2020 ເປັນປີທີ່ນະຄອນຫຼວງວຽງຈັນ (ນວ) ສືບຕໍ່ໄດ້ຮັບຜົນກະທົບຈາກທຳມະຊາດ (ນ້ຳຖ້ວມ ແລະ ແຫ້ງແລ້ງ) ຕໍ່ການຜະລິດຂອງປະຊາຊົນ ຫົວງານຊົນລະປະທານຈຳນວນໜຶ່ງເປ່ເພ ໃຊ້ບໍ່ໄດ້ ຍ້ອນນ້ຳງື່ມບົກແຫ້ງ ຫົວງານຊົນປະທານເຊາະເຈື່ອນ ຍຸບ ແລະ ມີໄພແຫ້ງແລ້ງແກ່ຍາວພໍສົມຄວນ ນອກນີ້ ຍັງເກີດການລະບາດຂອງພະຍາດໂຄວິດ-19 ເຊິ່ງສົ່ງຜົນກະທົບຕໍ່ການພັດທະນາເສດຖະກິດ-ສັງຄົມ ຂະແໜງການກະສິກຳ ແລະ ປ່າໄມ້ ນວ ຈຶ່ງໄດ້ສຸມໃສ່ສູ້ຊົນປະຕິບັດຕົວເລກຄາດໝາຍ ແຜນຄ້ຳປະກັນດ້ານສະ ບຽງອາຫານ ການຜະລິດສິນຄ້າ ແລະ ການສະໜອງວັດຖຸດິບປ້ອນໂຮງງານອຸດສາຫະກຳປຸງແຕ່ງ ໂດຍສະເພາະສຸມໃສ່ການຜະລິດລະດູຝົນປີ 2020 ຕາມມະຕິຂອງສະພາປະຊາຊົນ ນວ ສະໄໝສາມັນເທື່ອທີ 8 ຂໍ້ຕົກລົງຂອງເຈົ້າຄອງ ນວ ແລະ ຄາດໝາຍແຜນການຂອງຄະນະສະເພາະກິດ ຕາມຂໍ້ຕົກລົງຂອງນາຍົກລັດຖະມົນຕີ ເລກທີ 51/ນຍ ເປົ້າໝາຍລວມສືບຕໍ່ຄ້ຳປະກັນຄວາມໝັ້ນຄົງດ້ານສະບຽງອາຫານໃຫ້ໄດ້ໂດຍພື້ນຖານ ສົ່ງເສີມການຜະລິດພືດ ສັດ ແລະ ປາ ເປັນສິນຄ້າ ປ້ອນຕະຫຼາດພາຍໃນຕົວເມືອງ ແລະ ການສົ່ງອອກຈຳນວນໜຶ່ງ.
ອີງຕາມຂໍ້ມູນຈາກພະແນກກະສິກຳ ແລະ ປ່າໄມ້ ນວ ໃຫ້ຮູ້ວ່າ: ເພື່ອໃຫ້ບັນລຸຕາມການຄາດໝາຍ ແລະ ເປົ້າໝາຍລວມນັ້ນ ພະແນກກະສິກຳ ແລະ ປ່າໄມ້ ນວ ໄດ້ສົມທົບກົບຫ້ອງການປົກຄອງເມືອງ ຄົ້ນຄວ້າຫັນເປັນໂຄງການລະອຽດ ແບ່ງຄວາມຮັບຜິດຊອບໃຫ້ຂະແໜງການ ກອງ ສູນ ແລະ ຫ້ອງການກະສິກຳ ແລະ ປ່າໄມ້ 9 ເມືອງ ດ້ວຍການອອກຂໍ້ຕົກລົງ ສະບັບເລກທີ 1569/ກປນວ ໄດ້ສົມທົບກັບກະຊວງກະສິກຳ ແລະ ປ່າໄມ້ ປະຕິບັດໂຄງການຮ່ວມມືກັບສາກົນ 6 ໂຄງການ ແລະ ແຜນວຽກຈຸດສຸມຈຳນວນໜຶ່ງ ເປັນຕົ້ນແຜນຊຸກຍູ້-ສົ່ງເສີມການຜະລິດພາຍໃນ ແລະ ແຜນຕ້ານແລ້ງ-ຕ້ານຖ້ວມ.
ຜ່ານການຈັດຕັ້ງປະຕິບັດຕົວຈິງ ການຜະລິດລະດູຝົນ ປີ 2020 ແມ່ນເປັນຂະບວນການຟົດຟື້ນ ຊາວກະສິກອນ ຜູ້ປະກອບການພາຍໃນ ແລະ ນັກລົງທຶນຕ່າງປະເທດ ໄດ້ປະກອບສ່ວນສ້າງປັດໃຈໃໝ່ຂຶ້ນຫຼາຍອັນ ແລະ ມີຄວາມພົ້ນເດັ່ນ ໂດຍສະເພາະ 6 ເດືອນທ້າຍປີ ຂະແໜງກະສິກຳ ແລະ ປ່າໄມ້ທົ່ວ ນວ ຈະສູ້ຊົນຮັກສາການຂະຫຍາຍຕົວລວມຜະລິດດ້ານກະສິກຳໃຫ້ບັນລຸ 3,23% ປະກອບສ່ວນກວມເອົາຜະລິດຕະພັນພາຍໃນປະມານ 14% ສູ້ຊົນຜະລິດເຂົ້າເນື້ອທີ່ 66.380 ເຮັກຕາ ໃຫ້ໄດ້ເຂົ້າເປືອກ 309.900 ໂຕນ ປູກຜັກ 11.679 ເຮັກຕາ ສະເລ່ຍຜົນຜະລິດ 136.848 ໂຕນ ປູກໄມ້ໃຫ້ໝາກ 670 ເຮັກຕາ ແລະ ສະໜອງທາດຊີ້ນໃຫ້ໄດ້ 27.675 ໂຕນ ພ້ອມທັງສູ້ຊົນສົ່ງເສີມການຜະລິດກະສິກຳເປັນສິນຄ້າສະໜອງຕະຫຼາດຕົວເມືອງ ສົ່ງເສີມການຊົມໃຊ້ຜະລິດຕະພັນພາຍໃນໃຫ້ເປັນຂະບວນການ ແລະ ເປັນລະບົບຕ່ອງໂສ້ການຜະລິດທີ່ເຂັ້ມແຂງ.