ມື້ນີ້ມາທຳຄວາມເຂົ້າໃຈ ກ່ຽວກັບການຢຸດສະຫງັກຂອງອາຍຸຄວາມ ໃນການທວງ ຫຼື ການຮ້ອງຟ້ອງ ຍ້ອນມື້ກ່ອນໄດ້ທຳຄວາມເຂົ້າໃຈໃຫ້ເລິກເຊິ່ງຕື່ມ ກ່ຽວກັບການໂຈະອາຍຸຄວາມໃນການທວງ ຫຼື ການຮ້ອງຟ້ອງ.
ການຢຸດສະຫງັກຂອງອາຍຸຄວາມ ໝາຍເຖິງໄລຍະເວລາທີ່ເປັນອາຍຸຄວາມຕາມການຄອບຄອງຕາມສັນຍາ ແລະ ຕາມເຫດການທີ່ຜ່ານມາຖືກລົບລ້າງ ຫຼື ບໍ່ນັບເປັນເວລາຂອງອາຍຸຄວາມ ຍ້ອນມີການກະທຳໃດໜຶ່ງຂອງຄູ່ກໍລະນີຝ່າຍທີ່ມີສິດທວງເຊັ່ນ: ການທວງ ການຮັບຮູ້ໜີ້ສິນຂອງລູກໜີ້ ຫຼື ອາຍຸຄວາມໃນການຮ້ອງຟ້ອງ ຈະຖືກຢຸດສະຫງັກ ເມື່ອມີການກະທຳອັນແນ່ນອນຂອງຄູ່ກໍລະນີ ຫຼື ຄູ່ສັນຍາ ເຊັ່ນ: ການຮັບຮູ້ໜີ້ສິນຂອງຕົນ ໃນກໍລະນີນີ້ອາຍຸຄວາມໃນການຮ້ອງຟ້ອງໃຫ້ເລີ່ມນັບຄືນໃໝ່.
ຕົວຢ່າງ: ນາງ ແປ້ນ ໄດ້ກູ້ຢືມເງິນຈາກ ນາງ ແໜ້ນ ຈຳນວນ 5.000.000 ກີບ ກຳນົດເວລາໃນການໃຊ້ແທນແມ່ນວັນທີ 1 ມັງກອນ 2012 ແຕ່ເມື່ອຮອດວັນນັດໝາຍໃນການໃຊ້ແທນ ນາງ ແປ້ນ ບໍ່ໄດ້ມາຊຳລະໃຫ້ ນາງ ແໜ້ນ ຕາມສັນຍາ ໃນກໍລະນີນີ້ ອາຍຸຄວາມໃນການຮ້ອງຟ້ອງຈະເລີ່ມນັບແຕ່ວັນທີ 2 ມັງກອນ 2012 ເປັນຕົ້ນໄປ ໃນໄລຍະເວລາດັ່ງກ່າວ ກ່ອນຈະຄົບສາມປີ ຖ້ານາງ ແໜ້ນ ໄດ້ມີການທວງ ຫຼື ນາງ ແປ້ນ ຍັງຮັບຮູ້ວ່າຕົນຍັງມີໜີ້ຕໍ່ ນາງ ແໜ້ນ ແລະ ຍິນດີໃຊ້ແທນ ອາຍຸຄວາມທີ່ຜ່ານມານັ້ນ ກໍຖືວ່າແລ້ວໄປ ຫຼື ຖືກລົບລ້າງ
ໂດຍ: ໄມ້ງັດ