ລັດຖະທຳມະນູນ ແຫ່ງ ສປປ ລາວ ສະບັບປັບປຸງປີ 2015 ແມ່ນກົດໝາຍພື້ນຖານຂອງບັນດາຂະແໜງກົດໝາຍຕ່າງໆ ເປັນກົດໝາຍສູງສຸດຂອງ ສປປ ລາວ ທີ່ສະແດງເຖິງເຈດຈຳນົງຂອງຊົນຊັ້ນປົກຄອງ ຊຶ່ງໄດ້ກຳນົດລະບອບການເມືອງ ເສດຖະກິດ-ສັງຄົມ ການປ້ອງກັນຊາດ-ປ້ອງກັນຄວາມສະຫງົບ ການຕ່າງປະເທດ ກຳນົດ ແລະ ພັນທະພື້ນຖານຂອງພົນລະເມືອງ ຫຼັກການຈັດຕັງ ແລະ ການເຄື່ອນໄຫວຂອງກົງຈັກລັດໃນໄລຍະໃໝ່ ລັດຖະທຳມະນູນ ແມ່ນນິຕິກຳພື້ນຖານໃຫ້ແກ່ການກໍ່ສ້າງລະບົບກົດໝາຍ ແຫ່ງ ສປປ ລາວ ສະນັ້ນ ທຸກນິຕິກຳທີ່ສ້າງ ຂຶ້ນຕ້ອງສອດຄ່ອງກັບລັດຖະທຳມະນູນ ແລະ ສົນທິສັນຍາທີ່ລັດຖະບານແຫ່ງ ສປປ ລາວ ເປັນພາຄີ.
ເນື້ອໃນຂອງລັດຖະທຳມະນູນໄດ້ກຳນົດເຖິງບັນຫາສິດທິມະນຸດ ຊຶ່ງໄດ້ຖືກຜັນຂະຫຍາຍອອກຢູ່ໃນສິດ ແລະ ພັນທະພື້ນຖານຂອງພົນລະເມືອງ ແລະ ບາງມາດຕາໄດ້ກຳນົດຫຼັກການລວມຂອງການດຳເນີນຄະດີອາຍາ ຊຶ່ງພົວພັນເຖິງສິດທີ່ຖືກຕ້ອງຕາມກົດໝາຍຂອງພົນລະເມືອງ ທີ່ຖືກລະເມີດທາງອາຍາ ຜູ້ກ່ຽວສາມາດຮ້ອງທຸກ ຮ້ອງຟ້ອງ ແລະ ສະເໜີຄວາມຄິດເຫັນຕໍ່ອົງການທີ່ກ່ຽວຂ້ອງກ່ຽວກັບບັນຫາທີ່ພົວພັນເຖິງສິດ ແລະ ຜົນປະໂຫຍດລວມ ຫຼື ສິດ ແລະ ຜົນປະໂຫຍດສະເພາະຂອງຕົນ ອົງການທີ່ກ່ຽວຂ້ອງຕ້ອງໄດ້ພິຈາລະນາ ແລະ ແກ້ໄຂຕາມທີ່ໄດ້ກຳນົດໄວ້ໃນກົດໝາຍ ຊາວຕ່າງດ້າວ ແລະ ຜູ້ບໍ່ມີສັນຊາດກໍໄດ້ຮັບການປົກປ້ອງສິດ ແລະ ເສລີພາບຕາມທີ່ໄດ້ກຳນົດໄວ້ໃນກົດໝາຍ ແຫ່ງ ສປປ ລາວ ສິດ ຂອງພົນລະເມືອງໂດຍບໍ່ມີໃຜຈະລ່ວງລະເມີດໄດ້ທາງດ້ານຮ່າງກາຍ ກຽດສັກສີ ແລະ ເຄຫະສະຖານ ພົນລະເມືອງລາວຈະບໍ່ຖືກຈັບຕົວ ຫຼື ກວດຄົ້ນເຄຫະສະຖານ ຖ້າຫາກບໍ່ມີຄຳສັ່ງຂອງໄອຍະການ ຫຼື ສານປະຊາຊົນ ເວັ້ນເສຍແຕ່ໃນກໍລະນີທີ່ໄດ້ກຳນົດໄວ້ໃນກົດໝາຍ.
ອົງການໄອຍະການປະຊາຊົນ ມີສິດຕິດຕາມກວດກາການເຄົາລົບກົດໝາຍຢ່າງຖືກຕ້ອງ ແລະ ເປັນເອກະພາບຢູ່ໃນທຸກກະຊວງ ອົງການທຽບເທົ່າກະຊວງ ອົງການທີ່ຂຶ້ນກັບລັດຖະບານ ແນວລາວສ້າງຊາດ ອົງການຈັດຕັ້ງມະຫາຊົນ ອົງການຈັດຕັ້ງສັງຄົມ ອົງການປົກຄອງທ້ອງຖິ່ນ ວິສາຫະກິດລັດຖະກອນ ແລະ ພົນລະເມືອງ ປະຕິບັດສິດກ່າວຟ້ອງ.
ລັດຖະທຳມະນູນ ໄດ້ກຳນົດໄວ້ວ່າສານປະຊາຊົນ ຈະຕັດສິນເປັນໝູ່ຄະນະ, ໃນເວລາພິຈາລະນາຕັດສິນ ຜູ້ພິພາກສາຕ້ອງເປັນເອກະລາດ ແລະ ມີແຕ່ປະຕິບັດຕາມກົດໝາຍເທົ່ານັ້ນ ນອກຈາກນັ້ນ ຍັງໄດ້ກຳນົດເຖິງການເຂົ້າຮ່ວມຂອງທະນາຍຄວາມ ແລະ ການຊ່ວຍເຫຼືອລູກຄວາມທາງດ້ານກົດໝາຍຄື ການໄຕ່ສວນຄະດີໃນທີ່ປະຊຸມສານ ຕ້ອງດຳເນີນຢ່າງເປີດເຜີຍ ເວັ້ນເສຍແຕ່ກໍລະນີທີ່ໄດ້ກຳນົດໄວ້ຢູ່ໃນກົດໝາຍ ຜູ້ຖືກຫາມີສິດຕໍ່ສູ້ຄະດີທີ່ຕົນຖືກກ່າວຟ້ອງ ທະນາຍຄວາມມີສິດຊ່ວຍເຫຼືອທາງດ້ານກົດໝາຍແກ່ຜູ້ຖືກກ່າວຟ້ອງ ສຳລັບຜູ້ຕາງ ໜ້າບັນດາອົງການຈັດຕັ້ງມີສິດເຂົ້າຮ່ວມການດຳເນີນຄະດີຢູ່ສານຕາມທີ່ໄດ້ກຳນົດໄວ້ໃນກົດໝາຍ.
ບັນດາມາດຕະການຕ່າງໆທີ່ກ່າວມານັ້ນ ໄດ້ຜັນຂະຫຍາຍອອກເປັນເນື້ອໃນລະອຽດໃນກົດໝາຍວ່າດ້ວຍການດຳເນີນຄະດີອາຍາ ປະມວນກົດໝາຍອາຍາ ກົດໝາຍວ່າດ້ວຍສານປະຊາຊົນ ກົດໝາຍວ່າດ້ວຍອົງການໄອຍະການປະຊາຊົນ ກົດໝາຍວ່າດ້ວຍທະນາຍຄວາມ ແລະ ກົດໝາຍອື່ນໆ.
ໂດຍ: ໄມ້ງັດ