ຄອນແທກເລນ ທາງເລືອກຂອງຄົນບໍ່ຢາກໃສ່ແວ່ນຕາ ແລະ ສຳລັບຄົນທີ່ຢາກມີຕາໃຫຍ່ໆ ຫຼື ຕ້ອງການເພີ່ມສີສັນໃຫ້ກັບດວງຕາ ກໍນິຍົມໃສ່ຄອນແທກເລນກັນຈົນເປັນເລື່ອງປົກກະຕິ ຊຶ່ງມີຫຼາຍແບບໃຫ້ເລືອກ ທັງໃສ່ລາຍວັນ ລາຍອາທິດ ລາຍປີ ແລ້ວແຕ່ຕາມຄວາມເໝາະສົມໃນບາງຄັ້ງ ການໃສ່ຄອນແທກເລນກໍມີຂໍ້ຈຳກັດ ບາງຄົນໃສ່ແລ້ວເຄືອງຕາ ໜ່ວຍຕາແຫ້ງ… ເປັນເພາະດວງຕາເປັນອະໄວຍະວະທີ່ສຳຄັນ ແລະ ບອບບາງຫຼາຍ ດັ່ງນັ້ນ ຈຶ່ງຕ້ອງເລືອກໃສ່ຄອນແທກເລນໃຫ້ຖືກວິທີ ແລະ ປອດໄພ ຈະໄດ້ບໍ່ເກີດອັນຕະລາຍກັບດວງຕາໄດ້ ເຊິ່ງແພດໄດ້ແນະນຳຂໍ້ຄວນຮູ້ສຳລັບຄົນທີ່ຕ້ອງໃສ່ຄອນແທກເລນດັ່ງນີ້:
1. ອາການທີ່ພົບສ່ວນໃຫຍ່ຂອງຄົນທີ່ໃສ່ຄອນແທກເລນ ຄື: ເຄືອງຕາ ຕາແຫ້ງ ຕາມົວ ບາງຄັ້ງຮູ້ສຶກໜັກຕາ ນ້ຳຕາໄຫຼ ບໍ່ສະບາຍຕາ ຄ້າຍມີເສດຝຸ່ນຢູ່ໃນຕາ.
2. ບໍ່ຄວນໃສ່ຄອນແທກເລນຕິດຕໍ່ກັນເປັນເວລາດົນນານໃນແຕ່ລະວັນ ແລະ ຄວນໃຊ້ແວ່ນສາຍຕາໃນບາງວັນ ເພື່ອເປັນການຢຸດພັກໃຫ້ແກ້ວຕາດູດຊຶມອົກຊິແຊນໄດ້ຕາມປົກກະຕິ.
3. ບໍ່ໃສ່ນອນ ຫຼືໃສ່ຂ້າມຄືນ ເພາະການໃສ່ຄອນແທກເລນ ເຮັດໃຫ້ອົກຊິແຊນຜ່ານເຂົ້າໄປໃນຕາໄດ້ໜ້ອຍລົງ ມີໂອກາດຕິດເຊື້ອຈາກຄອນແທກ ເລນສູງຂຶ້ນ.
4. ຄວນຖອດລ້າງ ແລະ ແຊ່ຄອນແທກເລນເພື່ອຂ້າເຊື້ອໂຣກດ້ວຍນ້ຳຢາຂ້າເຊື້ອທີ່ໄດ້ມາດຕະຖານເທົ່ານັ້ນ ແລະ ຕ້ອງແຊ່ນ້ຳຢາຕິດຕໍ່ກັນຢ່າງໜ້ອຍ 6 ຊົ່ວໂມງ ເພື່ອໃຫ້ການຂ້າເຊື້ອໂຣກເປັນໄປຢ່າງມີປະສິດທິພາບ.
5. ການໃຊ້ນ້ຳເກືອເຮັດຄວາມສະອາດ ຫຼື ແຊ່ຄອນແທກເລນ ຈະເຮັດໃຫ້ໂອກາດການຕິດເຊື້ອສູງຂຶ້ນຫຼາຍ.
6. ຄວນປ່ຽນຄອນແທກເລນຕາມອາຍຸທີ່ກຳ ນົດ ແລະ ບໍ່ໃສ່ຄອນແທກເລນຮ່ວມກັບຜູ້ອື່ນ.
7. ນ້ຳຕາທຽມ ມີສ່ວນປະສົມຂອງນ້ຳຕາ ອິເລກໂຕຣໄລ ຊຶ່ງເປັນສານທີ່ຈຳເປັນສຳລັບແກ້ວຕາ ຫຼາຍກວ່າຢາຢອດຕາສຳລັບຄອນແທກເລນ ຫາກມີບັນຫາເຄືອງຕາ ໜ່ວຍຕາແຫ້ງ ຄວນໃຊ້ນ້ຳຕາທຽມ.
8. ຢາຢອດຕາສຳລັບຄົນໃສ່ຄອນແທກເລນຄວນຢອດກ່ອນໃສ່ຄອນແທກເລນລະຫວ່າງໃສ່ ແລະ ກ່ອນຖອດຄອນແທກເລນ ຈະຊ່ວຍເພີ່ມຄວາມຊຸ່ມຊື່ນ ເຮັດໃຫ້ເກີດຄວາມສະບາຍຕາ ພາບຄົມແຈ້ງຂຶ້ນ ແລະ ເຮັດໃຫ້ອາການຕາແຫ້ງໜ້ອຍລົງ.
9. ຄອນແທກເລນຊະນິດໃສ່ລາຍວັນ ສາມາດໃຫ້ອົກຊິແຊນຜ່ານໄດ້ດີທີ່ສຸດ ແລະ ເນື່ອງຈາກຖອດຖິ້ມທຸກວັນ ຈຶ່ງເຮັດໃຫ້ມີການສະສົມໂປຣ ຕິນໃນຄອນແທກເລນໜ້ອຍ ແລະ ເກີດອາການ ເຄືອງໄດ້ໜ້ອຍກວ່າຊະນິດອື່ນໆ ແຕ່ມີລາຄາສູງກວ່າຄອນແທກເລນຊະນິດລາຍອາທິດ ແລະ ລາຍປີ.
10. ບໍ່ຄວນໃສ່ຄອນແທກເລນ Big Eye ຫຼື ທີ່ແບບມີສີສັນແຟນຊີເປັນປະຈຳ ເນື່ອງຈາກການໃສ່ຄອນແທກເລນສີ ຈະເຮັດໃຫ້ອົກຊິແຊນຜ່ານ ເຂົ້າສູ່ແກ້ວຕາໄດ້ໜ້ອຍຫຼາຍ ແລະ ເຮັດໃຫ້ໜ່ວຍຕາແຫ້ງຫຼາຍກວ່າການໃສ່ຄອນແທກເລນປົກກະຕິ.
…ການໃສ່ຄອນແທກເລນຖືກວິທີ ກໍຈະຊ່ວຍ ຖະໜອມດວງຕາໃຫ້ຢູ່ຄູ່ກັບເຮົາໄປອີກຍາວນານ…
ວ.ດາລາວົງ-ນຳສະເໜີ