປີ.