ກອງປະຊຸມພົບປະຄະນະສະເພາະກິດສົ່ງເສີມການຜະລິດ ແລະ ຊົມໃຊ້ຜະລິດຕະພັນທີ່ຜະລິດໄດ້ຢູ່ພາຍໃນ ແລະ ການຄຸ້ມຄອງການນຳເຂົ້າສິນຄ້າອຸປະໂພກ-ບໍລິໂພກ ຫຼື ຄະນະສະເພາະກິດ ຕາມຂໍ້ຕົກລົງ 51/ນຍ ກັບພາກສ່ວນກຸ່ມຜູ້ຜະລິດກະສິກຳອິນຊີ ກຸ່ມລ້ຽງສັດ ກຸ່ມຕະຫຼາດ ກຸ່ມພໍ່ຄ້າຄົນກາງ ແລະ ທະນາຄານທຸລະກິດຈຳນວນໜຶ່ງຂອງນະຄອນຫຼວງວຽງຈັນ (ນວ) ຈັດຂຶ້ນວັນທີ 6 ສິງຫາ 2020 ທີ່ຫ້ອງວ່າການປົກຄອງ ນວ ເປັນປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ຫົວໜ້າຄະນະສະເພາະກິດຕາມຂໍ້ຕົກລົງ 51/ນຍ ມີທ່ານ ອາດສະພັງທອງ ສີພັນດອນ ຮອງເຈົ້າຄອງ ນວ ພ້ອມດ້ວຍຮອງລັດຖະມົນຕີ ຫົວໜ້າກົມ ຮອງກົມ ພະແນກການ ຮອງເຈົ້າເມືອງອ້ອມຂ້າງ ທະນາຄານທຸລະກິດ ກຸ່ມຜະລິດ ເຈົ້າຂອງຕະຫຼາດ ພໍ່ຄ້າຄົນກາງ ແລະ ຂະແໜງການກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້ ໄດ້ຮັບຟັງສະພາບການຈັດຕັ້ງປະຕິບັດວຽກງານສົ່ງເສີມການຜະລິດ ຊົມໃຊ້ຜະລິດຕະພັນທີ່ຜະລິດໄດ້ຢູ່ພາຍໃນ ແລະ ການຄຸ້ມຄອງການນຳເຂົ້າສິນຄ້າອຸປະໂພກ-ບໍລິໂພກຢູ່ ນວ ຜ່ານການຈັດຕັ້ງປະຕິບັດວຽກງານຂອງຄະນະສະເພາະກິດຮ່ວມກັບ ນວ ສາມາດກຳໄດ້ຫຼາຍບັນຫາທີ່ເປັນດ້ານດີ-ດ້ານອ່ອນ ທ່າແຮງບົ່ມຊ້ອນ ແລະ ບາງຂໍ້ຈຳກັດຂອງບັນດາຫົວໜ່ວຍຜູ້ຜະລິດ ຕະຫຼາດຂາຍຍົກ-ຂາຍຍ່ອຍ ພໍ່ຄ້າຄົນກາງ ຜູ້ຊົມໃຊ້ ແລະ ການເຂົ້າຫາແຫຼ່ງທຶນ ແລະ ສິ່ງທ້າທາຍ ເຊິ່ງຢູ່ ນວ ເປັນຈຸດການທົດລອງວຽກງານດັ່ງກ່າວ ເພື່ອຮັບຮູ້ໄດ້ເຖິງບົດຮຽນ ສະພາບການຕົວຈິງຈາກຜູ້ລົງມືຈັດຕັ້ງປະຕິບັດ ເພື່ອໃຫ້ຄະນະສະເພາະກິດ ສັງລວມໄດ້ບັນຫາສິ່ງທ້າທາຍ ຂໍ້ສະດວກ ແລະ ຂໍ້ຫຍຸ້ງຍາກໃນການກຳນົດທິດທາງແກ້ໄຂໃຫ້ທັນສະພາບການຕົວຈິງ ສາມາດຈັດຕັ້ງປະຕິບັດໄດ້ ແລະ ສອດຄ່ອງກັບພື້ນຖານການຜະລິດໃນແຕ່ລະຂັ້ນ ພ້ອມນັ້ນ ໄດ້ພ້ອມກັນປຶກສາຫາລືບາງບັນຫາຄື: ຄວາມຄືບໜ້າຂອງວຽກງານຕ່າງໆນັບແຕ່ກອງປະຊຸມຄັ້ງຜ່ານມາຮອດປັດຈຸບັນ ປຶກສາຫາລືເພື່ອແກ້ໄຂບັນຫາການເຂົ້າເຖິງສິນເຊື່ອຂອງຜູ້ປະກອບການ ກຸ່ມການຜະລິດ ໃຫ້ສາມາດເຂົ້າເຖິງແຫຼ່ງທຶນໃນອັດຕາດອກເບ້ຍສົມເຫດສົມຜົນ ບໍ່ມີຫຼັກຊັບຄ້ຳປະກັນ ແຕ່ຮັບປະກັນໃຫ້ທຶນຮອນທີ່ກູ້ຢືມໄປ ນຳໃຊ້ຢ່າງມີປະສິດທິຜົນ ເພື່ອເຮັດໃຫ້ວຽກງານການຜະລິດພາຍໃນນັບມື້ນັບເຕີບໃຫຍ່ຂະຫຍາຍຕົວ ສາມາດຕອບສະໜອງໄດ້ຄວາມຕ້ອງການພາຍໃນ ແລະ ສາມາດສົ່ງອອກ ນອກນັ້ນ ໄດ້ຮັບຟັງຄຳເຫັນຂອງຜູ້ຜະລິດ (ຜູ້ຕ້ອງການທຶນຮອນ) ແລະ ຜູ້ໃຫ້ສິນເຊື່ອ (ທະນາຄານ) ເພື່ອໃຫ້ມີຄວາມເຂົ້າໃຈເປັນເອກະພາບ ແລ້ວສາມາດຕົກລົງກັນໄດ້ ຈາກນັ້ນຈຶ່ງຈະໄດ້ສົມທົບກັບຜູ້ຊົມໃຊ້ (ຕະຫຼາດ).
