ພິທີປະກາດການຈັດຕັ້ງ ເຈົ້າເມືອງ ຮອງເຈົ້າເມືອງ ຍົກຍ້າຍ ແລະ ແຕ່ງຕັ້ງພະນັກງານການນໍາພາ-ຄຸ້ມຄອງ ຂອງເມືອງນາຊາຍທອງ ນະຄອນຫຼວງວຽງຈັນ (ນວ) ຈັດຂຶ້ນວັນທີ 6 ສິງຫາ 2020 ຢູ່ເມືອງດັ່ງກ່າວ ໂດຍມີທ່ານ ສີຫຸນ ສິດທິລືໄຊ ຮອງເຈົ້າຄອງ ນວ ມີບັນດາທ່ານຕາງໜ້າຈາກ ນວ ຫ້ອງການອ້ອມຂ້າງເມືອງ ເລຂາພັກບ້ານ ນາຍບ້ານທົ່ວເມືອງ ເຂົ້າຮ່ວມ.
ທ່ານ ວຽງ ແພງສະຫວັນ ຫົວໜ້າຄະນະຈັດຕັ້ງ-ພະນັກງານ ເມືອງນາຊາຍທອງ ໄດ້ຜ່ານຂໍ້ຕົກລົງຂອງເຈົ້າຄອງ ນວ ວ່າດ້ວຍການແຕ່ງຕັ້ງເຈົ້າເມືອງນາຊາຍທອງ ໂດຍຕົກແຕ່ງຕັ້ງທ່ານ ວຽງຄໍາ ສີຫາໂຄດ ເປັນເຈົ້າເມືອງນາຊາຍທອງ ທ່ານ ພູວອນ ພົງລາດແກ້ວ ຫົວໜ້າຫ້ອງວ່າການປົກຄອງເມືອງນາຊາຍທອງ ເປັນຮອງເຈົ້າເມືອງນາຊາຍທອງ ຂໍ້ຕົກລົງຂອງເຈົ້າເມືອງນາຊາຍທອງ ແຕ່ງຕັ້ງທ່ານ ສາຄອນ ໃສສະອາດ ຄະນະພັກ ເປັນຫົວໜ້າຫ້ອງວ່າການປົກຄອງເມືອງນາຊາຍທອງ ທ່ານນາງ ແກ້ວມະນີ ແກ່ນປະເສີດ ຄະນະພັກ ເປັນປະທານສະຫະພັນກໍາມະບານເມືອງນາຊາຍທອງ ທ່ານ ພູວຽງ ເພຍທຽບ ຮອງເລຂາພັກ ປະທານກວດກາພັກ
ເປັນຫົວໜ້າອົງການກວດກາລັດເມືອງນາຊາຍທອງ ທ່ານ ສຸວັນທອງ ພົງໄຊຜົນ ແລະ ທ່ານນາງ ນວນຈັນ ຫຼວງມູນວັນ ຮອງປະທານກວດກາພັກ ເປັນຮອງຫົວໜ້າອົງການກວດກາລັດເມືອງນາຊາຍທອງ ທ່ານນາງ ຕຽງທອງ ສຸລິວົງ ຄະນະພັກ ເປັນປະທານສະຫະພັນແມ່ຍິງເມືອງນາຊາຍທອງ ທ່ານ ຈັນທະລາທິບ ກົມມະເມືອງ ເປັນຮອງຫົວໜ້າຫ້ອງການ-ການເງິນ ເມືອງນາຊາຍທອງ ທ່ານ ສຸວັນນີ ເພັງເມືອງຄູນ ເລຂາຄະນະພັກຮາກຖານກຸ່ມບ້ານອີ່ໄລ ເປັນຮອງຫົວໜ້າຫ້ອງການສຶກສາທິການ ແລະ ກີລາເມືອງນາຊາຍ ທ່ານ ບຸນຊູ ພະວິເສດ ຮອງເລຂາພັກ ປະທານກວດກາພັກ ຫົວໜ້າອົງການກວດກາລັດ ໄປປະຈໍາການຢູ່ຫ້ອງວ່າການປົກຄອງເມືອງນາຊາຍທອງ ທ່ານ ຄໍາພັນ ຂັນຕິລາດ ຫົວໜ້າຫ້ອງການສາທາລະນະສຸກເມືອງ ເປັນເລຂາຄະນະພັກຮາກຖານກຸ່ມບ້ານອີ່ໄລ ທ່ານ ສົມພອນ ອຸດຕະມະວັງໂສ ເປັນຄະນະພັກເມືອງ ເລຂາຄະນະພັກຮາກຖານກຸ່ມບ້ານໂພນທອງ ເພື່ອແນ ໃສ່ເຮັດໃຫ້ລະບົບການຈັດຕັ້ງມີຄວາມເຂັ້ມແຂງ ໃນການຈັດຕັ້ງປະຕິບັດໜ້າທີ່ວຽກງານທີ່ຖືກຕ້ອງ ແລະ ມີຄວາມສອດຄ່ອງກັບໜ້າທີ່ວຽກງານໃນໄລຍະໃໝ່ ນອກນີ້ ໃນພິທີຍັງໄດ້ມອບໃບຍ້ອງຂັ້ນ ນວ ໃຫ້ບຸກຄົນທີ່ຜົນງານດີເດັ່ນ ປະກອບສ່ວນທຶນຮ່ອນໃນກອງປະຊຸມໃຫຍ່ ຄັ້ງທີ VII ຂອງອົງຄະນະພັກເມືອງນາຊາຍທອງ ຕື່ມອີກ.
ທ່ານ ສີຫຸນ ສິດທິລືໄຊ ໄດ້ເນັ້ນໃຫ້ທ່ານເຈົ້າເມືອງ ຮອງເຈົ້າເມືອງ ແບ່ງວຽກງານໜ້າທີ່ຮັບຜິດຊອບໃຫ້ກັນຈັດຕັ້ງປະຕິບັດຢ່າງລະອຽດ ຈະແຈ້ງ ແລະ ຂັ້ນພະນັກງານນໍາພາ-ຄຸ້ມຄອງ ກໍແບ່ງໜ້າທີ່ວຽກງານໃຫ້ລະອຽດເຊັ່ນດຽວກັນ ເປັນເຈົ້າການປະຕິບັດແບບແຜນວິທີເຮັດວຽກຕາມມະຕິຂອງພັກ ມີຄວາມຮັບຜິດຊອບສູງ ເດັດດ່ຽວ ແກ້ໄຂບັນຫາຄົງຄ້າງ ສ້າງພະນັກງານຫັນລົງກໍ່ສ້າງຮາກຖານ ຕາມເນື້ອໃນ 4 ຄາດໝາຍໃຫ້ມີຄຸນນະພາບ ສ້າງໜ່ວຍພັກປອດໃສ ເຂັ້ມແຂງ ເຝິກຜົນຫຼໍ່ຫຼອມຕົນເອງປະຕິບັດໜ້າທີສັດຊື່ ມີຄວາມສາມັກຄີ ດໍາລົງຊີວິດແບບປອດໃສ ຂາວສະອາດ ພັດທະນາຕົນເອງດ້ວຍການສຶກສາຄົ້ນຫາຄວາມຮູ້ທັນກັບສະພາບການໄລຍະໃໝ່ ແລະ ສືບຕໍ່ເສີມຂະຫຍາຍມູນເຊື້ອຄວາມສາມັກຄີພາຍໃນພັກໃຫ້ແໜ້ນແຟ້ນຂຶ້ນເລື້ອຍໆ.
# ຂ່າວ & ພາບ: ວຽງມາ