ທ່ານ ເວີນສະຫວັນ ສີວິໄຊຫົວໜ້າຄູເຝິກສະໂມສອນ ເອັດທີທີ ເອັຟຊີ ໃຫ້ສຳພາດເມື່ອບໍ່ດົນມານີ້ ໃຫ້ຮູ້ວ່າ: ຫຼັງຈາກລົງສະໜາມນັດທຳອິດ ວັນທີ 26 ກໍລະກົດຜ່ານມາ ເອົາຊະນະທີມນ້ອງໃໝ່ ສະໂມສອນ ບີແກນ ຢູໄນເຕັດ 3-1 ປະຕູ ກໍມີໂອກາດພັກທີມເຖິງໜຶ່ງອາທິດ ແລະ ແຂ່ງຂັນໜ້ອຍກວ່າທີມເມືອງຫາດ ຢູໄນເຕັດ ທີມນຳກຸ່ມທີ່ລົງແຂ່ງຂັນໄປ 2 ນັດ ເກັບ 6 ຄະແນນ ປັດຈຸບັນກໍກ້າວສູ່ອາທິດທີ 3 ທີມພວກເຮົາໃນເວລານີ້ ບອກໄດ້ເລີຍວ່າທຸກຄົນມີສະພາບຈິດໃຈດີ ມີສຸຂະພາບກາຍແຂງແຮງ ມີພະລະກຳລັງດີ ເອົາໃຈໃສ່ຕໍ່ການເຝິກຊ້ອມ ແລະ ພ້ອມເກັບ 3 ຄະແນນນຳ ເອັດອີຊີ ຢູໄນເຕັດ.
ສຳລັບທຸກທີມທີ່ເຂົ້າຮ່ວມແຂ່ງຂັນ 14 ສະໂມສອນ ໂດຍສະເພາະ ກຸ່ມ B ລ້ວນແຕ່ເປັນທີມທີ່ເກ່ງ ສຳຄັນແມ່ນຂຶ້ນກັບການລົງສະໜາມແຕ່ລະນັດຈະວາງແຜນ ແລະ ປຸກລະດົມນັກກີລາໄດ້ສ່ຳໃດ ເອັດທີທີ ຈະບໍ່ປະມາດເດັດຂາດ ເກມພົບ ເອັດອີຊີ ຢູໄນເຕັດ ຈະພະຍາຍາມເນັ້ນເກມບຸກຢ່າງຮັດກຸມ ແລະ ເຊື່ອວ່າລູກທີມຈະສາມາດເກັບໄຊຊະນະຈາກທີມດັ່ງກ່າວໄດ້.
ຕະລາງການແຂ່ງຂັນອາທິດທີ 3 ສະເພາະວັນທີ 8 ສິງຫາ 2020 ຢູ່ສະໜາມກີລາສູນເຝິກບານເຕະແຫ່ງຊາດ (ຫ້ວຍຫົງ) ຄູ່ທີ 1 ເຄພີເອັດ ພົບ ກອງທັບ ເວລາ 9:00 ໂມງ ສະໜາມ 1 ຄູ່ທີ 2 ນະຄອນຫຼວງ ເອັຟຊີ ພົບ ເຮັດບີທີ 941 ເອັຟຊີ ເວລາ 16:00 ໂມງ ສະໜາມ 1 ຄູ່ທີ 3 ກາຣູດາ ເອັຟຊີ ພົບວຽງຈັນ ຢູໄນເຕັດ ເວລາ 16:00 ໂມງ ສະໜາມ 2 ສ່ວນວັນທີ 9 ສິງຫາ 2020 ຢູ່ສະໜາມກີລາສູນເຝິກບານເຕະແຫ່ງຊາດ (ຫ້ວຍຫົງ) ຄູ່ທີ 1 ເຄຣສ໌ ຢູໄນເຕັດ ພົບ ລາວ-ທ໋ອບ ເອັຟຊີ ເວລາ 16:00 ໂມງ ສະໜາມ 1 ຄູ່ ທີ 2 ເມືອງຫາດ ຢູໄນເຕັດ ພົບບີແກນ ຢູໄນເຕັດ ເວລາ 16:00 ໂມງ ສະໜາມ 2 ຄູ່ທີ 3 ຢູ່ສະໜາມກີລາແຫ່ງຊາດ (ຫຼັກ 16) ສະໜາມນອກ ເອັດທີທີ ເອັຟຊີ ພົບ ເອັດອີຊີ ຢູໄນເຕັດ ເວລາ 16:00 ໂມງ.