ກອງປະຊຸມໃຫຍ່ຄັ້ງທີ VII ແນວລາວສ້າງຊາດເມືອງໄຊເຊດຖາ ນະຄອນຫຼວງວຽງຈັນ (ນວ) ຈັດຂຶ້ນວັນທີ 7 ສິງຫາ 2020 ທີ່ພັດຕາຄານດາວວຽງ 2 ເປັນປະທານຂອງສະຫາຍ ແສງ ພັນມະນີ ຄະນະພັກເມືອງ ປະທານແນວລາວສ້າງຊາດເມືອງໄຊເຊດຖາ ມີພະເຖລານຸເຖລະ ສະຫາຍ ຖະໜອມ ທຳທອງ ກຳມະການພັກ ນວ ປະທານແນວລາວສ້າງຊາດ ນວ ສະຫາຍ ໂພຄຳ ໄຊຍະສອນ ກຳມະການພັກ ນວ ເລຂາພັກເມືອງ ເຈົ້າເມືອງໄຊເຊດຖາ ພ້ອມດ້ວຍແຂກຖືກເຊີນເຂົ້າຮ່ວມ.
ສະຫາຍ ແສງ ພັນມະນີ ໄດ້ຜ່ານບົດລາຍງານການເມືອງທັງສອງພາກວ່າ: ຕະຫຼອດໄລຍະ 5 ປີຜ່ານມາ ຫ້ອງການແນວລາວສ້າງຊາດໄດ້ເອົາໃຈໃນການປະຕິບັດວຽກງານຕາມພາລະບົດບາດຂອງຕົນ ເຮັດໃຫ້ມີຜົນງານພົ້ນເດັ່ນຫຼາຍດ້ານ ເປັນຕົ້ນ ການສ້າງຄອບຄົວ ແລະ ບ້ານສາມັກຄີປອງດອງສຳເລັດ 48 ບ້ານ ມີຄອບຄົວທີ່ຢັ້ງຢືນເປັນຄອບຄົວສາມັກຄີໄດ້ 20.063 ຄອບຄົວ ຍັງບໍ່ໄດ້ຮັບການຢັ້ງຢືນ 171 ຄອບຄົວ ພ້ອມນັ້ນ ກໍໄດ້ເອົາໃຈໃສ່ສຶກສາອົບຮົມບັນດາຊັ້ນຄົນ ແລະ ອົງການຈັດຕັ້ງສັງຄົມ ສາມາດເກັບກຳຊັ້ນຄົນໄດ້ 5 ຊັ້ນຄົນ ຄື ຊົນຊັ້ນກຳມະກອນ ນັກຮຽນຮູ້ປັນຍາຊົນ ຜູ້ຊົງຄຸນວຸດທິ ນັກທຸລະກິດ-ການຄ້າຂາຍ ແລະ ຊົນຊັ້ນຊາວກະສິກອນ ສ້າງຕັ້ງກອງທຶນຊ່ວຍເຫຼືອເຊິ່ງກັນ ແລະ ກັນ ມີສະມາຊິກ 224 ສະຫາຍ ທົ່ວເມືອງມີວັດ 62 ວັດ ຖືສາສະໜາພຸດ 98,85% ຖືສາສະໜາເຢຊູຄຣິສ 0,58% ມີໂບດ 2 ໂບດ ຖືສາສະໜາບາຮາຍ 0,56% ປະກອບມີ 20 ຊົນເຜົ່າ ຜ່ານມາ ສາມາດໄກ່ເກ່ຍຂໍ້ຂັດແຍ່ງຕ່າງໆ 1.293 ກໍລະນີ ເປັນຕົ້ນ ຂໍ້ຂັດແຍ່ງລະຫວ່າງກຳມະການແນວລາວສ້າງຊາດບ້ານ ກັບເຈົ້າອະທິການວັດ ທີ່ດິນ ສິ່ງເສບຕິດ ຜົວເມຍຜິດຖຽງຢ່າຮ້າງກັນ ແລະ ອື່ນໆ ປຸກລະດົມໃນການປົກປັກຮັກສາຄວາມເປັນລະບຽບຮຽບຮ້ອຍຂອງສັງຄົມ ວັດທະນະທຳ ຮີດຄອງປະເພນີອັນດີງາມຂອງຊາດ ຊົນເຜົ່າເປັນຢ່າງດີ ຄົ້ນຄວ້າສະເໜີພະນັກງານເປົ້າໝາຍ ຕິດຕາມສ້າງເຂົ້າພັກ 3 ສະຫາຍ ສົ່ງພະນັກງານໄປຮຽນຍົກລະດັບຄວາມຮູ້ວິຊາສະເພາະ 5 ຄັ້ງ ຜ່ານການຈັດຕັ້ງປະຕິບັດວຽກງານໄລຍະຜ່ານມາ ສາມາດຈັດປະເພດຕີລາຄາບຸກຄົນດີເດັ່ນຂັ້ນຕ່າງໆໄດ້ຫຼາຍສະຫາຍ.
ສຳລັບທິດທາງແຜນການ ແລະ ຄາດໝາຍສູ້ຊົນໃນຕໍ່ໜ້າ ຈະເພີ່ມທະວີເຕົ້າໂຮມຄວາມສາມັກຄີປອງດອງທຸກຊັ້ນຄົນ ຊົນເຜົ່າ ທຸກເພດໄວ ທຸກສາສະໜາ ເປັນກຳລັງແຮງສັງລວມມະຫາສາມັກຄີຂອງວົງຄະນະຍາດແຫ່ງຊາດ ປັງປຸງການຈັດຕັ້ງແນວລາວສ້າງຊາດບ້ານໃຫ້ເຂັ້ມແຂງ ແລະ ມີປະສິດທິພາບດີຂຶ້ນກວ່າເກົ່າ ສູ້ຊົນສຶກສາອົບຮົມປະຊາຊົນບັນດາເຜົ່າ ຕັ້ງໜ້າປະກອບສ່ວນສ້າງເມືອງໄຊເຊດຖາເປັນສັງຄົມແຫ່ງຄວາມສາມັກຄີປອງດອງ ທຸກຊົນເຜົ່າ ຊັ້ນຄົນ ສາສະໜາ ເພດ ໄວ ຢູ່ຮ່ວມກັນ ຊ່ວຍເຫຼືອເຊິ່ງກັນ ແລະ ກັນ ສ້າງຄອບຄົວສາມັກຄີ ແລະ ບ້ານສາມັກຄີທີ່ຍັງບໍ່ທັນສຳເລັດ ແລະ ອື່ນໆ ນອກຈາກນີ້ກອງປະຊຸມໄດ້ປະຊາມະຕິແຕ່ງຕັ້ງເອົາສະຫາຍ ແສງ ພັນມະນີ ເປັນປະທານແນວລາວສ້າງຊາດ ສະຫາຍ ທັດທອນ ພົມສີ ເປັນຮອງ ທັງເປັນປະທານກວດກາ ແລະ ສະຫາຍນາງ ສິລິພອນ ໂຄດໃສ ເປັນຮອງປະທານ ແລະ ເປັນຮອງປະທານກວດກາ ພ້ອມກັນນັ້ນ ກໍໄດ້ມອບໃບຍ້ອງໃຫ້ບຸກຄົນທີ່ມີຜົນງານດີເດັ່ນໃນການປະຕິບັດໜ້າທີ່ວຽກງານໄລຍະຜ່ານມາ ແລະ ຮັບຟັງການໂອ້ລົມຈາກຂັ້ນເທິງອີກດ້ວຍ.