ທ່ານ ສົມດີ ດວງດີ ກ່າວວ່າ: ໃນເດືອນພຶດສະພາ ຫາ ມີຖຸນາ ປີ 2020 ຄະນະສະເພາະກິດຂອງພວກເຮົາໄດ້ລົງເກັບກຳຂໍ້ມູນສະພາບຕົວຈິງຢູ່ຈຸດການຜະລິດຈຳນວນໜຶ່ງຂອງນະຄອນຫຼວງວຽງຈັນ ໂດຍສະເພາະແມ່ນກຸ່ມການຜະລິດກະສິກຳພືດຜັກອິນຊີໃນເຂດບ້ານທົ່ງມັງ ບ້ານໂນນແຕ້ ບ້ານທ່າສົ້ມມໍ ແລະ ເວີນຄຳ ຫຼັງຈາກນັ້ນ ກໍໄດ້ສັງລວມລາຍງານສະພາບຕົວຈິງໃຫ້ແກ່ລັດຖະບານຮັບຊາບເປັນໄລຍະ ປັດຈຸບັນ ລັດຖະບານໄດ້ສືບຕໍ່ນຳໃຊ້ມາດຕະການຕ້ານ ແລະ ສະກັດກັ້ນການແຜ່ລະບາດຂອງເຊື້ອພະຍາດໂຄວິດ-19 ລວມໄປເຖິງນະໂຍບາຍຊ່ວຍເຫຼືອ ແລະ ບັນເທົາຜູ້ທີ່ໄດ້ຮັບຜົນກະທົບຈາກການລະບາດຂອງພະຍາດດັ່ງກ່າວ ເຊິ່ງໄດ້ສ່ອງແສງໃຫ້ເຫັນເຖິງຄວາມຈຳເປັນຂອງວຽກງານສົ່ງເສີມການຜະລິດ ແລະ ຄວາມຕ້ອງການຜະລິດພັນທີ່ຜະລິດໄດ້ຢູ່ພາຍໃນ ເຫັນໄດ້ຈາກໄລຍະການຈັດຕັ້ງປະຕິບັດມາດຕະການປິດເມືອງ ຫຼື Lockdown ຍິ່ງເຮັດໃຫ້ເຫັນຄວາມອາດສາມາດໃນການສະໜອງ ແລະ ຄວາມຕ້ອງການພາຍໃນເວລາທີ່ພວກເຮົາມີການຈຳກັດ ຮັດກຸມການນຳເຂົ້າ ສະນັ້ນ ມັນຮຽກຮ້ອງໃຫ້ພວກເຮົາຍິ່ງເພີ່ມທະວີການເພິ່ງພາ ແລະ ກຸ້ມຕົນເອງໃຫ້ຫຼາຍຂຶ້ນ ໂດຍໃຫ້ຄະນະສະເພາະກິດຕາມຂໍ້ຕົກລົງ 51/ນຍ ກະກຽມຄວາມພ້ອມຮອບດ້ານ ເພື່ອຈັດຕັ້ງປະຕິບັດແຜນຊຸກຍູ້ການຜະລິດໃນລະດູຝົນປີ 2020 ໃຫ້ສາມາດລົງມືແຕ່ຫົວປີ ແລະ ທັນລະດູການ ສືບຕໍ່ສຸມທຶນຮອນ ສະໜອງແນວພັນພືດ ແນວພັນສັດ ແລະ ເຕັກນິກວິຊາການເຂົ້າໃສ່ການຜະລິດກະສິກຳ ການຜະລິດກະສິກຳອິນຊີ-ກະສິກຳສະອາດ ຕາມທ່າແຮງຂອງປະເທດເຮົາ ເພື່ອຄ້ຳປະກັນຄວາມໝັ້ນຄົງທາງດ້ານສະບຽງອາຫານໃຫ້ພຽງພໍກັບການບໍລິໂພກພາຍໃນ ແລະ ກ້າວໄປເປັນສິນຄ້າສົ່ງອອກ ສະນັ້ນ ຂໍຮຽກຮ້ອງໃຫ້ທຸກພາກສ່ວນ ຖືເອົາວິກິດຊ່ວງໄລຍະການແຜ່ລະບາດພະຍາດໂຄວິດ-19 ໃຫ້ເປັນໂອກາດໃນການສົ່ງເສີມການຜະລິດ ເພື່ອສະໜອງໃຫ້ແກ່ການບໍລິໂພກພາຍໃນ-ການສົ່ງອອກ ພ້ອມທັງສຸມໃສ່ຜະລິດສິນຄ້າທີ່ຕະຫຼາດຕ້ອງການ ມີທ່າແຮງໄດ້ປຽບ ມີຜົນຕອບແທນສູງ ແລະ ອື່ນໆ ໂດຍນຳໃຊ້ເຄື່ອງມືເຕັກນິກເຂົ້າຊ່ວຍໃນການຜະລິດ ເພື່ອຮັບປະກັນໃຫ້ຜົນຜະລິດໃຫ້ໄດ້ຫຼາຍ ແລະ ມີຄຸນນະພາບສູງ.