ໃນໄລຍະຜ່ານມາ ຄໍລຳຈະລາຈອນພວກເຮົາ ໄດ້ນຳສະເໜີຫຼາຍໆຫົວຂໍ້ ເພື່ອສ່ອງແສງໃຫ້ສັງຄົມໄດ້ຮູ້ເຖິງຂໍ້ມູນຂ່າວສານຂອງສະພາບການສັນຈອນ ໃນນະຄອນຫຼວງວຽງຈັນ ກໍຄື ຂອບເຂດທົ່ວປະເທດ ແລະ ໃນນັ້ນ ກໍລວມໄປເຖິງການນຳສະເໜີລະບຽບການຕ່າງໆ ເພື່ອເປັນການທວນຄືນ ເຕືອນສະຕິໃຫ້ບັນດານັກຂັບຂີ່ເປັນເຈົ້າການ ໃນການຈັດຕັ້ງປະຕິບັດກົດລະບຽບການສັນຈອນຢ່າງເຂັ້ມງວດ.
ດັ່ງນັ້ນ ໃນມື້ນີ້ຄໍລຳຈະລາຈອນພວກເຮົາ ຈຶ່ງຂໍນຳສະເໜີຄືນໃໝ່ກ່ຽວກັບຂໍ້ຫ້າມ ສຳລັບຜູ້ນຳໃຊ້ເສັ້ນທາງທີ່ລະບຸໃນມາດຕາ 51 ຂອງກົດໝາຍຈະລາຈອນທາງບົກ ມາໃຫ້ບັນດາເພື່ອນຜູ້ອ່ານທັງຮູ້ແລ້ວ ແລະ ຍັງບໍ່ທັນຮູ້ລະອຽດນຳໄປຈັດຕັ້ງປະຕິບັດ ເພື່ອສ້າງຄວາມເປັນລະບຽບຮຽບຮ້ອຍຕາມຖະໜົນຫົນທາງ ກ້າວໄປສູ່ການຫຼຸດຜ່ອນການເກີດອຸບັດເຫດ.
ໃນມາດຕາດັ່ງກ່າວ ຫ້າມຜູ້ໃຊ້ເສັ້ນທາງມີພຶດຕິກຳດັ່ງນີ້: ຂັບຂີ່ໃນສະພາບມຶນເມົາ ຂັບຂີ່ພາຫະນະໄວເກີນກຳນົດ ຂັບເຈີດຊ້າຍ ເຈີດຂວາ ຊ່ວງຊີງຍານພາຫະນະອື່ນໆ ດ້ວຍຄວາມປະໝາດ ແລະ ບໍ່ຖືກກົດຈະລາຈອນ ໃຊ້ໂທລະສັບມືຖື ແລະ ເຄື່ອງຫຼິ້ນເອເລັກໂຕຣນິກປະເພດຕ່າງໆ ໃນເວລາຍ່າງຂ້າມທາງ ໃຊ້ໂທລະສັບມືຖືເບິ່ງໂທລະພາບ ຮູບພາບ VCD DVD ເຄື່ອງຫຼິ້ນເອເລັກໂຕຣນິກປະເພດຕ່າງໆໃນເວລາຂັບຂີ່ ຍ່າງຮຽງກັນເປັນໜ້າກະດານ ເປັນພຶງ ເປັນແພ ທີ່ກີດຂວາງການສັນຈອນ ກັ້ງຄັນຮົ່ມເວລາຂັບຂີ່ລົດຈັກ ລົດຖີບ ບັນທຸກຜູ້ໂດຍສານເກີນຈຳນວນສິນຄ້າເກີນນ້ຳໜັກ ແລະ ຂະໜາດທີ່ກຳນົດ ບັນທຸກວັດຖຸອັນຕະລາຍໂດຍບໍ່ໄດ້ຮັບອະນຸຍາດ ສ້ອມແປງຍານພາຫະນະຢູ່ກາງທາງ ກາງຂົວ ເປີດເຄື່ອງສຽງດັງເກີນກຳນົດໃນເວລາຂັບຂີ່ແຂ່ງລົດທຸກຊະນິດຕາມເສັ້ນທາງ ໂດຍບໍ່ໄດ້ຮັບອະນຸຍາດ ປະຖ່ອນໄມ້ ຝົດໄມ້ ກ້ອນຫີນ ຫຼື ສິ່ງກີດຂວາງອື່ນໆທີ່ໜູນຕີດລົດໄວ້ຕາມເສັ້ນທາງ ແລະ ພຶດຕິກຳອື່ນໆທີ່ເປັນການລະເມີດລະບຽບກົດໝາຍ.
ນັ້ນຖືວ່າເປັນຂໍ້ຫ້າມທີ່ໄດ້ກຳນົດໄວ້ໃນກົດໝາຍຢ່າງຈະແຈ້ງ ແລະ ໃນບັນດາຂໍ້ຫ້າມນັ້ນ ທຸກທ່ານກໍຈະພົບເຫັນໄດ້ໃນຊີວິດປະຈຳວັນ ເຊິ່ງການປະຕິບັດກັບຂໍ້ຫ້າມທີ່ລະບຸໄວ້ນັ້ນ ສິ່ງທີ່ຕາມມາກໍຄືການເກີດອຸບັດເຫດ ສິ່ງທີ່ເຫັນໄດ້ໃນສື່ຕ່າງໆຢູ່ເປັນປະຈຳນັ້ນ ກໍຄື ການດື່ມສິ່ງມຶນເມົາແລ້ວຂັບຂີ່ ຂັບຂີ່ໄວເກີນກຳນົດ ແລະ ອື່ນໆ.
ນອກຈາກບັນດາຂໍ້ຫ້າມທີ່ກ່າວມາຂ້າງເທິງນັ້ນແລ້ວ ສິ່ງສຳຄັນກໍຄືນັກຂັບຂີ່ເອງກໍຕ້ອງມີສະຕິໃນການຂັບຂີ່ ກໍຄື ມີສະຕິຕໍ່ລະບຽບກົດໝາຍ ກໍຄື ລະບຽບການສັນຈອນ ບັນດານິຕິກຳລຸ່ມກົດໝາຍ ເຊິ່ງເປັນປັດໄຈສຳຄັນ ເພື່ອເຮັດໃຫ້ການສັນຈອນ ໃນນະຄອນຫຼວງວຽງຈັນ ກໍຄື ໃນຂອບເຂດທົ່ວປະເທດມີຄວາມເປັນລະບຽບຮຽບຮ້ອຍ.
ໂດຍ: ເມັດຝົນ