ແພດໝໍຕັກເຕືອນ ເຄື່ອນໄຫວຊ້ຳໆດົນໆ ສ່ຽງ “ໂຣກເອັນອັກເສບ” ປ່ອຍໄວ້ດົນ ສ່ຽງເກີດພາວະແຊກຊ້ອນ ແນະ ນຳ 5 ວິທີປະຖົມພະຍາບານໃນກໍລະນີອາການບໍ່ຮຸນແຮງ.
ໂຣກເອັນອັກເສບ ຄື ການອັກເສບຂອງເອັນກ້າມຊີ້ນ ຊຶ່ງສາມາດເກີດຂຶ້ນໄດ້ກັບທຸກຄົນ ໂດຍບໍລິເວນທີ່ພົບຫຼາຍ ໄດ້ແກ່ ບ່າໄຫຼ່ ຂໍ່ສອກ ຂໍ່ມື ຂໍ່ເຂົ່າ ແລະ ຂໍ່ຕີນ ເມື່ອເອັນກ້າມຊີ້ນອັກເສບ ຈະມີອາການປວດ ແລະ ບວມ ເຄື່ອນໄຫວເອັນກ້າມຊີ້ນໄດ້ລຳບາກ ມີອາການຟົກຊ້ຳ ມີກ້ອນບວມໃຄ່ຕາມກ້າມຊີ້ນ ອາການປວດດັ່ງກ່າວອາດກະທົບຕໍ່ການເຮັດກິດຈະວັດປະຈຳວັນໃຫ້ມີຄວາມຍາກລຳບາກ ຫຼື ປວດຫຼາຍຍິ່ງຂຶ້ນ ໂຣກນີ້ຫາກມີການອັກເສບບໍ່ຫຼາຍ ສ່ວນໃຫຍ່ເກີດຂຶ້ນພາຍໃນ 2-3 ມື້ ແຕ່ຖ້າມີອາການຮຸນແຮງ ອາດເປັນຕໍ່ເນື່ອງໄດ້ດົນ 6 ເດືອນ ຈົນເຖິງ 2 ປີ.
ສາເຫດເກີດຈາກໄດ້ຮັບບາດເຈັບກະທັນຫັນ ຫຼື ເກີດຈາກການເຄື່ອນໄຫວຂອງເອັນກ້າມຊີ້ນບໍລິ ເວນເດີມຊ້ຳໆເປັນເວລາດົນ ເຮັດໃຫ້ເອັນບໍລິເວນ ທີ່ຖືກໃຊ້ງານເຄັ່ງຕຶງຂຶ້ນເລື້ອຍໆ ໂດຍຜູ້ທີ່ມີຄວາມສ່ຽງຕໍ່ເອັນກ້າມຊີ້ນອັກເສບ ໄດ້ແກ່.
1. ຜູ້ທີ່ມີອາຍຸຫຼາຍ ຈະຍິ່ງມີໂອກາດເກີດພາວະ ເອັນອັກເສບເນື່ອງຈາກເອັນກ້າມຊີ້ນເລີ່ມມີຄວາມຢືດຫົດໜ້ອຍລົງ.
2. ມີການເຄື່ອນໄຫວຮ່າງກາຍບາງສ່ວນຜິດທ່າຫຼາຍຄັ້ງ.
3. ເກີດຈາກການຫຼິ້ນກີລາບາງຊະນິດທີ່ເອັນກ້າມຊີ້ນຕ້ອງເຮັດວຽກຊ້າໆ ເຊັ່ນ: ເຕະບານ ກະຕໍ້ ຕີດອກປີກໄກ່ ລອຍນ້ຳ ແລະ ແລ່ນ.
ຫາກມີອາການເອັນກ້າມຊີ້ນອັກເສບບໍ່ຮຸນແຮງ ຄວນຢຸດພັກກິດຈະກຳທີ່ເຮັດຢູ່ ແລະ ສາມາດປະຖົມພະຍາບານເບື້ອງຕົ້ນດ້ວຍຕົນເອງ ດັ່ງນີ້
1. ປະຄົບເຢັນດ້ວຍຜ້າຫໍ່ນ້ຳກ້ອນບໍລິເວນທີ່ອັກ ເສບດົນ 20 ນາທີ ມື້ລະ 3-4 ຄັ້ງ.
2. ໃຊ້ຜ້າພັນບໍລິເວນຮອບໆ ເພື່ອຮອງຮັບການ ໃຊ້ງານເອັນກ້າມຊີ້ນບໍລິເວນນັ້ນ.
3. ພະຍາຍາມຍົກສ່ວນຂອງຮ່າງກາຍທີ່ມີອາການບາດເຈັບຢູ່ໃນລະດັບສູງ ໂດຍໃຊ້ໝອນຮອງເມື່ອນັ່ງ ຫຼື ນອນ.
4. ຮັບປະທານຢາ ຫຼື ທາເຈວເຢັນເພື່ອບັນເທົາ ອາການອັກເສບເບື້ອງຕົ້ນ.
5. ຫຼີກລຽ່ງການໃຊ້ເອັນກ້າມຊີ້ນສ່ວນທີ່ອັກເສບ ທັງນີ້ ຫາກອາການບໍ່ດີຂຶ້ນມີອາການຮຸນແຮງຢ່າງຕໍ່ເນື່ອງ ຄວນຮີບພົບແພດຜູ້ຊ່ຽວຊານ ເພາະປ່ອຍຖິ້ມໄວ້ ອາດເຮັດໃຫ້ເກີດພາວະແຊກຊ້ອນທີ່ເປັນອັນຕະລາຍ ເຊັ່ນ: ເສັ້ນເອັນຈີກຂາດ ກ້າມຊີ້ນປາຍແຂນອ່ອນແຮງ ເປັນຕົ້ນ ແພດອາດປິ່ນປົວໂດຍການສີດຢາບັນເທົາອາການປວດ ເຮັດກາຍະພາບບຳບັດ ພັກໃຊ້ງານ ແລະ ໃຊ້ຢາໃນການຮັກສາ.
ຖ້າອາການດັ່ງກ່າວຍັງບໍ່ດີຂຶ້ນ ອາດປິ່ນປົວດ້ວຍການຜ່າຕັດ ສຳລັບວິທີການປ້ອງກັນຄວນຫຼີກລ່ຽງກິດຈະກຳທີ່ຈະສົ່ງຜົນໃຫ້ເກີດແຮງຕຶງຕໍ່ເອັນກ້າມຊີ້ນຫຼາຍເກີນໄປ ໂດຍສະເພາະເມື່ອເຮັດຊ້ຳເປັນເວລາດົນ ເຮັດກິດຈະກຳອອກກຳລັງກາຍ ໃຫ້ຫຼາກຫຼາຍ ແລະ ຄວນສັບປ່ຽນການອອກກຳລັງກາຍຊະນິດອື່ນ ອົບອຸ່ນຮ່າງກາຍໃຫ້ພ້ອມກ່ອນ ການເຮັດກິດຈະກຳ ແລະ ໝັ່ນຢືດກ້າມຊີ້ນ ຫຼັງການອອກກຳລັງກາຍ ຕະຫຼອດຈົນເລືອກອຸປະກອນການຫຼິ້ນກີລາທີ່ເໝາະສົມ ນ້ຳໜັກເບົາ ແລະ ໃຊ້ທ່າທາງການຫຼິ້ນທີ່ຖືກຕ້ອງ.
ວ.ດາລາວົງ-ນຳສະເໜີ