ປັດຈຸບັນ ວຽກງານສື່ມວນຊົນລາວ ໄດ້ຮັບການພັດທະນາເຕີບໃຫຍ່ເຂັ້ມແຂງນັບທັງດ້ານປະລິມານ ແລະ ຄຸນນະພາບທັນສະໄໝດີຂຶ້ນເທື່ອລະກ້າວ ພ້ອມທັງສາມາດເຊື່ອມໂຍງກັບພາກພື້ນ ແລະ ສາກົນ ໂດຍສະເພາະແມ່ນໄດ້ມີການພັດທະນາຮ່ວມມືແບບການນຳສະເໜີບົດຂ່າວ ຜ່ານໜັງສືພິມ ວິທະຍຸ ໂທລະພາບ ແລະ ອື່ນໆ ເຮັດໃຫ້ສື່ມວນຊົນລາວມີບົດບາດສູງເດັ່ນຂຶ້ນໃນສັງຄົມ.
ການເຕີບໃຫຍ່ຂະຫຍາຍຕົວຂອງວຽກງານດັ່ງກ່າວ ໄດ້ປະກອບສ່ວນສຳຄັນ ເຮັດໃຫ້ການເຂົ້າເຖິງຂໍ້ມູນຂ່າວສານຂອງພໍ່ແມ່ປະຊາຊົນລາວບັນດາເຜົ່າ ນັບມື້ກວ້າງຂວາງ ກໍຄື ປະກອບສ່ວນເຂົ້າໃນການພັດທະນາເສດຖະກິດ-ສັງຄົມໃຫ້ນັບມື້ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ ດັ່ງນັ້ນຈຶ່ງສາມາດເວົ້າໄດ້ວ່າສື່ມວນຊົນລາວມີການເຕີບໃຫຍ່ເຂັ້ມແຂງໄປຕາມສະພາບການພັດທະນາໃນແຕ່ລະໄລຍະ.
ທ່ານນາງ ມາໄລລັກ ສີປະໄພ ນັກຂ່າວ ສຳນັກຂ່າວສານປະເທດລາວ ໃຫ້ສຳພາດໃນໂອກາດວັນສື່ມວນຊົນຄົບຮອບ 70 ປີ ວ່າ: ເນື່ອງໃນໂອກາດວັນສ້າງຕັ້ງສື່ມວນຊົນ ຄົບຮອບ 70 ປີ ຂ້າພະເຈົ້າໃນນາມທີ່ເປັນສື່ມວນຊົນລາວຜູ້ໜຶ່ງ ຮູ້ສຶກເປັນກຽດ ແລະ ພາກພູມໃຈທີ່ໄດ້ປະກອບສ່ວນພາລະໜ້າທີ່ ທີ່ສຳຄັນໃນການເຜີຍແຜ່ຂໍ້ມູນຂ່າວສານໄປຕາມແນວທາງນະໂຍບາຍຂອງພັກ ລະບຽບກົດໝາຍຂອງລັດອອກສູ່ສາຍຕາຂອງປະຊາຊົນຄົນລາວ ເພື່ອສ່ອງແສງຄວາມເປັນຈິງ ແລະ ຕໍ່ຕ້ານປາກົດການຫຍໍ້ທໍ້ດ້ານຕ່າງໆທີ່ເກີດຂຶ້ນໃນສັງຄົມທັງພາຍໃນ ແລະ ຕ່າງປະເທດ.
ຕະຫຼອດໄລຍະຜ່ານມາເຫັນໄດ້ວ່າວຽກງານສື່ແມ່ນມີການພັດທະນາຢ່າງວ່ອງໄວ ເຊິ່ງເຫັນໄດ້ຈາກການເຕີບໂຕຂອງສື່ມວນຊົນແມ່ນມີຈຳນວນເພີ່ມຂຶ້ນ ໂດຍສະເພາະສື່ອອນລາຍ ສື່ມວນຊົນເຂົ້າມາມີບົດບາດຕໍ່ຊີວິດປະຈຳວັນຂອງຄົນລາວ ແລະ ຄົນໃນທົ່ວໂລກ.
ຈາກການເຕີບໃຫຍ່ຂະຫຍາຍຕົວດັ່ງກ່າວໃນນາມສວ່ນຕົວແລ້ວ ຂ້າພະເຈົ້າຄິດວ່າ ສື່ມວນຊົນ ຫຼື ຜູ້ສື່ຂ່າວທຸກຄົນແມ່ນມີຄວາມຮູ້ຄວາມສາມາດ ບວກກັບປະສົບການແລ້ວ ກໍສາມາດພັດທະນາວຽກງານສື່ມວນຊົນຂອງລາວເຮົາໃຫ້ສືບຕໍ່ຂະຫຍາຍຕົວ ແຕ່ຖ້າທຽບກັບສື່ຕ່າງປະເທດແລ້ວເຫັນວ່າເຮົາຍັງມີຫຼາຍຢ່າງທີ່ຕ້ອງໄດ້ຮັບການພັດທະນາ ແລະ ປັບປຸງຂຶ້ນຕື່ມ ເຊັ່ນ: ເລື່ອງພາສາປາກເວົ້າ ໂດຍສະເພາະ ພາສາອັງກິດຂອງສື່ມວນຊົນລາວຍັງຕ້ອງໄດ້ຮັບການປັບປຸງ ແລະ ພັດທະນາເພື່ອເຮັດໃຫ້ມີປະສິດທິພາບຫຼາຍຍິ່ງຂຶ້ນ.
