ທ່ານ ສາຍສະໝອນ ບຸດດາລາ ຫົວໜ້າກົມຂ່າວສານແມ່ຍິງລາວ ສູນກາງສະຫະພັນແມ່ຍິງລາວ ໄດ້ກ່າວໃນໂອກາດວັນສ້າງຕັ້ງສື່ມວນຊົນລາວ ແລະ ການພິມຈຳໜ່າຍ ຄົບຮອບ 70 ປີ (13/8/1950-13/8/2020) ວ່າ: ສື່ມວນຊົນແມ່ຍິງລາວ ໜຶ່ງໃນພາກສ່ວນພາຫະນະວຽກງານການເມືອງ-ແນວຄິດ ໂດຍໜັງສືພິມແມ່ຍິງລາວໄດ້ຮັບການສ້າງຕັ້ງຂຶ້ນວັນທີ 8 ມີນາ 1980 ເປັນກະບອກສຽງຂອງແມ່ຍິງລາວ ທີ່ມີບົດບາດສຳຄັນໃນການໂຄສະນາເຜີຍແຜ່ຂໍ້ມູນຂ່າວສານຕ່າງໆໃຫ້ກຸ່ມເປົ້າໝາຍແຕ່ສູນກາງຮອດທ້ອງຖິ່ນ ໂດຍສະເພາະ ເອື້ອຍນ້ອງແມ່ຍິງບັນດາເຜົ່າ ສື່ແມ່ຍິງໄດ້ຮັບການພັດທະນາມາເລື້ອຍໆ ມາຮອດປີ 2007 ໄດ້ສ້າງຕັ້ງວາລະສານສາວລາວ ປີ 2007 ພິມເປັນສອງພາສາ ຄືພາສາລາວ ແລະ ພາສາອັງກິດ ພິມຄັ້ງໜຶ່ງ 2.700 ຫົວ ມີ 40 ໜ້າ ພິມຮອດສະບັບທີ 79 ນອກຈາກນີ້ແລ້ວ ຍັງມີຫຼາຍຜະລິດຕະພັນເກີດຂຶ້ນຕື່ມອີກ ມາຮອດປັດຈຸບັນ ມີ 7 ຊະນິດຄື: ໜັງສືພິມ ວາລະສານ ລາຍການວິທະຍຸ ລາຍການໂທລະພາບ ຟິມສາລະຄະດີ ເວັບໄຊ ແລະ ສື່ແບບໃໝ່ (ອອນລາຍ).