ຜູ້ຂຽນເຊື່ອວ່າ: ຊາວພຸດລາວຫຼາຍຄົນຮູ້ດີພໍສົມຄວນໃນມື້ເຮັດບຸນຫໍ່ເຂົ້າປະດັບດິນ ເຊິ່ງບຸນຕໍ່ມາກໍເອີ້ນວ່າ ບຸນຫໍ່ເຂົ້າສະຫຼາກ ເພາະວັດຖຸ ຫຼື ອາຫານຢູ່ໃນຫໍ່ເຂົ້ານັ້ນແມ່ນມີຈຸດປະສົງເພື່ອອຸທິດໃຫ້ແກ່ຍາດພີ່ນ້ອງທີ່ລ່ວງລັບໄປແລ້ວ ໃຫ້ໄດ້ມາຮັບເອົາຜົນທານທີ່ພວກເຮົາລູກຫຼານອຸທິດໄປໃຫ້ ເຊິ່ງມີທີ່ມາຈາກນິທານທຳມະບົດທີ່ພະເຈົ້າພິມພິສານ ເຮັດບຸນຖວາຍທານແຕ່ບໍ່ໄດ້ອຸທິດຢາດນ້ຳ ສົ່ງບຸນແກ່ພີ່ນ້ອງຈຶ່ງບໍ່ໄດ້ຮັບຜົນບຸນອັນນັ້ນ.
ດ້ວຍເຫດຜົນຂ້າງເທິງນັ້ນ ເວລາເຮົາເຮັດບຸນຈຶ່ງຕ້ອງກ່າວຖວາຍທານອຸທິດຢາດນ້ຳໄປຫາຍາດພີ່ນ້ອງຜູ້ລ່ວງລັບ ນີ້ຄືຄວາມເຊື່ອຂອງຊາວພຸດສືບຕໍ່ກັນມາຍາວນານ ສຳລັບຊາວລາວບຸນເຂົ້າປະດັບດິນ ປີນີ້ກົງກັບວັນທີ 18/8 ວັນສິນດັບ 14 ຄ່ຳ ພວກເຮົາກໍຈະກະກຽມເຮັດຫໍ່ເຂົ້າເພື່ອໄປວາງຢາຍຕາມຕົ້ນໄມ້ ຫຼື ກຳແພງວັດ ເຊື່ອວ່າເປັນມື້ທີ່ຈ່າໝໍ້ນາຮົກປ່ອຍຜີເປດຂຶ້ນມາຮັບເອົາຜົນທານພີ່ນ້ອງອຸທິດໃຫ້ ຖ້າພວກເຮົາພິຈາລະນາເບິ່ງເຫດ ແລະ ຜົນ ພ້ອມທັງວັດຖຸໄປຖວາຍທານແກ່ພະສົງ ແລະ ອຸທິດເປັນຫໍ່ເຂົ້າຫາຜູ້ລ່ວງລັບແລ້ວເຮົາຈະເຫັນວ່າເປັນອາຫານທີ່ເກີດຈາກເຮັດກະເສດປູກຝັງຂອງຄົນລາວມີໝາກໄມ້ ແລະ ຫົວມັນເປັນຕົ້ນ.
ວິທີເຮັດຫໍ່ເຂົ້າປະດັບດິນກໍເອົາໃບຕອງກ້ວຍມາຫໍ່ ທັງເຄື່ອງອຸທິດກໍບໍ່ເປັນພິດໄພຕໍ່ສິ່ງແວດລ້ອມບໍ່ໄດ້ໃຊ້ຖົງຢາງປຼາສຕິກ ນີ້ຄື ຈຸດໜຶ່ງສະແດງອອກວ່າຄົນລາວຢູ່ກັບທຳມະຊາດ ແລະ ສ້າງຄວາມສົມດຸນບໍ່ທຳລາຍທຳມະຊາດ ສະຫຼາດຮູ້ໝູນໃຊ້ພືດຜັກຈາກການກະເສດມາເຮັດທານແກ່ພະສົງ ແລະ ອຸທິດແກ່ຍາດພີ່ນ້ອງ ປະເດັນທີສອງ ແມ່ນຄົນລາວຮູ້ຈັກສະແດງອອກເຖິງຄວາມກະຕັນຍູຮູ້ບຸນຄຸນພໍ່ແມ່ ຫຼື ບັນພະບຸລຸດ ເມື່ອຮອດບຸນເຂົ້າປະດັບດິນຈຶ່ງເຮັດບຸນອຸທິດໄປໃຫ້.
ຜູ້ຂຽນຂໍສັງລວມວ່າ: ຖ້າຄົນລາວເຮົາຮູ້ຈັກຄວາມໝາຍຂອງບຸນ ແລະ ປະໂຫຍດໃນການເຮັດທານບໍ່ທຳລາຍສິ່ງແວດລ້ອມ ກໍຈະຮູ້ຈັກສືບທອດພູມປັນຍາທີ່ເປັນຮີດຄອງສືບທອດກັນມາຍາວນານ ເລື່ອງຄວາມກະຕັນຍູຮູ້ຄຸນ ແລະ ຮູ້ຈັກໝູນໃຊ້ທຳມະຊາດຢ່າງກົມກຽວ ໂດຍບໍ່ມຸ້ງທຳລາຍສິ່ງແວດລ້ອມເພື່ອຄວາມໂລບຂອງຕົນ.
ໂດຍ: ດັ້ນກີບເມກ