ທ່ານນາງ ກິນດາວັນ ອ້ວນນາຄູ ນັກຂ່າວໜັງສືພິມແຂວງສາລະວັນ ໃຫ້ສຳພາດວ່າ: ເນື່ອງໃນໂອກາດວັນສື່ມວນຊົນລາວ ຂ້າພະເຈົ້າຮູ້ສຶກເອກອ້າງທະນົງໃຈຕໍ່ກັບການເຕີບໃຫຍ່ຂອງອົງການສື່ມວນຊົນລາວຕະຫຼອດໄລຍະ 70 ປີຜ່ານມາ ສຳລັບສື່ມວນຊົນແຂວງສາລະວັນກໍໄດ້ຮັບການພັດທະນາ ແລະ ປັບປຸງໃຫ້ນັບມື້ດີຂຶ້ນ ຈາກໃບຂ່າວ ໂທລະໂຄ່ງ ກໍໄດ້ຮັບການພັດນາມາເປັນໜັງສືພິມ ວິທະຍຸກະຈາຍສຽງ ໂທລະພາບແຂວງ ແລະ ໃນຍຸກທີ່ມີການເຕີບໃຫຍ່ຂອງສື່ສັງຄົມອອນລາຍ ສື່ໃນແຂວງສາລະວັນ ກໍໄດ້ປັບຕົວໃຫ້ທັນກັບການພັດທະນາ ແລະ ປັບປຸງໃຫ້ທັນສະພາບການ ໂດຍການສ້າງເວັບໄຊ ສ້າງເປັນເພຈ ເພື່ອເຮັດໃຫ້ການລາຍງານຂ່າວວ່ອງໄວທັນກັບເຫດການ.
ນັ້ນກໍເປັນບາງຄວາມຄິດເຫັນຂອງພະນັກງານວິຊາການສື່ມວນຊົນລາວເຮົາ ທີ່ມີຫຼາຍມູມມອງຕໍ່ກັບການເຕີບໃຫຍ່ຂະຫຍາຍຕົວຂອງອົງການສື່ມວນຊົນຕະຫຼອດໄລຍະ 70 ປີຜ່ານມາ ແຕ່ຢ່າງໃດກໍຕາມ ສື່ມວນຊົນລາວເຮົາກໍຕ້ອງສືບຕໍ່ພັດທະນາຕົນໃຫ້ນັບມື້ເຕີບໃຫຍ່ ເຊັ່ນ: ດຽວກັບຄຳສຳພາດຂອງທ່ານ ສະຫວັນຄອນ ຣາຊມຸນຕີ ຮອງລັດຖະມົນຕີ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ໄດ້ໃຫ້ສຳພາດຕໍ່ສື່ມວນຊົນເນື່ອງໃນໂອກາດວັນສື່ມວນຊົນ ຄົບຮອບ 68 ປີ ຕໍ່ໜັງສືພິມລາວພັດທະນາວ່າ: ເພື່ອຮັບປະກັນ 4 ລັກສະນະນີ້ ສື່ເຮົາຕ້ອງເລັ່ງສ້າງບຸຄະລາກອນທີ່ເກ່ງ ແລະ ປັບປຸງເຄື່ອງມືໃຫ້ທັນສະໄໝເຂົ້າໃນວຽກງານ ພິເສດແມ່ນຈະຕ້ອງໄດ້ເພີ່ມທະວີນຳພາແນວຄິດການເມືອງໃຫ້ຜູ້ເຮັດວຽກງານສື່ໃຫ້ໜັກແໜ້ນ ບໍ່ດັ່ງນັ້ນຈະນຳໃຊ້ໄປໃນທາງທີ່ຜິດ ແລະ ບໍ່ມີປະສິດທິຜົນ ພ້ອມກັນນັ້ນກໍຕ້ອງເຊີດຊູຄວາມຮັບຜິດຊອບທາງດ້ານການເມືອງໃຫ້ສູງ ແລະ ຢຶດໝັ້ນຕາມກົດໝາຍວ່າດ້ວຍສື່ມວນຊົນ ເພື່ອສ້າງຕົນເອງໃຫ້ເປັນເວທີສະແດງຄວາມຄິດເຫັນ ສ່ອງແສງສັງຄົມຮັບຮູ້ ແລະ ເຂົ້າໃຈບັນຫາຕ່າງໆໄດ້ຖືກຕ້ອງ.
ໂດຍ: ສ.ຣາຊະສີ